ୱାଶିଂଟନ,୨୭ା୭: ଶନି ଗ୍ରହର ସୃଷ୍ଟି, ଏହାର ଚାରିପାଖରେ ଥିବା ବିଶାଳ ବଳୟ ଏବଂ ବ୍ରହ୍ମାଣ୍ଡରେ ଗ୍ରହଗୁଡ଼ିକର ବିକାଶ ସମ୍ପର୍କରେ ଲୁଚି ରହିଥିବା ଅନେକ ରହସ୍ୟର ପର୍ଦ୍ଦାଫାଶ କରିବା ପାଇଁ ନାସା ଅଭିନବ ମହାକାଶ ଅଭିଯାନ ପାଇଁ ଯୋଜନା ପ୍ରସ୍ତୁତ କରୁଛି। ‘ପ୍ରକ୍ସିସ୍’ ନାମକ ଏହି ପ୍ରସ୍ତାବିତ ମିଶନ ମାଧ୍ୟମରେ ମହାକାଶ ବିଜ୍ଞାନୀମାନେ ପ୍ରଥମଥର ପାଇଁ ଶନି ଗ୍ରହର ବଳୟରୁ ସିଧାସଳଖ କଣିକା (ରିଙ୍ଗ୍ ପ୍ରାଟିକଲ୍) ସଂଗ୍ରହ କରି ଅନୁଧ୍ୟାନ କରିବେ। ପୂର୍ବରୁ ନାସାର ‘କାସିନି’ ମିଶନ ଶନି ଗ୍ରହ ସମ୍ପର୍କରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଥିଲେ ହେଁ ବଳୟଗୁଡ଼ିକର ଗଠନ, ଗତିଶୀଳତା ଏବଂ କ୍ରମବିକାଶ ସମ୍ପର୍କରେ ଅନେକ ପ୍ରଶ୍ନର ଉତ୍ତର ଏପର୍ଯ୍ୟନ୍ତ ମିଳିପାରିନାହିଁ। ଶନିର ବଳୟଗୁଡ଼ିକ ମୁଖ୍ୟତଃ ବରଫ ଓ ଛୋଟଛୋଟ କଣିକାରୁ ଆରମ୍ଭ କରି ବଡ଼ ବଡ଼ ପଥରଖଣ୍ଡ ଦ୍ୱାରା ଗଠିତ, ଯାହାକି ସର୍ବଦା ଗତିଶୀଳ ଏବଂ ନିଜ ନିଜ ମଧ୍ୟରେ ଧକ୍କା ହୋଇ ସୃଷ୍ଟି ଓ ଭାଙ୍ଗି ଚାଲିଛନ୍ତି।
‘ପ୍ରକ୍ସିସ୍’ ମିଶନ୍ରେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ପରିଚାଳିତ ରୋବୋଟିକ୍ ଏକ୍ସପ୍ଲୋରର ବ୍ୟବହାର କରାଯିବ। ବଳୟ ମଧ୍ୟରେ ଥିବା କଣିକାଗୁଡ଼ିକ କ୍ରମାଗତ ଭାବେ ଗତି କରୁଥିବାରୁ, ମହାକାଶ ଯାନଟି ଏକ ସୁରକ୍ଷିତ ଦୂରତାରେ ରହିବ। ଇମେଜିଂ ମାଧ୍ୟମରେ ଉପଯୁକ୍ତ କଣିକା ଚିହ୍ନଟ କରିବା ପରେ ଏକ ଲମ୍ବା ଓ ନମନୀୟ ବୁମ୍ ସାହାଯ୍ୟରେ କଣିକାକୁ ‘ଟଚ୍-ଆଣ୍ଡ୍-ଗୋ’ ପଦ୍ଧତିରେ ସଂଗ୍ରହ କରାଯିବ। ମହାକାଶରେ ଭାସୁଥିବା ମିଲିମିଟରରୁ ସେଣ୍ଟିମିଟର ଆକାରର କଣିକାଗୁଡ଼ିକୁ ଧରିବା ପାଇଁ ସ୍ପୋର୍ଟସ କାଷ୍ଟିଂ ଦ୍ୱାରା ଅନୁପ୍ରାଣିତ ଫ୍ରି-ଫ୍ଲୋଟିଂ କ୍ୟାପ୍ଚର୍ ପ୍ରଯୁକ୍ତି ବ୍ୟବହାର ହେବ। ସଂଗୃହୀତ କଣିକାର ଆକାର, ସାନ୍ଧ୍ରତା ଏବଂ ସଂରଚନା ସମ୍ପର୍କରେ ଘଟଣାସ୍ଥଳରେ ହିଁ (ରିୟଲ-ଟାଇମ୍) ଅନୁଧ୍ୟାନ କରାଯିବ। ଗୋଟିଏ ସ୍ଥାନରୁ ନମୁନା ସଂଗ୍ରହ
ପରେ ସିଷ୍ଟମ୍ଟି ବଳୟର ଅନ୍ୟ ଏକ ଭାଗ କିମ୍ବା ଫାଙ୍କକୁ ଯାଇ ଭିନ୍ନ ଅଞ୍ଚଳର କଣିକା ପରୀକ୍ଷା କରିବ। ମହାକାଶ ବିଜ୍ଞାନୀମାନଙ୍କ ମତରେ, ଏହି ମିଶନ ସଫଳ ହେଲେ କେବଳ ଶନି ଗ୍ରହ ନୁହେଁ, ବରଂ ୟୁରେନ୍ସ, ନେପଚୁନ୍ ଏବଂ ମହାକାଶରେ ସୌରମଣ୍ଡଳ ସୃଷ୍ଟି ହେବା ସମୟର ପ୍ରାରମ୍ଭିକ ଡିସ୍କ୍ଗୁଡ଼ିକ ବିଷୟରେ ବୁଝିବାରେ ନୂତନ ଦିଗ ଆବିଷ୍କୃତ ହୋଇପାରିବ। ଭବିଷ୍ୟତରେ ଆସୁଥିବା ୟୁରେନ୍ସ ପ୍ରୋବ୍ ମିଶନ ପାଇଁ ମଧ୍ୟ ଏହି ପ୍ରଯୁକ୍ତି ସହାୟକ ହେବ।
