ନୂଆଦିଲ୍ଲୀ,୨୧।୫: ଶ୍ରୀଲଙ୍କାର କିମ୍ବଦନ୍ତୀ ଉଇକେଟକିପର ବ୍ୟାଟ୍ସମ୍ୟାନ କୁମାର ସାଙ୍ଗାକାରା ନିଜ ସମୟରେ ଭାରତୀୟ ସ୍ପିନର ଅନିଲ କୁମ୍ବଲେଙ୍କୁ ନେଇ ଚିନ୍ତିତ ଥିଲେ। ଏପରି କି ରାତିରେ ନିଦ ହେଉ ନ ଥିଲା। କୁମ୍ବଲେଙ୍କୁ ହଲ ଅଫ୍ ଫେମରେ ସାମିଲ କରାଯିବା ଅବସରରେ ଆଇସିସି ପକ୍ଷରୁ ଜାରି କରାଯାଇଥିବା ଭିଡିଓରେ ଏହା ସ୍ବୀକାର କରିଛନ୍ତି ଶ୍ରୀଲଙ୍କାର ଏହି ମହାନ ବ୍ୟାଟ୍ସମ୍ୟାନ।
” କୁମ୍ବଲେଙ୍କ ପାଇଁ ମୋତେ ରାତିରେ ନିଦ ହେଉ ନ ଥିଲା। ସେ ଜଣେ ଅର୍ଥଡକ୍ସ ଲେଗ୍ ସ୍ପିନରଙ୍କ ଭଳି ନ ଥିଲେ। ସେ ହାଇଆର୍ମ ଶୈଳୀରେ ବୋଲିଂ କରୁଥିଲେ, ଯାହା ତାଙ୍କୁ ବାଉନ୍ସ ପ୍ରଦାନ କରୁଥିଲା। ଆଉ ସେ ଦ୍ରୁତ ଗତିରେ ଠିକ୍ ସ୍ଥାନରେ ବୋଲିଂ କରନ୍ତି। ଏହା ବ୍ୟାଟ୍ସମ୍ୟାନଙ୍କ ପାଇଁ ସମସ୍ୟା ସୃଷ୍ଟି କରୁଥିଲା। ସେ ଭାରତ ଓ ବିଶ୍ୱ କ୍ରିକେଟ ପାଇଁ ଜଣେ ଚାମ୍ପିୟନ ଥିଲେ “ ବୋଲି ସାଙ୍ଗାକାରା କହିଛନ୍ତି।
ଉଲ୍ଲେଖଥାଉ କି, ଟେଷ୍ଟ କ୍ରିକେଟ ଇତିହାସରେ ସର୍ବାଧିକ ଉଇକେଟ ନେଇଥିବା ବୋଲରଙ୍କ ତାଲିକାରେ କୁମ୍ବଲେ(୬୧୯ ଉଇକେଟ) ୩ୟ ସ୍ଥାନରେ ଅଛନ୍ତି। ଅନ୍ତର୍ଜାତୀୟ କ୍ରିକେଟର ଦ୍ୱିତୀୟ ବୋଲର ଭାବେ ଗୋଟିଏ ଇନିଂସରେ ୧୦ ଉଇକେଟ ହାତେଇଥିଲେ। ୧୯୯୯ରେ ପାକିସ୍ତାନ ବିପକ୍ଷରେ ଦିଲ୍ଲୀର କୋଟଲା ଗ୍ରାଉଣ୍ଡରେ ଅନୁଷ୍ଠିତ ଟେଷ୍ଟରେ ଏହି ସଫଳତା ହାତେଇଥିଲେ କୁମ୍ବଲେ।
