ନୂଆଦିଲ୍ଲୀ,୮।୧୦ : ଭାଜପା ପକ୍ଷରୁ ଦିଲ୍ଲୀର ଏଏପି ସରକାରଙ୍କ ସମାଜ କଲ୍ୟାଣ ମନ୍ତ୍ରୀ ରାଜେନ୍ଦ୍ର ପାଲ ଗୌତମଙ୍କ ବିରୋଧରେ ହିନ୍ଦୁ ଦେବଦେବୀଙ୍କ ଅପମାନ କରିଥିବା ନେଇ ଅଭିଯୋଗ ଅଣାଯାଇଛି। ରାଜଧାନୀ ଦିଲ୍ଲୀରେ ଏକ ଧର୍ମାନ୍ତରଣ କାର୍ଯ୍ୟକ୍ରମର ଭିଡ଼ିଓ ଶେୟାର କରି ଭାଜପା ଗୌତମଙ୍କୁ ଘେରିବା ଆରମ୍ଭ କରିଛି।
ପଶ୍ଚିମ ଦିଲ୍ଲୀର ଭାଜପା ଏମ୍ପି ପ୍ରବେଶ ବର୍ମା ଅଭିଯୋଗ କରିଛନ୍ତି ଯେ ୨୦୨୫ ଅକ୍ଟୋବର ସୁଦ୍ଧା ୧୦ କୋଟି ହିନ୍ଦୁଙ୍କୁ ବୌଦ୍ଧ କରାଇବା ପାଇଁ ଗୌତମ ଲକ୍ଷ୍ୟ ରଖିଛନ୍ତି। ଏହି ପୁରୁଣା ଭିଡ଼ିଓ ନେଇ ପ୍ରବେଶ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କୁ ପ୍ରଶ୍ନ କରିଛନ୍ତି ଯେ, ଆପଣଙ୍କ ନିର୍ଭରଯୋଗ୍ୟ ମନ୍ତ୍ରୀଙ୍କ ଦ୍ୱାରା ଧର୍ମାନ୍ତରଣ କାର୍ଯ୍ୟ କାହା ନିର୍ଦ୍ଦେଶରେ କରାଯାଉଛି। ଏଥିରେ ବିଦେଶୀ ଏଜେନ୍ସିର ହାତ ରହିଛି କି ବୋଲି ସେ ପଚାରିଛନ୍ତି।
ଶେୟାର ହୋଇଥିବା ଭିଡ଼ିଓରେ କାର୍ଯ୍ୟକ୍ରମରେ ଯୋଗଦେଇଥିବା ଲୋକଙ୍କୁ ବୁଦ୍ଧଙ୍କୁ ଅନୁସରଣ କରିବା ସହିତ ହିନ୍ଦୁ ଦେବୀଦେବତାଙ୍କ ପୂଜା ନ କରିବାକୁ ଶିକ୍ଷା ଦିଆଯାଉଥିବାର ଦେଖିବାକୁ ମିଳୁଛି।
ଏହି କାର୍ଯ୍ୟକ୍ରମର ଫଟୋ ଗୌତମ ଅକ୍ଟୋବର ୫ରେ ଟୁଇଟରରେ ଶେୟାର କରିଥିଲେ। ସମାଜରୁ ଛୁଆଁ ଅଛୁଆଁ ଭେଦଭାବ ଦୂର କରିବା ଲାଗି ୧୦ ହଜାରରୁ ଅଧିକ ଲୋକ ବୌଦ୍ଧ ଗ୍ରହଣ କରିବାକୁ ସଂକଳ୍ପ ନେଇଥିବା ସେ ଟୁଇଟ କରିଥିଲେ।
