ନୂଆଦିଲ୍ଲୀ,୧୨ା୪: ଚାକିରି ଦୁର୍ନୀତି ମାମଲାରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଏବଂ ତାଙ୍କ ପରିବାର ସଦସ୍ୟଙ୍କ ପିଛା ଛାଡୁନି ସମସ୍ୟା। ସୂଚନାନୁଯାୟୀ, ଲାଲୁଙ୍କ ଆଉ ଜଣେ ଝିଅ ମଧ୍ୟ ଇଡି ନଜରକୁ ଆସିଛନ୍ତି। ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କୁ ପଚରାଉଚରା କରିବା ପରେ ବର୍ତ୍ତମାନ ଲାଲୁ ପ୍ରସାଦ ଯାଦବଙ୍କ ଚତୁର୍ଥ ସାନ ଝିଅ ରାଗିଣୀଙ୍କୁ କେନ୍ଦ୍ରୀୟ ଅନୁସନ୍ଧାନ ଏଜେନ୍ସି ଏନ୍ଫୋର୍ସମେଣ୍ଟ ନିର୍ଦ୍ଦେଶାଳୟ ଅର୍ଥାତ୍ ଇଡିରେ ପଚରାଉଚରା ପାଇଁ ଡକାଯାଇଛି। ଜମି ବଦଳରେ ଚାକିରି ଦେବା ମାମଲାରେ ରାଗିଣୀ ଯାଦବଙ୍କୁ ଡକାଯାଇଥିବା ଜଣାପଡ଼ିଛି।
ବୁଧବାର ଲାଲୁଙ୍କ ଝିଅ ରାଗିଣୀ ପଚରାଉଚରା ପାଇଁ ଇଡି ମୁଖ୍ୟାଳୟରେ ପହଞ୍ଚିଥିଲେ। ଯେତେବେଳେ ରାଗିଣୀ ଯାଦବ ଇଡି ମୁଖ୍ୟାଳୟରେ ପହଞ୍ଚିଲେ, ତାଙ୍କ ସ୍ବାମୀ ରାହୁଲ ଯାଦବ ମଧ୍ୟ ତାଙ୍କ ସହ ଆସି ତାଙ୍କୁ ଇଡି ମୁଖ୍ୟାଳୟର ମୁଖ୍ୟ ଫାଟକ ନିକଟରେ ଛାଡ଼ି ଯାଇଥିଲେ। ଏହି ମାମଲାରେ ଲାଲୁଙ୍କ ବଡ଼ ଝିଅ ତଥା ରାଜ୍ୟସଭା ଏମ୍ପି ଡ ମିସା ଭାରତୀଙ୍କୁ ମଧ୍ୟ ଇଡି ପଚରାଉଚରା କରିଛି। ମାର୍ଚ୍ଚ ୨୫ରେ ରାଜ୍ୟସଭା ଏମ୍ପି ମିସା ଭାରତୀଙ୍କୁ ଇଡି ପଚରାଉଚରା ପାଇଁ ଡାକିଥିଲା। ଏହା ପରେ, ଏପ୍ରିଲ ୧୧ରେ ତେଜସ୍ବୀ ଯାଦବଙ୍କୁ ପଚରାଉଚରା ପାଇଁ ଡକାଯାଇଥିଲା।
ତେଜସ୍ବୀ ଯାଦବଙ୍କୁ ପ୍ରାୟ ସାଢ଼େ ୮ ଘଣ୍ଟା ଧରି ଇଡି ପଚରାଉଚରା କରିଥିଲା। ଲାଲଙ୍କର ୭ ଝିଅ ଏବଂ ଦୁଇ ପୁଅ ଅଛନ୍ତି। ୭ ଝିଅଙ୍କ ମଧ୍ୟରୁ ରାଗିଣୀ ୪ ନମ୍ବର। ଯିଏ କି କୋଟିପତି ମଧ୍ୟ ଅଟନ୍ତି। ଗତ କିଛି ଦିନ ପୂର୍ବେ ଲାଲୁ ପରିବାର ସହ ଜଡ଼ିତ ଅନେକ ଲୋକଙ୍କ ବାସଭବନରେ ଇଡି ପକ୍ଷରୁ ଚଢ଼ାଉ ହୋଇଥିଲା। ସେହି ସମୟରେ ବହୁ ଗୁରୁତ୍ୱପୂର୍ଣ୍ଣ ପ୍ରମାଣ ଏବଂ ଦଲିଲ ଜବତ କରାଯାଇଥିଲା।
