ନୂଆଦିଲ୍ଲୀ, ୧୫।୭: ଭତ୍ତା ମାମଲାରେ ଆଲ୍ଲାହାବାଦ ହାଇକୋର୍ଟଙ୍କ ବଡ଼ ନିଷ୍ପତ୍ତି: ସ୍ୱାମୀଙ୍କ ଦରମାର ୨୫% ଦେବା ବାଧ୍ୟତାମୂଳକ ନୁହେଁ, ପରିସ୍ଥିତି ଅନୁସାରେ ବଦଳିପାରେ ରାଶି ଆଲ୍ଲାହାବାଦ ହାଇକୋର୍ଟ ଭରଣପୋଷଣ ସହ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ମାମଲାରେ ସ୍ପଷ୍ଟ କରିଛନ୍ତି ଯେ ପ୍ରତ୍ୟେକ ମାମଲାରେ ସ୍ୱାମୀଙ୍କ ଦରମାର ୨୫ ପ୍ରତିଶତ ଭତ୍ତା ଆକାରରେ ଦେବା ବାଧ୍ୟତାମୂଳକ ନୁହେଁ। ଜଷ୍ଟିସ ଅଚଲ ସଚଦେବ କହିଛନ୍ତି ଯେ ଏହା କେବଳ ଏକ ସାଧାରଣ ନିୟମ, ଯାହାକୁ ଅଦାଲତ ମାମଲାର ପରିସ୍ଥିତିକୁ ଦେଖି କମ୍ କିମ୍ବା ବେଶୀ କରିପାରିବେ। ପତ୍ନୀଙ୍କ ଆବଶ୍ୟକତା ଆଧାରରେ ଭତ୍ତା ସ୍ଥିର କରିବାର ଅଧିକାର କୋର୍ଟଙ୍କ ପାଖରେ ରହିଛି।
ସୂଚନାଯୋଗ୍ୟ ଯେ, କାନପୁର ଦେହାତର ଏକ ଦମ୍ପତିଙ୍କ ମାମଲାର ଶୁଣାଣି କରି କୋର୍ଟ ପତ୍ନୀଙ୍କୁ ମିଳୁଥିବା ମାସିକ ଭତ୍ତାକୁ ୧୨ ହଜାର ଟଙ୍କାରୁ ବଢ଼ାଇ ୨୦ ହଜାର ଟଙ୍କା କରିଦେଇଛନ୍ତି।
ଏହି ମାମଲା କାନପୁର ଦେହାତର ବାସିନ୍ଦା ପିଙ୍କି ଓରଫ୍ ପ୍ରୀତି ଏବଂ ତାଙ୍କ ସ୍ୱାମୀ ଜୟ ପ୍ରକାଶଙ୍କ ସହ ଜଡ଼ିତ। ଫ୍ୟାମିଲି କୋର୍ଟ ପତ୍ନୀଙ୍କୁ ୧୨ ହଜାର ଟଙ୍କା ଗୁଜୁରା ଭତ୍ତା ଦେବାକୁ ନିର୍ଦ୍ଦେଶ ଦେଇଥିଲେ। ଅନ୍ୟପଟେ, ପତ୍ନୀ ଏହି ରାଶି ବଢ଼ାଇବା ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହାକୁ ନେଇ ସ୍ୱାମୀ ମଧ୍ୟ ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରିଥିଲେ। ମାମଲାର ଶୁଣାଣି ପରେ ଆଲ୍ଲାହାବାଦ ହାଇକୋର୍ଟ ଭରଣପୋଷଣ ରାଶିକୁ ବଢ଼ାଇ ମାସିକ ୨୦ ହଜାର ଟଙ୍କା କରିଦେଇଛନ୍ତି।
ଜଷ୍ଟିସ ଅଚଲ ସଚଦେବଙ୍କ ପୀଠ କହିଛନ୍ତି ଯେ ସୁପ୍ରିମକୋର୍ଟଙ୍କ ନିଷ୍ପତ୍ତି ଅନୁସାରେ, ସ୍ୱାମୀ-ସ୍ତ୍ରୀ ଅଲଗା ହେବା ପରେ ପତ୍ନୀଙ୍କ ଭରଣପୋଷଣ ପାଇବାର ଅଧିକାର ଶେଷ ହୋଇଯାଏ ନାହିଁ, ଯଦି ସେ ନିଜେ ରୋଜଗାର କରିବାକୁ ସକ୍ଷମ ନୁହନ୍ତି କିମ୍ବା ପୁନର୍ବାର କାହାକୁ ବିବାହ କରିନାହାନ୍ତି। ଏହାସହ ସେ ଆଗକୁ କହିଛନ୍ତି ଯେ, ଭରଣପୋଷଣ ଭତ୍ତା ପତ୍ନୀଙ୍କୁ କେବଳ ବଞ୍ଚାଇ ରଖିବା ପାଇଁ ନୁହେଁ, ବରଂ ସମ୍ମାନର ସହ ଜୀବନ ଜିଇଁବା ପାଇଁ ଦିଆଯାଇଥାଏ।
କୋର୍ଟ ସ୍ପଷ୍ଟ କରିଛନ୍ତି ଯେ ସ୍ୱାମୀଙ୍କ ଦରମାରୁ ୨୫% ଭତ୍ତା ଦେବା ଏକ ସାଧାରଣ କଥା, ଯାହାକୁ ଆବଶ୍ୟକତା ଅନୁସାରେ କମ୍ କିମ୍ବା ବେଶୀ କରାଯାଇପାରିବ। କାରଣ ଏହି ମାମଲାରେ ସାମ୍ନାକୁ ଆସିଛି ଯେ ସ୍ୱାମୀଙ୍କ ମୋଟ ଦରମା ୮୬,୬୭୪ ଟଙ୍କା ଏବଂ କଟାକଟି ପରେ ସେ ୬୭,୦୪୩ ଟଙ୍କା ପାଉଛନ୍ତି। ନିମ୍ନ ଅଦାଲତ ତଥ୍ୟକୁ ସଠିକ୍ ଭାବେ ନଦେଖି ଭତ୍ତା ସ୍ଥିର କରିଦେଇଥିଲେ।
ସୂଚନା ଅନୁସାରେ, ସୁପ୍ରିମକୋର୍ଟଙ୍କ ନିୟମ ମୁତାବକ ସ୍ୱାମୀ ନିଜ ସମ୍ପତ୍ତି ଏବଂ ଦେୟତାର (Assets and Liabilities) ସତ୍ୟପାଠ (Affidavit) ମଧ୍ୟ ଦାଖଲ କରିନଥିଲେ। ଏହି କାରଣରୁ ହାଇକୋର୍ଟ ଜୁଲାଇ ୧୦ରେ ଦେଇଥିବା ନିଜ ନିଷ୍ପତ୍ତିରେ ପତ୍ନୀଙ୍କ ଭରଣପୋଷଣ ଭତ୍ତା ବଢ଼ାଇ ଦେଇଛନ୍ତି, ଯଦ୍ୱାରା ପତ୍ନୀ ସହଜରେ ଏବଂ ସମ୍ମାନର ସହ ନିଜ ଜୀବନ ଅତିବାହିତ କରିପାରିବେ।
