ଖୋର୍ଦ୍ଧା ଅଫିସ,୨୮ା୭:ଗର୍ଭବତୀ ମହିଳା ଓ ଶିଶୁଙ୍କ ଯତ୍ନ ସହ ପିଲାଙ୍କୁ ପ୍ରାକ୍ ବିଦ୍ୟାଳୟ ଶିକ୍ଷା ପ୍ରଦାନ ସକାଶେ ସରକାର ଅଙ୍ଗନୱାଡି କେନ୍ଦ୍ର ବ୍ୟବସ୍ଥା କରିଛନ୍ତି। ମା’ ଓ ଶିଶୁଙ୍କ ସ୍ବାସ୍ଥ୍ୟର ଯତ୍ନ ଲାଗି ବିଭିନ୍ନ ସମୟରେ ଅଙ୍ଗନୱାଡି କେନ୍ଦ୍ରଗୁଡ଼ିକୁ ଛତୁଆ, ଅଣ୍ଡା ପ୍ରଭୃତି ପୁଷ୍ଟିକର ଖାଦ୍ୟ ଯୋଗାଇ ଦେଉଛନ୍ତି। ତେବେ ଖୋର୍ଦ୍ଧା ଜିଲା ବାଣପୁର ବ୍ଲକ ନରେନ୍ଦ୍ରପୁର ପଞ୍ଚାୟତ ବଡସିରେଇ ଗ୍ରାମରେ ଏହି ଖାଦ୍ୟ ବାଟମାରଣା ହେଉଛି। ଏନେଇ ପ୍ରତିବାଦ କଲେ ଧମକଚମକ ମିଳୁଛି ବୋଲି ବଡସିରେଇ ଗ୍ରାମବାସୀ ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବିରେ ମଙ୍ଗଳବାର ଖୋର୍ଦ୍ଧା ଉପଜିଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି।
ଦର୍ଶାଯାଇଛି ଯେ, ବଡସିରେଇ ଗ୍ରାମରେ ୨୭୫ ପରିବାର ରହୁଛନ୍ତି। ଏହି ଗ୍ରାମରେ ୨ଟି ଅଙ୍ଗନଓ୍ବାଡି କେନ୍ଦ୍ର ରହିଛି। ଉକ୍ତ କେନ୍ଦ୍ର ଦ୍ୱୟରେ ଏହି ପରିବାରର ଦୁଇଜଣ ମହିଳା ରହିଛନ୍ତି। କେନ୍ଦ୍ରକୁ ଆସୁଥିବା ଅଣ୍ଡା, ଛତୁଆ ପ୍ରଭୃତି ପିଲାଙ୍କୁ ବାଣ୍ଟିବା ପରିବର୍ତ୍ତେ ସେମାନେ ବଜାରରେ ବିକ୍ରି କରିଦେଉଛନ୍ତି। ଏହାର ପ୍ରତିବାଦ କଲେ ଧମକ ଚମକ ମିଳୁଛି। ୨୦୧୯ରେ ଏଭଳି ଘଟଣା ନେଇ ଗାଁ କମିଟିରେ ଆଲୋଚନା କରାଯିବାରୁ ସମ୍ପୃକ୍ତ ପରିବାର ପକ୍ଷରୁ ଗାଳିଗୁଲଜ ଓ ଆକ୍ରମଣ କରାଯାଇଥିଲା। ଏନେଇ ସେମାନଙ୍କ ବିରୋଧରେ ବାଣପୁର ଥାନାରେ ୩୦୭ ଦଫାରେ ଏକ ମାମଲା ରୁଜୁ ହୋଇଥିଲା। ପରେ ଗତ ଫେବୃୟାରୀରେ ଗାଁ କମିଟି, ପୋଲିସ, ବ୍ଲକ ଓ ଜିଲା ପ୍ରଶାସନର ଅଧିକାରୀଙ୍କ ଉପସ୍ଥିତିିରେ ଏ ସମ୍ପର୍କରେ ଆଲୋଚନା କରାଯାଇଥିଲା। ଉଭୟ କେନ୍ଦ୍ରରେ ବର୍ତ୍ତମାନର ଅଙ୍ଗନଓ୍ବାଡି କର୍ମୀଙ୍କୁ ହଟାଇ ନୂତନ କର୍ମୀ ନିଯୁକ୍ତି ଦେବାକୁ ଗ୍ରାମବାସୀ ଦାବି ଜଣାଇଥିଲେ। ପ୍ରଶାସନ ପ୍ରତିଶ୍ରୁତି ଦେଇଥିଲେ ମଧ୍ୟ ଏପର୍ଯ୍ୟନ୍ତ କାର୍ଯ୍ୟକାରୀ ହୋଇନାହିଁ। କାର୍ଯ୍ୟାନୁଷ୍ଠାନ ନ ହେବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି ଗ୍ରାମବାସୀ କହିଛନ୍ତି।
