ଅଲ ଆମେରାତ,୧୭।୧୦: ଟି୨୦ ବିଶ୍ୱକପ୍ ଆରମ୍ଭରୁ ବିପର୍ଯ୍ୟୟ ଘଟିଛି। ବାଂଲାଦେଶକୁ ୬ ରନ୍ରେ ହରାଇ ଦେଇଛି ଦୁର୍ବଳ ସ୍କଟଲାଣ୍ଡ। ୧୪୧ ରନ୍ର ବିଜୟ ଲକ୍ଷ୍ୟ ନେଇ ଓହ୍ଲାଇଥିବା ବାଂଲାଦେଶ ୭ ଉଇକେଟ ହରାଇ ୧୩୪ ରନ୍ କରିବାକୁ ସକ୍ଷମ ହୋଇଥିଲା। ଏହି ବିପର୍ଯ୍ୟୟ ପାଇଁ ସ୍କଟଲାଣ୍ଡର ଫିଲ୍ଡରଙ୍କ ସହିତ ଉଭୟ ବ୍ୟାଟ ଓ ବଲରେ ପ୍ରଦର୍ଶନ କରିଥିବା କ୍ରିସ ଗ୍ରେଭେସଙ୍କୁ ଶ୍ରେୟ ଦେବାକୁ ପଡ଼ିବ।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ସ୍କଟଲାଣ୍ଡ ଆରମ୍ଭରୁ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଏପରି କି ଦଳ ମାତ୍ର ୫୩ ରନ୍ରେ ହରାଇ ସାରିଥିଲା ୬ ଉଇକେଟ। କିନ୍ତୁ ଗ୍ରେଭେସଙ୍କ ସହ ମାର୍କ ଓ୍ବାଟ (୨୨) ମିଶି ୭ମ ଉଇକେଟ ପାଇଁ ୫୧ ରନ୍ ଯୋଡ଼ିଥିଲେ। ଗ୍ରେଭେସ ୨୮ ବଲରେ ଖେଳିଥିଲେ ୪୫ ରନ୍ର ବିସ୍ଫୋରକ ପାଳି। ତାଙ୍କ ଇନିଂସରେ ସାମିଲ ଥିଲା ୪ ଚୌକା ଓ ୨ ଛକା। ଫଳରେ ୨୦ ଓଭରରେ ୯ ଉଇକେଟ ହରାଇ ୧୪୦ ରନ୍ କରିଥିଲା।
ଜବାବରେ ବାଂଲାଦେଶ ୧୮ ରନ୍ ମଧ୍ୟରେ ଦୁଇ ଓପନରଙ୍କ ଉଇକେଟ ହରାଇବା ପରେ ଶାକିବ ଅଲ ହାସନ (୨୦) ଓ ମୁଶଫିକର ରହିମ (୩୮) ସ୍ଥିତି ସମ୍ଭାଳି ଥିଲେ। ମାତ୍ର ଦୁହିଁଙ୍କୁ ପ୍ୟାଭିଲିଅନ ପଠାଇଥିଲେ ଗ୍ରେଭେସ। ଅଧିନାୟକ ମେହମ୍ମୁଦୁଲା ୨୩ ଓ ଅଫିଫ ହୋସେନ (୧୮)ଙ୍କ ଯୋଗଦାନ ସତ୍ତ୍ୱେ ବାଂଲାଦେଶ ବିଜୟ ଲକ୍ଷ୍ୟଠାରୁ ୭ ରନ୍ ଦୂରରେ ରହି ଯାଇଥିଲା। ବିଜୟୀ ଦଳ ପାଇଁ ବ୍ରାଡଲି ୩ ଉଇକେଟ ନେଇଥିବା ବେଳେ ଗ୍ରେଭେସ ୨ ଉଇକେଟ ହାତେଇଥିଲେ।
