ନୂଆଦିଲ୍ଲୀ,୧୯।୮: କଂଗ୍ରେସରେ ପୂର୍ଣ୍ଣକାଳୀନ ଅଧ୍ୟକ୍ଷ ପାଇଁ ଦାବି ଜୋର ଧରିଛି। ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ପଦ ଛାଡିବା ପରେ ଆଗାମୀ ଦିନରେ କଂଗ୍ରେସର ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା କଂଗ୍ରେସର ମଙ୍ଗ ଧରିବେ ବୋଲି କଳ୍ପନା ଜଳ୍ପନା ଲାଗି ରହିଥିଲା। କିନ୍ତୁ ସବୁ କଳ୍ପନା ଜଳ୍ପନାର ଅନ୍ତ ଘଟିଛି। କାରଣ ପ୍ରିୟଙ୍କା ଗାନ୍ଧୀ ସ୍ପଷ୍ଟ କରିଛନ୍ତି ଯେ, ରାହୁଲ ହିଁ ତାଙ୍କର ନେତା। ଏକ ସାକ୍ଷାତକାରରେ ପଚରାଯାଇଥିବା ପ୍ରଶ୍ନର ଉତ୍ତରରେ ପ୍ରିୟଙ୍କା କହିଛନ୍ତି, ଆଗାମୀ ଭବିଷ୍ୟତରେ ବି କଂଗ୍ରେସ ମଙ୍ଗ ସମ୍ଭାଳିବା ଦୌଡ଼ରେ ସେ ନାହାନ୍ତି। ବର୍ତ୍ତମାନ ସେ ଉତ୍ତରପ୍ରଦେଶରେ ଦଳକୁ ଶକ୍ତିଶାଳୀ କରିବାରେ ଫୋକସ୍ କରୁଛନ୍ତି। ଯଦି ଗାନ୍ଧୀ ପରିବାର ବାହାରୁ ବି କେହି ନେତା ହୁଅନ୍ତି ତେବେ ତାଙ୍କ ଅଧିନରେ କାମ କରିବାକୁ ସେ ପ୍ରସ୍ତୁତ ଅଛନ୍ତି ବୋଲି ପ୍ରିୟଙ୍କା କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, କଂଗ୍ରେସ ଅଧ୍ୟକ୍ଷ ପଦରୁ ରାହୁଲଙ୍କୁ ଇସ୍ତଫା ଦେବା ନିଷ୍ପତ୍ତିକୁ ଏବଂ ଗାନ୍ଧୀ ପରିବାର ବାହାରୁ କେହି ଅଧ୍ୟକ୍ଷ ହେବା ପରାମର୍ଶକୁ ସେ ସମ୍ମାନ କରନ୍ତି। ରାହୁଲ ଆମର ନେତା ଥିଲେ ଓ ରହିବେ ବୋଲି ପ୍ରିୟଙ୍କା କହିଛନ୍ତି।
