ମାଲକାନଗିର,୨୪ା୬(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା କାଲମେଳା ତହସିଲ ଜମି ଦୁର୍ନୀତି ମାମଲାର ତଦନ୍ତ ପରେ ପୁଣି ୧୭ ଜଣଙ୍କ ପଟ୍ଟା ଜିଲା ପ୍ରଶାସନ ରଦ୍ଦ କରିଛି। ତା୨୮ା୭୨୦୨୧ରେ ମିସ୍କେସ୍ ମାଧ୍ୟମରେ ୧୦ ଜଣଙ୍କ ପଟ୍ଟା ପ୍ରଶାସନ ରଦ୍ଦ କରିଥିଲେ। ଏହି ୧୦ଟି ପଟ୍ଟାରେ ୧୨ଟି ପ୍ଲଟ ରହିଥିଲା। ସେହିପରି ଗତ ଅକ୍ଟୋବର ୨୦୨୨ରେ ମଧ୍ୟ ୩୯ ଜଣଙ୍କ ପଟ୍ଟା ରଦ୍ଦ ହୋଇଥିଲଶ। ଏବେ ରଦ୍ଦ ହୋଇଥିବା ପଟ୍ଟାର ହିତାଧିକାରୀମାନେ ହେଲେ ସୁଧୀର ସ୍ବାଇଁ, ରୁଦ୍ର ପାତ୍ର, ରେଣୁବାଲା ସ୍ବାଇଁ, ଶୁଭଶ୍ରୀ ସ୍ବାଇଁ, ମୁରଲି ନାଗ, ନୀଳ ନାଗ, ରେଣୁକା ପତି, ଏମ୍ଡି ଆଜମିର୍, ସୁଦିପ୍ତ ବେହେରା, ଆରତୀ ପ୍ରଧାନ, ବିନୋଦ ସାହୁ, ବି. ମହେଶ, ବି. ହେବାବତୀ, ବି. ବାରାଲକ୍ଷ୍ମୀ, ବି. କାନ୍ତାମା, ବି.ପୁଷ୍ପା (୧) ଓ ବି. ପୁଷ୍ପା (୨) ବୋଲି ତହସିଲ ପକ୍ଷରୁ କୁହାଯାଇଛି। ଗତ ୧୮ା୧୧ା୨୦୨୦ରେ କାଲିମେଳା ସହରର ୧୮ ଜଣ କରିଥିବା ସରକାରୀ ଜମି ଜବରଦଖଲକୁ ଦୁର୍ନୀତି କରି ସେମାନଙ୍କୁ ପଟ୍ଟା ବଣ୍ଟନ କରାଯାଇଥିଲା। ଏନେଇ ତତ୍କାଳୀନ ମୁଖ୍ୟ ଶାସନ ସଚିବଙ୍କ ସମେତ ବିଭିନ୍ନ ବିଭାଗର ଉଚ୍ଚପଦସ୍ଥ ଅଧିକାରୀଙ୍କ ନିକଟରେ ଲିଖିତ ଅଭି ଯୋଗ ହୋଇଥିଲା। ତଦନ୍ତ ପରେ ଏହି ଜମି ଦୁର୍ନୀତିିରେ ଲିପ୍ତ ଥିବା କାଲିମେଳା ସର୍କଲର ରାଜସ୍ବ ନିରୀକ୍ଷକ ସୁରେଶ ପୂଜାରୀ ଏବଂ ଏନକ୍ରୋଚମେଣ୍ଟ ବିଭାଗର କିରାଣି ଦିବ୍ୟସିଂହ ପାଇକରାୟଙ୍କୁ ଗତ ୨୩ା୧ ୨୦୨୧ରେ ଚାକିରିରୁ ନିଲମ୍ବିତ କରାଯାଇଥିଲା। ପରେ ବ୍ରହ୍ମପୁର ଆର୍ଡିସିଙ୍କ ଚିଠି ନଂ. ୫୨୩, ୯ା୩ା୨୧ ଅନୁଯାୟୀ ମାଲକାନଗିରି ଉପଜିଲାପାଳଙ୍କ ନେତୃତ୍ୱରେ ଏକ ୫ ଜଣିଆ ଟିମ୍ ଏହାର ଖୋଲତାଡ ଆରମ୍ଭ କରିଥିଲେ। ଏହାର ୨ମାସ ପରେ ୬ା୫ା୨୦୨୧ରେ ତହସିଲଦାର ଆଲୋକ ଅନୁଗୁଳିଆଙ୍କୁ ଡେପୁଟି କଲେକ୍ଟର ଭାବେ କୋରାପୁଟକୁ ବଦଳି କରାଯାଇଥିଲା। ବଦଳିର କିଛିଦିନ ପରେ ତାଙ୍କୁ ଚାକିରିରୁ ନିଲମ୍ବିତ କରାଯାଇଥିଲା। ଉକ୍ତ ୫ ଜଣିଆ ଟିମ୍ର ଖୋଲତାଡ ପରେ ରଦ୍ଦ ହୋଇଥିବା ଏହି ୧୭ ପଟ୍ଟା କୌଣସି ପଦାଧିକାରୀ କିମ୍ବା କୌଣସି ଲୋକ ପ୍ରତିନିଧିଙ୍କ ଅଜାଣତରେ ବଣ୍ଟନ କରାଯାଇଥିଲା। ଏଥିରେ ବଡ ଠିକାଦାର, କ୍ରସର ମାଲିକ, ଘରୋଇ ବସ୍ ମାଲିକ, ପ୍ରତିଷ୍ଠିତ ବ୍ୟବସାୟୀ, ପେଟ୍ରୋଲ ଓ ଡିଜେଲ ପମ୍ପ ମାଲିକ, ରାଜନେତା, ଚାକିରିଆ ପରିବାର ବିଦ୍ୟାର୍ଥୀ, ଗୋଟିଏ ପରିବାରର ଦୁଇରୁ ଅଧିକ ଲୋକ ଥିବା ଜଣାପଡିଛି। ସେମାନଙ୍କୁ ମିଥ୍ୟା ସତ୍ୟପାଠରେ ପଟ୍ଟା ପ୍ରଦାନ କରାଯାଇଥିଲା। କାଲିମେଳା ପଞ୍ଚାୟତର ସାପ୍ତାହିକ ହାଟ ସ୍ଥଳ, ଓଡିଶା ଯବାନ ପାଇଁ ସଂରକ୍ଷିତ ଜମି, ସ୍ବାସ୍ଥ୍ୟ ବିଭାଗ ଦଖଲ ଜମି, ପଞ୍ଚାୟତ ପାଇଁ ସଂରକ୍ଷିତ ଜମି, ବନ ବିଭାଗର ଭୈରବୀ ପାହାଡ ଭଳି ଜମିକୁ ହସ୍ତାନ୍ତର କରା ଯାଇଥିଲା। ଏଥିରୁ କେତେକ ଫ୍ଲଟ ୩୨୬ ନଂ. ଜାତୀୟ ରାଜପଥ କଡରେ ଥିବା ଜଣାପଡଛି। ସୂଚନାଯୋଗ୍ୟ, ମାଲକାନଗିରି ଜିଲାର ବହୁ ଚର୍ଚ୍ଚିତ ଏହି ଜମି ଦୁର୍ନୀତିରେ ବର୍ତ୍ତମାନ ସୁଦ୍ଧା ମୋଟ ୬୬ଟି ପଟ୍ଟା ପ୍ରଶାସନ ରଦ୍ଦ କରି ପୁଣି ସରକାରୀ ଖାତାକୁ ଆଣିବାରେ ସକ୍ଷମ ହୋଇଛି।
