ନୂଆଦିଲ୍ଲୀ,୧୬।୯: ରୁଷିଆଠାରୁ ବିପୁଳ ପରିମାଣରେ କ୍ରୁଡ ଅଏଲ କିଣୁଥିବା ଦେଶଗୁଡ଼ିକ ଉପରେ ୧୦୦ ପ୍ରତିଶତ ଟାରିଫ ଲଗାଇବା ନେଇ ଆମେରିକାରେ ଆଇନ ପ୍ରଣୟନ ପ୍ରକ୍ରିୟା ଆଗକୁ ବଢ଼ିଛି। ଆମେରିକୀୟ ସିନେଟ୍ରେ ବିଲ୍କୁ ଅନୁମୋଦନ ମିଳିବା ପରେ ଏବେ ଏହାକୁ ହାଉସ ଅଫ ରିପ୍ରେଜେଣ୍ଟେଟିଭ୍ରେ ଉପସ୍ଥାପନ କରାଯାଉଛି। ଆମେରିକୀୟ କଂଗ୍ରେସର ନିମ୍ନ ସଦନରେ ଏହି ବିଲ ଉପରେ ସେପ୍ଟେମ୍ବର ୧୭ରେ ଭୋଟିଂ ହେବାର କାର୍ଯ୍ୟକ୍ରମ ରହିଛି।
ବିଲ୍ଟି ଆଇନରେ ପରିଣତ ହେଲେ ରୁଷିଆଠାରୁ ତେଲ କିଣୁଥିବା ଭାରତ ଉପରେ ୧୦୦ ପ୍ରତିଶତ ଟାରିଫ ଲାଗିପାରେ। ତେବେ ଆମେରିକାର ଚାପ ଆଗରେ ଭାରତ ନିଜ ନୀତି ବଦଳାଇବ ନାହିଁ ବୋଲି ସଙ୍କେତ ଦେଇଛି। ରୁଷିଆଠାରୁ ତେଲ କିଣିବା ଜାରି ରଖିବା ନେଇ ଭାରତ ପକ୍ଷରୁ ସ୍ପଷ୍ଟ କରାଯାଇଛି।
ଭାରତୀୟ ବୈଦେଶିକ ମନ୍ତ୍ରଣାଳୟର ପ୍ରବକ୍ତା ରଣଧୀର ଜୟସ୍ବାଲ କହିଛନ୍ତି ଯେ, ଭାରତ ନିଜର ଶକ୍ତି ଆବଶ୍ୟକତା ସମ୍ପର୍କିତ ନିଷ୍ପତ୍ତି ଦେଶର ୧୪୦ କୋଟି ଲୋକଙ୍କ ସ୍ବାର୍ଥକୁ ଧ୍ୟାନରେ ରଖି ନେଇଆସିଛି ଏବଂ ଆଗକୁ ମଧ୍ୟ ସେହି ନୀତି ଅନୁସରଣ କରିବ।
ଆମେରିକାରେ ଏହି ବିଲ୍କୁ ‘ଲିଣ୍ଡସେ ଗ୍ରାହାମ ସ୍ୟାଙ୍କସନିଂ ରୁଷିଆ ଆଣ୍ଡ ଇରାନ ବିଲ’ ବୋଲି କୁହାଯାଉଛି। ଆମେରିକୀୟ ସିନେଟ୍ରେ ବିଲ୍କୁ ୮୬-୧୧ ଭୋଟ୍ରେ ପାସ ହୋଇଥିବା ଦାବି କରାଯାଇଛି।
ଏହି ବିଲ୍ରେ ରୁଷିଆଠାରୁ ସର୍ବାଧିକ ତେଲ କିଣୁଥିବା ଦେଶଗୁଡ଼ିକ ଉପରେ ୧୦୦ ପ୍ରତିଶତ ଟାରିଫ ଲଗାଇବାର ବ୍ୟବସ୍ଥା ଥିବା କୁହାଯାଉଛି। ଭାରତ ଓ ଚାଇନା ଏହି ତାଲିକାରେ ପ୍ରମୁଖ ଦେଶ ଭାବେ ରହିଛନ୍ତି।
ଭାରତ ସରକାର ସହ ଜଡ଼ିତ ସୂତ୍ରଙ୍କ ଅନୁସାରେ, ନୂଆଦିଲ୍ଲୀ ଏହି ପରିସ୍ଥିତି ଉପରେ ନଜର ରଖିଛି। ତେବେ ଏହି ଚାପ ଯୋଗୁ ଭାରତ ରୁଷିଆଠାରୁ ତେଲ କିଣିବା ନୀତିରେ ପରିବର୍ତ୍ତନ କରିବାର ସଙ୍କେତ ଦେଇନାହିଁ।
ଏହା ମଧ୍ୟରେ କିଛି ଆମେରିକୀୟ ସାଂସଦ ବିଲ୍ରେ ସଂଶୋଧନ ଆଣିବାକୁ ଦାବି କରିଥିବା ଖବର ଆସିଛି। ରୁଷିଆଠାରୁ ତେଲ କିଣୁଥିବା ଦେଶଗୁଡ଼ିକ ମଧ୍ୟରୁ ବିଶେଷ ଭାବେ ଭାରତର ନାଁ ସ୍ପଷ୍ଟ ଭାବେ ଉଲ୍ଲେଖ କରିବାକୁ କିଛି ସାଂସଦ ଦାବି କରିଛନ୍ତି।
ଏହା ସହ ରୁଷିଆଠାରୁ ସର୍ବାଧିକ ତେଲ କିଣୁଥିବା ୧୦ଟି ଦେଶର ନାଁ ସ୍ପଷ୍ଟ ଭାବେ ବିଲ୍ରେ ଉଲ୍ଲେଖ କରି ସେମାନଙ୍କ ଉପରେ ୧୦୦ ପ୍ରତିଶତ ଟାରିଫ ଲଗାଇବା ପାଇଁ ମଧ୍ୟ ଦାବି ହୋଇଥିବା ଜଣାପଡ଼ିଛି।
ଏହି ପ୍ରସ୍ତାବିତ ତାଲିକାରେ ଭାରତ ଓ ଚାଇନା ସହ ତୁର୍କୀ, ଆଜରବାଇଜାନ, ହଙ୍ଗେରୀ, ସ୍ଲୋଭାକ ରିପବ୍ଲିକ, ୟୁଏଇ, ସିଙ୍ଗାପୁର, କାଜାଖସ୍ତାନ ଓ କିର୍ଗିଜସ୍ତାନର ନାଁ ଥିବା ଦାବି କରାଯାଇଛି।
ଏବେ ଆମେରିକୀୟ ହାଉସ ଅଫ ରିପ୍ରେଜେଣ୍ଟେଟିଭ୍ରେ ବିଲ୍ଟିର ଭବିଷ୍ୟତ ଉପରେ ନଜର ରହିଛି। ବିଲ୍ଟି ଆଇନରେ ପରିଣତ ହେଲେ ଭାରତ-ଆମେରିକା ବାଣିଜ୍ୟ ସମ୍ପର୍କ ଏବଂ ଭାରତର ଊର୍ଜା ଆମଦାନୀ ନୀତି ଉପରେ ଏହାର ପ୍ରଭାବକୁ ନେଇ ଆଲୋଚନା ବଢ଼ିପାରେ।
Dharitri – Odisha’s No.1 Odia Daily
