ଭବାନୀପାଟଣା, ୨୩।୬(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଜୁନାଗଡ଼ ବ୍ଲକ ଅନ୍ତର୍ଗତ ଚିଚୈଗୁଡା ପ୍ୟାକ୍ସ ଅଧୀନ ନୂଆଗୁଡା ମଣ୍ଡିରେ ଧାନ କ୍ରୟକୁ ନେଇ ସାମ୍ନାକୁ ଆସିଛି ସଙ୍ଗିନ ଅନିୟମିତତା ଅଭିଯୋଗ। ଚାଷୀଙ୍କ ଟୋକନ ତାଲିକାରେ ଚଞ୍ଚକତା କରି ପଛରେ ଥିବା ଚାଷୀଙ୍କୁ ଆଗକୁ ଆଣି ଧାନ ବିକ୍ରି କରାଯାଇଥିବା ନେଇ ଅସନ୍ତୋଷ ତୀବ୍ର ହୋଇଛି।
ମଣ୍ଡିରେ ପ୍ରକାଶ ପାଇଥିବା ଚାଷୀ ତାଲିକାରୁ ଏହି ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ଚାଷୀମାନେ ପ୍ରତିବାଦ କରିଥିଲେ। ଚିଚୈଗୁଡା ପ୍ୟାକ୍ସର ସମ୍ପାଦକ କୁଳମଣି ମେହେରଙ୍କୁ ଏହି ଘଟଣାର ମାଷ୍ଟରମାଇଣ୍ଡ ବୋଲି ଅଭିଯୋଗ କରାଯାଇଥିବା ବେଳେ, ଡିଇଓ ଶକ୍ତି ମାଝୀ ତାଙ୍କୁ ସହଯୋଗ କରିଥିବା ମଧ୍ୟ ଚାଷୀମାନେ ଅଭିଯୋଗ କରିଛନ୍ତି।
ଉତ୍ତ୍ୟକ୍ତ ଚାଷୀମାନେ ମଣ୍ଡିରେ ପ୍ୟାକ୍ସ ସମ୍ପାଦକଙ୍କୁ ଘେରାଉ କରିବା ପରେ ସେ ଏହି ଅନିୟମିତତା ଘଟିଥିବା କଥା ସ୍ୱୀକାର କରିଥିବା ସହ ଏଥିପାଇଁ ଡିଇଓଙ୍କୁ ଦାୟୀ କରିଥିଲେ। ତେବେ ଏହା ତାଙ୍କ ଅଜାଣତରେ ଘଟିଥିବା ସେ କହିଥିବା ଜଣାପଡ଼ିଛି।
ଘଟଣାକୁ ନେଇ ନୂଆଗୁଡା ଗ୍ରାମର ଚାଷୀମାନେ ମଙ୍ଗଳବାର ଧର୍ମଗଡ଼ ଉପଜିଲାପାଳ ଏବଂ ଏଆରସିଏସଙ୍କ ନିକଟରେ ଫେରାଦ ହୋଇ ଲିଖିତ ଅଭିଯୋଗ ଦାଖଲ କରିଛନ୍ତି। ଏନେଇ ଏଆରସିଏସ କହିଛନ୍ତି ଯେ, ଘଟଣାର ତଦନ୍ତ କରାଯିବ ଏବଂ ଦୋଷୀଙ୍କ ବିରୋଧରେ ନିୟମାନୁସାରେ କଠୋର କାର୍ଯ୍ୟାନୁଷ୍ଠାନ ନିଆଯିବ।
ଘଟଣାକୁ ନେଇ ଚାଷୀମାନଙ୍କ ମଧ୍ୟରେ ଅସନ୍ତୋଷ ବଢ଼ିଥିବା ବେଳେ ମଣ୍ଡି ପରିଚାଳନାରେ ସ୍ୱଚ୍ଛତା ଓ ଜବାବଦେହିତା ନେଇ ପୁଣିଥରେ ପ୍ରଶ୍ନ ଉଠିଛି।
