ଅନୁଗୋଳ ଅଫିସ,୮।୪ ଅନୁଗୋଳ ପୌରପାଳିକା ଉପାଧ୍ୟକ୍ଷା ପଦ ପ୍ରଥମ ଥର ପାଇଁ ଭାଜପା ଅକ୍ତିଆର କରିଛି। ଗୁରୁବାର ଏହି ପଦବୀ ପାଇଁ ନିର୍ବାଚନ ହୋଇଥିବା ବେଳେ ଭାଜପା ପ୍ରାର୍ଥୀ ଅନୁପମା ସାହୁ ବିଜୟୀ ହୋଇଛନ୍ତି। ତେବେ ୧୦ କାଉନସିଲର ଥିବା ସତ୍ତ୍ୱେ ବିଜେଡି ପ୍ରତିଦ୍ୱନ୍ଦ୍ୱିତାକୁ ନ ଓହ୍ଲାଇବା ଅନୁଗୋଳରେ ଚର୍ଚ୍ଚାର ବିଷୟ ହୋଇଛି।
୨୩ ଓ୍ବାର୍ଡ ବିଶିଷ୍ଟ ଅନୁଗୋଳ ପୌର ପରିଷଦ ଅଧ୍ୟକ୍ଷ ପଦ ଏଥର ବିଜେଡି ହାତେଇ ନେଇଛି। ପ୍ରଥମ ଥର ପାଇଁ ଦଳ ଏହି ସଫଳତା ପାଇଥିଲେ ମଧ୍ୟ ୨୩ ଓ୍ବାର୍ଡ ମଧ୍ୟରୁ କେବଳ ୧୦ଟି ନିଜ ଦଖଲକୁ ନେଇପାରିଛି। ଫଳରେ ୧୩ ଓ୍ବାର୍ଡରେ ବିଜୟୀ ହୋଇଥିବା ଭାଜପା ଏଠାରେ ବଡ଼ ଦଳ ଭାବେ ଉଭା ହୋଇଛି। ତେଣୁ ଉପାଧ୍ୟକ୍ଷା ପଦବୀ ଭାଜପା ଭାଗରେ ପଡ଼ିବ ବୋଲି ପୂର୍ବରୁ କୁହାଯାଉଥିଲା। ହେଲେ ସଂଖ୍ୟା ଗରିଷ୍ଠତା ନ ଥିଲେ ବି ବିଜେଡି ଏତେ ସହଜରେ ଭାଜପାକୁ ବାଟ ଛାଡ଼ିବ ନାହିଁ ବୋଲି ଆଲୋଚନା ହେଉଥିଲା। ଅଧ୍ୟକ୍ଷ ପଦବୀ ପରି ଉପାଧ୍ୟକ୍ଷା ପଦବୀରେ ନିଜ ପ୍ରାର୍ଥୀଙ୍କ ବିଜୟ ପାଇଁ ଦଳ ସମସ୍ତ ବଳ ଖଟାଇବ ବୋଲି ଚର୍ଚ୍ଚା ହେଉଥିଲା। ହେଲେ ସବୁ ଆଶା ଆଶଙ୍କାର ଅବସାନ ଘଟାଇ ବିଜେଡି ଉପାଧ୍ୟକ୍ଷା ପଦବୀ ପାଇଁ ଗୁରୁବାର ହୋଇଥିବା ନିର୍ବାଚନରୁ ଦୂରେଇ ରହିଥିଲା। ଦଳ ପ୍ରାର୍ଥୀ ନ ଦେବାରୁ ଭାଜପାର ଏକମାତ୍ର ପ୍ରାର୍ଥୀ ଭାବେ ୪ନଂ. ଓ୍ବାର୍ଡ କାଉନସିଲର ଅନୁପମା ସାହୁ ନାମାଙ୍କନପତ୍ର ଦଖଲ କରିଥିଲେ। ପରେ ନିର୍ବାଚନ ଅଧିକାରୀ ଅନୁପମାଙ୍କୁ ନିଦର୍ବନ୍ଦ୍ବରେ ନିର୍ବାଚିତ ହୋଇଥିବା ଘୋଷଣା କରିଥିଲେ।
