ନୂଆଦିଲ୍ଲୀ, ୧୧।୮: ଗତ କିଛି ସପ୍ତାହ ଧରି ଅଜିଙ୍କ୍ୟ ରାହାଣେ ବେଶ ଚର୍ଚ୍ଚାରେ ଅଛନ୍ତି। ଗତ ଜୁଲାଇ ୩୦ ତାରିଖରେ ସେ ଅବସର ଘୋଷଣା କରିଥିଲେ। ଏହାସହ ତାଙ୍କର ୧୦ ବର୍ଷିୟ ଅନ୍ତର୍ଜାତୀୟ କ୍ୟାରିଅରର ଅନ୍ତ ଘଟିଛି। ଏହାପରଠାରୁ ରାହାଣେ ବେଶ ସକ୍ରିୟ ଅଛନ୍ତି। ସେ କ୍ରମାଗତ ଭାବରେ ସାକ୍ଷାତକାର ଦେଉଛନ୍ତି। ସେ ନିଜ କ୍ୟାରିଅରକୁ ନେଇ କିଛି ବଡ଼ ଖୁଲାସା ମଧ୍ୟ କରିଛନ୍ତି। ବର୍ତ୍ତମାନ ରାହାଣେ କହିଛନ୍ତି ଯେ ତାଙ୍କ ଅବସର ନିଷ୍ପତ୍ତି ଉପରେ କ୍ରିକେଟ ଜଗତର ଦିଗ୍ଗଜ ସଚିନ ତେନ୍ଦୁଲକରଙ୍କ ପ୍ରତିକ୍ରିୟା କ’ଣ ଥିଲା। ରାହାଣେ କହିଛନ୍ତି ଯେ ଅବସରର କିଛି ସମୟ ପରେ ତେନ୍ଦୁଲକର ତାଙ୍କୁ ଫୋନ କରିଥିଲେ। ସଚିନ ତାଙ୍କୁ କହିଥିଲେ ଯେ ସେ ଆଶା କରିଥିଲେ ଯେ ରାହାଣେ ଆହୁରି କିଛି ସମୟ ପାଇଁ ଖେଳିବେ।
ଅଜିଙ୍କ୍ୟ ରାହାଣେ ନିକଟରେ ଏକ ସାକ୍ଷାତକାର ଦେଇଛନ୍ତି। ସେଠାରେ ସେ କହିଛନ୍ତି ଯେ ଅବସର ପରେ ସର୍ବପ୍ରଥମେ ତାଙ୍କ ପାଖକୁ ସଚିନ ତେନ୍ଦୁଲକରଙ୍କ ଫୋନ ଆସିଥିଲା। ରାହାଣେ କହିଛନ୍ତି, ସର୍ବପ୍ରଥମେ ସଚିନ ତେନ୍ଦୁଲକରଙ୍କ ଫୋନ ମୋ ପାଖକୁ ଆସିଥିଲା। ସେ କହିଥିଲେ ଯେ ତାଙ୍କୁ ଲାଗିଥିଲା ମୁଁ ଆହୁରି ଅଧିକ ଦିନ ଧରି ଖେଳିବି। ମୁଁ ତାଙ୍କୁ କହିଲି ଯେ ମୁଁ ବର୍ତ୍ତମାନ ଏହାକୁ ଆଉ ଅଧିକ ଦିନ ବଢ଼ାଇବାକୁ ଚାହେଁ ନାହିଁ, କାରଣ ମୁଁ କୌଣସି ପଶ୍ଚାତାପ ବିନା ଅବସର ନେଉଛି। ଇରଫାନ ପଠାନ ମଧ୍ୟ ମୋତେ କଲ କରିଥିଲେ। ପୂଜାରା, ବିରାଟ କୋହଲି, ରୋହିତ ଶର୍ମା ଏବଂ ଜସପ୍ରୀତ ବୁମରା ମୋତେ ମେସେଜ କରିଥିଲେ। ମୁଁ ସମସ୍ତଙ୍କୁ ଗୋଟିଏ କଥା କହିଲି ଯେ ମୁଁ ସନ୍ତୁଷ୍ଟ ଅଛି, କାରଣ ମୁଁ ଖେଳିବା ପାଇଁ ନିଜର ସର୍ବସ୍ବ ଦେଇସାରିଛି।
