ନୂଆଦିଲ୍ଲୀ,୨୩ା୮: ପୂର୍ବତନ ଭାରତୀୟ ଫୁଟ୍ବଲ ଅଧିନାୟକ ତଥା କିମ୍ବଦନ୍ତୀ ବାଇଚୁଙ୍ଗ ଭୂତିଆ କମିଟି ଅଫ୍ ଆଡ୍ମିନିଷ୍ଟ୍ରେଟର୍ସ ଦ୍ୱାରା କରାଯାଇଥିବା ସଂଶୋଧନକୁ ସମର୍ଥନ କରି ଏକ ଯାଚିକା ଦାଖଲ କରିଛନ୍ତି। ଫିଫା ପକ୍ଷରୁ କରାଯାଇଥିବା ବାସନ୍ଦରେ ଭୟଭୀତ ନ ହୋଇ ଭାରତ ଏହି ସଂଶୋଧନଗୁଡିକ କାର୍ଯ୍ୟକାରୀ କରିବା ଉଚିତ ବୋଲି ସେ ଉଲ୍ଲେଖ କରିଛନ୍ତି। ଅନ୍ୟପକ୍ଷରେ ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫ୍ଏଫ)ର କୌଣସି ପଦ ପାଇଁ ସେ ଆଗ୍ରହୀ ନୁହନ୍ତି ବୋଲି କହିଛନ୍ତି ପୂର୍ବତନ ସଭାପତି ପ୍ରଫୁଲ୍ଲ ପଟେଲ।
କ୍ରିକେଟ୍ ପ୍ରତି ତେନ୍ଦୁଲକର ଓ ଗାଭାସ୍କରଙ୍କ ଅବଦାନ ଯାହା ଫୁଟ୍ବଲରେ ଭୂତିଆଙ୍କ ଅବଦାନ ଏହାଠାରୁ କୌଣସି ଗୁଣରେ କମ୍ ନୁହଁ। ସୋମବାର ସୁପ୍ରିମ୍କୋର୍ଟରେ ଶୁଣାଣି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ଏପରି କୁହାଯିବା ସହିତ ତାଙ୍କ ପାଇଁ ଏକ ବୃହତ୍ତର ଦାୟିତ୍ୱ ରଖାଯାଇଥିବା କହିଥିଲେ। ଏଆଇଏଫ୍ଏଫ୍ ସଭାପତି ପଦ ତାଙ୍କ ସମ୍ମାନ ତୁଳନାରେ ଉପଯୁକ୍ତ ନୁହେଁ ବୋଲି କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଥିଲା। ସିଓଏ ପକ୍ଷରୁ ଆଗତ ସମ୍ବିଧାନକୁ ଆପଣେଇନେବା ପାଇଁ ଭୂତିଆ ଆବେଦନ କରିଥିଲେ। ଦେଶ ପାଇଁ ୧୦ ବର୍ଷ ବା ୧୦୦ରୁ ଅଧିକ ମ୍ୟାଚ୍ ଖେଳିଥିଲେ ହେଁ ଫୁଟ୍ବଲ ପ୍ରଶାସନରେ ସାମିଲ ହେବା ତାଙ୍କ ପାଇଁ ସ୍ବପ୍ନ ବୋଲି ଭୂତିଆ କହିଥିଲେ। ଭୂତିଆଙ୍କ ପକ୍ଷରୁ ରାଘେନାଥ ବସନ୍ତ ମାମଲା ପରିଚାଳନା କରିଥିଲେ। ୧୦୭ ମ୍ୟାଚ୍ରେ ଭାରତର ପ୍ରତିନିଧିତ୍ୱ କରିବା ସତ୍ତ୍ୱେ ମଧ୍ୟ ଫୁଟବଲ ପ୍ରଶାସନରେ ପ୍ରବେଶ କରିବା ତାଙ୍କ ପାଇଁ ଅସମ୍ଭବ। ଏପରି ସ୍ଥଳେ ସିଓଏଙ୍କ ସଂଶୋଧନ ଲାଗୁହେବା ଆବଶ୍ୟକ। ଏପରି ହେଲେ ୧୭ ବର୍ଷରୁ କମ୍ ମହିଳା ବିଶ୍ୱକପ ଆୟୋଜନ ପ୍ରଭାବିତ ହେବ ବୋଲି ଖଣ୍ଡପୀଠ କହିଥିଲେ। ୪ ବର୍ଷ ତଳେ ୧୭ ବର୍ଷରୁ କମ୍ ପୁରୁଷ ବିଶ୍ୱକପ ଆୟୋଜନ କରିଥିଲା। ବର୍ତ୍ତମାନ ଭାରତର ର଼୍ୟାଙ୍କିଙ୍ଗ୍ ୧୦୪ ରହିଛି। ତେଣୁ ୧୭ ବର୍ଷରୁ କମ୍ ବିଶ୍ୱକପ୍ ଆୟୋଜନ ପରିବର୍ତ୍ତେ ସଂଶୋଧନ କରିବା ସହିତ ଆଗାମୀ ଦିନରେ ମୁଖ୍ୟ ବିଶ୍ୱକପ୍ ଆୟୋଜନ ପାଇଁ ପ୍ରୟାସ କରିବା ଉଚିତ୍।
ସିଓଏ ପକ୍ଷରୁ ମାମଲା ପରିଚାଳନା କରୁଥିବା ଗୋପାଳ ଶଙ୍କର ନାରାୟଣନ ତୃତୀୟ ପକ୍ଷ ଅଭିଯୋଗକୁ ଖଣ୍ଡନ କରିଥିଲେ। ସିଓଏ ଅଯଥା ହସ୍ତକ୍ଷେପ କରୁ ନ ଥିଲେ ବରଂ ସୁପ୍ରିମକୋର୍ଟଙ୍କ ପକ୍ଷରୁ ନିଯୁକ୍ତି ମିଳିଥିବା ସେ କହିଥିଲେ। ଏକ ଘରୋଇ ଫାର୍ମ ଦ୍ୱାରା କରାଯାଇଥିବା ଅଡିଟ୍ରେ ବ୍ୟାପକ ଦୁର୍ନୀତିର ପ୍ରମାଣ ମିଳିଥିବା ସେ ସ୍ପଷ୍ଟ କରିଥିଲେ। ଏଆଇଏଫ୍ଏଫ୍ରେ ହୋଇଥିବା ଦୁର୍ନୀତିର ତଦନ୍ତ ରିପୋର୍ଟ ତୁରନ୍ତ ଦାଖଲ କରିବା ପାଇଁ କେନ୍ଦ୍ର ସରକାରଙ୍କ କ୍ରୀଡ଼ା ଓ ଯୁବ ବ୍ୟାପାର ବିଭାଗକୁ କୋର୍ଟ ନିର୍ଦ୍ଦେଶ ଦେଇଥିଲେ। ଭାରତୀୟ ଫୁଟ୍ବଲର ବିକାଶ ପାଇଁ ଏହିସବୁ ସଂସ୍କାର ନିତାନ୍ତ ଆବଶ୍ୟକ ବୋଲି ସେ ମତ ରଖିଥିଲ। କୋର୍ଟଙ୍କ ଅସମ୍ମାନ ମାମଲାର ବିଚାର ଚାଲିଥିବା ବେଳେ ଏହି ମାମଲାରେ ସମ୍ପୃକ୍ତ ବ୍ୟକ୍ତିଙ୍କୁ ନିର୍ବାଚନରେ ଅଂଶଗ୍ରହଣର ସୁଯୋଗ ମିଳିବା ଅନୁଚିତ ବୋଲି ସେ ଯୁକ୍ତି