କୁଚିଣ୍ଡା,୯ା୫(ଡି.ଏନ.ଏ.): କୁଚିଣ୍ଡା ବ୍ଲକ ଅଞ୍ଚଳରେ ବ୍ୟାରେଜ ନିର୍ମାଣ ଆଳରେ ଆର୍ଏସ୍ଏ କମ୍ପାନୀ ବେଆଇନ କାମ କରୁଥିବା ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା। ଏପରି କି ଖବରଦାତାମାନେ କୁଚିଣ୍ଡା ଉପଜିଲାପାଳଙ୍କଠାରେ ଅଭିଯୋଗ କରିଥିଲେ। ଏହାପରେ ଉପଜିଲାପାଳଙ୍କ ନିର୍ଦ୍ଦେଶରେ ତଦନ୍ତ ଆରମ୍ଭ ହୋଇଛି।
ପ୍ରକାଶ ଯେ, କୁଚିଣ୍ଡା ତହସିଲ ଅଧୀନରେ ଥିବା ଗୋଛରା ପଞ୍ଚାୟତର ଜନକଡିହି, କୁଲେଇଗଡ ପଞ୍ଚାୟତର ବୁଢ଼ାରଜା ଓ କୁଟୁରାଚୁଆଁ ପଞ୍ଚାୟତର କିରାଶାସନଠାରେ ଆରଏସ୍ଏ କମ୍ପାନୀ ପ୍ରାୟ ଶହେ କୋଟିରୁ ଊର୍ଦ୍ଧ୍ୱ ଟଙ୍କା ବିନିମୟରେ ତିନୋଟି ବ୍ୟାରେଜ ନିର୍ମାଣ କରୁଛି। ଏଥିପାଇଁ କମ୍ପାନୀ ତିନିଗୋଟି ସ୍ଥାନରେ ପ୍ରଶାସନର ବିନା ଅନୁମତିରେ ହଜାର ହଜାର ଟ୍ରିପ୍ ବାଲି ଜମା କରି ରଖିଛି। ସେହିପରି ଜନକଡିହିଠାରେ ବ୍ଲାଷ୍ଟିଂ କରି ପଥର ଫଟାଇବା ପରେ ଏହାକୁ ସରକାରଙ୍କଠାରେ ଜମା ନ କରି ଏକ ଅସ୍ଥାୟୀ କ୍ରଶର ଦ୍ୱାରା ଫଟାଇ ଗେଟି ପ୍ରସ୍ତୁତ କରି ନିର୍ମାଣ କାମରେ ବ୍ୟବହାର କରୁଛି। ବୁଢ଼ାରଜା ଠାରେ ମଧ୍ୟ କମ୍ପାନୀ ବ୍ଲାଷ୍ଟିଂ କରି ଫଟାଇଥିବା ପଥରକୁ କ୍ରଶର ସାହାଯ୍ୟରେ ଗେଟି ପ୍ରସ୍ତୁତ କରି ଜମା କରି ରଖିଛି। କିରାଶାସନଠାରେ ବ୍ୟାରେଜ ନିର୍ମାଣ ପାଇଁ କମ୍ପାନୀ ଲସାଠାରେ ମଧ୍ୟ ଶହ ଶହ ଟ୍ରିପ୍ ବାଲି ଓ ଗେଟି ଜମା କରି ରଖିଛି। କମ୍ପାନୀର ଏପରି ବେଆଇନ କାର୍ଯ୍ୟ ଦ୍ୱାରା ସରକାରଙ୍କ କୋଟି କୋଟି ଟଙ୍କାର ରାଜସ୍ବ ହାନି ହେଉଛି। ଏ ସମ୍ପର୍କୀତ ଖବର ବିଭିନ୍ନ ଗଣମାଧ୍ୟମରେ ପ୍ରକାଶିତ ହେବା ପରେ ତଦନ୍ତ ଆରମ୍ଭ ହୋଇଛି। ମଙ୍ଗଳବାର ଉପଜିଲାପାଳ ବିଭୂତି ଭୂଷଣ ନାୟକ, ବିଡ଼ିଓ ନିରଞ୍ଜନ ସା ଏବଂ ସହକାରୀ ଜିଲାପାଳ ଭାସ୍କର ଚନ୍ଦ୍ର ବେହେରା ପ୍ରମୁଖ କମ୍ପାନୀ କାମ କରୁଥିବା ବୁଢ଼ାରଜା, ଲସା ଓ ଜନକଡ଼ିହିକୁ ଯାଇ ତଦନ୍ତ କରିଛନ୍ତି। ପ୍ରାରମ୍ଭିକ ତଦନ୍ତରେ କମ୍ପାନୀ ବେଆଇନ କାର୍ଯ୍ୟ କରୁଥିବା, ଆବଶ୍ୟକ କାଗଜପତ୍ର ଦେଖାଇ ନ ପାରିବାରୁ ଉପଜିଲାପାଳଙ୍କ ନିର୍ଦ୍ଦେଶରେ ବାମରା ତହସିଲଦାର ଏବଂ ବିଡ଼ିଓ, କୁଚିଣ୍ଡା ବିଡ଼ିଓ ଏବଂ ଜମନକିରା ତହସିଲଦାରଙ୍କୁ ନେଇ ଏକ ଚରିଜଣିଆ ଟିମ ଗଠନ କରି କମ୍ପାନୀର କାର୍ଯ୍ୟକଳାପ ସମ୍ପର୍କରେ ଯାଞ୍ଚ କରିବାକୁ ପରାମର୍ଶ ଦିଆଯାଇଛି। ଏହି କମିଟି ତିନି ଦିନ ଭିତରେ ତାଙ୍କର ରିପୋର୍ଟ ଦେବେ। ଏହା ପରେ କମ୍ପାନୀ ବିରୋଧରେ ଆଇନ ଅନୁଯାୟୀ ପଦକ୍ଷେପ ଗ୍ରହଣ କରାଯିବ ବୋଲି ଉପଜିଲାପାଳ ଗୁରୁବାର ଖବରଦାତାମାନଙ୍କୁ ସୂଚନା ଦେଇଛନ୍ତି।
