ଯୋଡ଼ା,୨୦ା୮(ମାନସ ମହାନ୍ତି)କେନ୍ଦୁଝର ଜିଲା ଯୋଡ଼ା ସହରସ୍ଥିତ ଟାଟା ଷ୍ଟିଲ ଡାକ୍ତରଖାନାରେ ଡାକ୍ତରଙ୍କ ତ୍ରୁଟିପୂର୍ଣ୍ଣ ଚିକିତ୍ସା ଯୋଗୁ ଜଣେ ପ୍ରସୂତିଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ମୃତକ ଯୋଡ଼ା ପୌରାଞ୍ଚଳର ସ୍ବପ୍ନା ମୁଣ୍ଡା(୩୧)। ଏହାର ପ୍ରତିବାଦରେ ଡାକ୍ତରଖାନାରେ ଚାପା ଉତ୍ତେଜନା ଦେଖାଦେଇଛି। ମୃତକଙ୍କ ଆତ୍ମୀୟ ଘଟଣାର ଉପଯୁକ୍ତ ତଦନ୍ତ ସହ ଚିକିତ୍ସା ଦାୟିତ୍ୱରେ ଥିବା ଡାକ୍ତରଙ୍କୁ ବଦଳି ଦାବି କରିଛନ୍ତି। ଟାଟା ଷ୍ଟିଲ୍ କମ୍ପାନୀ କର୍ତ୍ତୃପକ୍ଷଙ୍କୁ ଲିଖିତ ଭାବେ ଜଣାଇଥିଲେ।
ଯୋଡ଼ା ପୌରପାଳିକାର ୧୦ ନଂ. ୱାର୍ଡ କାଉନ୍ସିଲର ପୂଜା ସିଂ ଆଲଦା ଅଭିଯୋଗ କରିଛନ୍ତି, ଗତ ଶନିବାର ତଥା ୧୨ ତାରିଖରେ ଗର୍ଭବତୀ ଥିବା ସ୍ବପ୍ନା ସ୍ବାସ୍ଥ୍ୟ ପରୀକ୍ଷା ପାଇଁ ଟାଟା ଷ୍ଟିଲ ଡାକ୍ତରଖାନାକୁ ଯାଇଥିଲେ। ସ୍ବାସ୍ଥ୍ୟ ପରୀକ୍ଷା କରିବା ପରେ ଅବସ୍ଥା ସ୍ବାଭାବିକ ଥିଲା। କିନ୍ତୁ ରକ୍ତଚାପ ଅଧିକ ଥିବା ଡାକ୍ତର କହିଥିଲେ। ପରେ ଡାକ୍ତରଙ୍କ ପରାମର୍ଶକ୍ରମେ ଡାକ୍ତରଖାନାରେ ଭର୍ତ୍ତି ହୋଇଥିଲେ। ଗତ ମଙ୍ଗଳବାର ଡାକ୍ତର ତାଙ୍କର ଅସ୍ତ୍ରୋପଚାର କରାଇଥିଲେ। ତାଙ୍କର ୨ ଯମଜ ସନ୍ତାନ ଜନ୍ମଲାଭ କରିଥିଲେ। ଦୁଇ ସନ୍ତାନଙ୍କ ସ୍ବାସ୍ଥ୍ୟ ଅବସ୍ଥା ଭଲ ଥିବା ବେଳେ ସ୍ବପ୍ନାଙ୍କ ଅବସ୍ଥା ବିଗିଡିବାରୁ ଡାକ୍ତର ତାଙ୍କୁ କଟକ ସ୍ଥାନାନ୍ତର କରିଥିଲେ। ପରେ ତାଙ୍କୁ ଟାଟାସ୍ଥିତ ଟିଏମ୍ଏଚ୍ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ତେବେ ସେଠାରେ ପ୍ରସୂତିଙ୍କ ମୃତ୍ୟୁ ଘଟିଥିବା ପରିବାର ଲୋକେ କହିଛନ୍ତି। ଚିକିତ୍ସାରେ ଅବହେଳା, ସଙ୍କଟାପନ୍ନ ଅବସ୍ଥା ସମ୍ପର୍କରେ ପରିବାର ଲୋକଙ୍କୁ ନ ଜଣାଇବା, ରକ୍ତଚାପ ଅଧିକ ଥିବା ସତ୍ତ୍ବେ କାହିଁକି ଅସ୍ତ୍ରୋପଚାର କରାଗଲା ତଥା ଡାକ୍ତରଙ୍କ ତ୍ରୁଟିପୂର୍ଣ୍ଣ ଚିକିତ୍ସା ଯୋଗୁ ମୃତ୍ୟୁ ଘଟିଥିବା ଅଭିଯୋଗ କରି ସ୍ଥାନୀୟ ଶତାଧିକ ମହିଳା, ପୁରୁଷଙ୍କ ସମେତ ପରିବାର ଲୋକେ ଶନିବାର ମେଡିକାଲରେ ପହଞ୍ଚତ୍ ପାଟିତୁଣ୍ଡ କରିଥିଲେ। ଯୋଡ଼ା ପୋଲିସ ପହଞ୍ଚତ୍ ଲୋକଙ୍କୁ ବୁଝାଶୁଝା କରିଥିଲା। ଅପରାହ୍ଣରେ କମ୍ପାନୀର ଏନ୍ଆର୍ଡି ଟାଟା ଷ୍ଟିଲ୍ ମୁଖ୍ୟ ସଞ୍ଜୟ ଭୂୟଁା, କାଉନ୍ସିଲର ପୂଜା ସିଂ ଆଲଦା, ପୂର୍ବତନ କାଉନ୍ସିଲର ସୁରେଶ ବାରିକ, ସନ୍ତୋଷ ବଳ, ଯୋଡ଼ା ଆଇଆଇସି ଜୟନାରାୟଣ ଖଣ୍ଡେଇ, ସ୍ଥାନୀୟ ଓ ପରିବାର ଲୋକଙ୍କୁ ନେଇ ଏକ ଆଲୋଚନା ହୋଇଥିଲା। ଦାବି ପୂରଣ ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବାର କମ୍ପାନୀ ପକ୍ଷରୁ ପ୍ରତିଶ୍ରୁତି ପରେ ପରିସ୍ଥିତି ଶାନ୍ତ ପଡ଼ିଥିଲା।