ବାଢ଼ିଥିଲେ। ଶଙ୍କର ନାରାୟଣନଙ୍କୁ କୋର୍ଟ ଏହି ମାମଲାରେ ଆମିକସ୍କ୍ୟୁରି ନିଯୁକ୍ତ କରିଥିବା ବେଳେ ଦୁର୍ନୀତି ମାମଲାର ତଦନ୍ତ ରିପୋର୍ଟର ଗୋଟିଏ ଲେଖାଏ କପି କୋର୍ଟ ଓ କ୍ରୀଡା ମନ୍ତ୍ରଣାଳୟକୁ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି।
ଦିଲ୍ଲୀ ହାଇକୋର୍ଟରେ ଏହି ମାମଲାର ପ୍ରଥମ ଯାଚିକା ଦାଖଲ କରିଥିବା ଆଡ୍ଭୋକେଟ ରାହୁଲ ମେହେରା ସିଓଏ ଉଚ୍ଛେଦକୁ ବିରୋଧ କରିଥିଲେ। ଏପରି କରିବା ଦ୍ୱାରା ଏକ ଖରାପ ପରମ୍ପରା ସୃଷ୍ଟି କରିବ। ଅନ୍ୟ କ୍ରୀଡ଼ା ପାଇଁ ସିଓଏ ନିଯୁକ୍ତ ହୋଇଥିବା ବେଳେ ଏହାକୁ ମଧ୍ୟ ବିରୋଧାଭାସର ସମ୍ମୁଖୀନ ହେବାକୁ ପଡ଼ିବ ବୋଲି ସେ ଯୁକ୍ତି କରିଥିଲେ।
ପୂର୍ବତନ ଏଆଇଏଫ୍ଏଫ୍ ସଭାପତି ପ୍ରଫୁଲ୍ଲ ପଟେଲଙ୍କ ପ୍ରତିନିଧିତ୍ୱ କରୁଥିଲେ କପିଲ ଶିବଲ। ଫୁଟବଲ ସଂଘରେ କୌଣସି ବି ପଦବୀ ପାଇଁ ପଟେଲ ଆଗ୍ରହୀ ନ ଥିବା ଶିବଲ କହିଥିଲେ। ମୁଁ ଏଆଇଏଫ୍ଏଫ୍ରେ କୌଣସି ପଦବୀ ଚାହେଁନି, ଦେଶକୁ ଫୁଟବଲ ବିଶ୍ୱକପ ଆଣିଛି ଏବଂ ଏହା ଆୟୋଜିତ ହେଉ ବୋଲି ଚାହୁଁଥିବା ନେଇ ପଟେଲ ନିଜ ଯାଚିକାରେ ଉଲ୍ଲେଖ କରିଛନ୍ତି। ଏହା ଉପରେ ରାହୁଲ ମେହେରା କହିଥିଲେ କେବଳ ଫୁଟବଲ ବିଶ୍ୱକପ ନୁହେଁ, ତା ସହିତ ବାସନ୍ଦାଦେଶ ମଧ୍ୟ ଆଣିଛି। ଏଆଇଏଫ୍ଏଫ୍ରେ ନିଜ ପଦବୀ ଆଧାରରେ ପଟେଲ ଫିଫାକୁ ନିର୍ବାଚିତ ହୋଇଛନ୍ତି। ତେଣୁ ସେ ଇସ୍ତଫା ଦେବା ଉଚିତ୍ ବୋଲି ଯୁକ୍ତି କରିଥିଲେ ଶଙ୍କର ନାରାୟଣନ୍। ଶିବଲ ଏହାକୁ ଖାରଜ କରିବା ସହ ସେ ନିର୍ବାଚିତ ସଦସ୍ୟ ହୋଇଥିବାରୁ ଇସ୍ତଫାର ପ୍ରଶ୍ନ ଉଠୁନାହିଁ ବୋଲି କହିଛନ୍ତି।
