ବରଗଡ଼,୨୯।୮(ପ୍ରେମାନନ୍ଦ ଖମାରୀ):ବରଗଡ଼ ସହର ଉପକଣ୍ଠ ଟୁକୁର୍ଲା(ଖେଦାପାଲି)ସ୍ଥିତ ଜିଲା ମୁଖ୍ୟ ଡାକ୍ତରଖାନାର ଆବର୍ଜନା ନିକଟସ୍ଥ ଜଳାଶୟକୁ ପଶିବା ଘଟଣାକୁ ନେଇ ଅସନ୍ତୋଷ ଲାଗି ରହିଛି। ଏହାର ପ୍ରତିବାଦରେ ସୋମବାର ଟୁକୁର୍ଲା ଗ୍ରାମବାସୀ ଜିଲା ମୁଖ୍ୟ ଡାକ୍ତରଖାନା ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ। ତେବେ ଗ୍ରାମବାସୀଙ୍କ ବିକ୍ଷୋଭ ପରେ ଏହାର ପ୍ରତିକାର ପାଇଁ ପ୍ରଶାସନିକ ତପତ୍ରତା ପ୍ରକାଶ ପାଇଛି। ଏହି କ୍ରମରେ ବୁଧବାର ଜିଲାପାଳ ଆଦିତ୍ୟ ଗୋୟଲଙ୍କ ନିର୍ଦ୍ଦେଶକ୍ରମେ ଏକ ଟିମ୍ ଘଟଣାସ୍ଥଳକୁ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ଉକ୍ତ ଟିମ୍ରେ ସ୍ବାସ୍ଥ୍ୟ, ପୂର୍ତ୍ତ ଏବଂ ରାଜସ୍ବ ବିଭାଗର ଅଧିକାରୀମାନେ ଥିଲେ। ଏହି ଟିମ୍ ସ୍ଥିତି ଅନୁଧ୍ୟାନ କରି ଗ୍ରାମବାସୀଙ୍କ ସହିତ ଆଲୋଚନା କରିଥିଲେ। ସେହି ସମସ୍ୟାର ପ୍ରତିକାର ବ୍ୟବସ୍ଥା ସକାଶେ ନିର୍ଭର ପ୍ରତିଶ୍ରୁତି ଦେଇଥିଲେ।
ପ୍ରକାଶ ଯେ, ଜିଲା ମୁଖ୍ୟ ଡାକ୍ତରଖାନାର ଅନତିଦୂରରେ ଏକ ଜଳାଶୟ ରହିଛି। ଏହି ଜଳାଶୟ ଉପରେ ଟୁକୁର୍ଲା ଗ୍ରାମବାସୀ ନିର୍ଭର କରିଥାନ୍ତି। ପୂଜାପାଠ ପାଇଁ ପାଣି ସଂଗ୍ରହ କରିବାଠାରୁ ଆରମ୍ଭ କରି ସ୍ନାନ ପାଇଁ ଜଳାଶୟ ପାଣି ବ୍ୟବହାର କରିଥାନ୍ତି। କିନ୍ତୁ ନୂତନ ଜିଲା ମୁଖ୍ୟ ଡାକ୍ତରଖାନା କାର୍ଯ୍ୟକ୍ଷମ ହେବା ପରେ ଜଳାଶୟ ସମସ୍ୟା ବଢ଼ି ଯାଇଛି। ଡାକ୍ତରଖାନାରୁ ନିର୍ଗତ ଦୂଷିତ ପାଣି ସହିତ ଆବର୍ଜନା ଉକ୍ତ ଜଳାଶୟକୁ ପଶୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ତେବେ ପ୍ରଶାସନ ପାଖରେ ଏଭଳି ଅଭିଯୋଗ ବାରମ୍ବାର କରିବା ସତ୍ତ୍ୱେ କିଛି ପଦକ୍ଷେପ ନିଆଯାଉ ନ ଥିବା ପ୍ରତିବାଦରେ ଗ୍ରାମବାସୀ ସୋମବାର ମୁଖ୍ୟ ଡାକ୍ତରଖାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ।
ମୁଖ୍ୟ ଡାକ୍ତରଖାନାରେ ଗ୍ରାମବାସୀଙ୍କ ବିକ୍ଷୋଭ ଜାରି ରହିଥିବାବେଳେ ଜିଲାପାଳ ଗୋୟଲଙ୍କ ସମେତ ବରଗଡ଼ ଏମ୍ପି ପ୍ରଦୀପ ପୁରୋହିତ, ବରଗଡ଼ ବିଧାୟକ ଅଶ୍ୱିନୀ ଷଡ଼ଙ୍ଗୀ ଏବଂ ଅତାବିରା ବିଧାୟକ ନିହାର ରଞ୍ଜନ ମହାନନ୍ଦ ପ୍ରମୁଖ ସେଠାକୁ ସିଟିସ୍କାନ ମେଶିନ ଲୋକାର୍ପଣ ସମାରୋହରେ ଯୋଗଦେବା ପାଇଁ ପହଞ୍ଚିଥିଲେ। ବିକ୍ଷୋଭକାରୀ ସେତେବେଳେ ସେହି ସମସ୍ୟା ଜିଲାପାଳ ଏବଂ ଉପସ୍ଥିତ ଜନ ପ୍ରତିନିଧିଙ୍କ ଦୃଷ୍ଟି ଆକର୍ଷଣ କରିଥିଲେ। ତେବେ ଡାକ୍ତରଖାନା ଆବର୍ଜନା ଟ୍ରିଟମେଣ୍ଟ ପ୍ଲାଣ୍ଟ ପାଇଁ ସରକାର ୪କୋଟି ମଞ୍ଜୁର କରି ସାରିଥିବା ସୂଚନା ପାଇବା ପରେ ଆନ୍ଦୋଳନରୁ ସେତେବେଳେ ଗ୍ରାମବାସୀ ଓହରିଥିଲେ।
