ପାରଳାଖେମୁଣ୍ଡି,୮ା୭(ଗିରିଧାରୀ ପରିଚ୍ଛା): ଗଜପତି ଜିଲାର ବହୁଚର୍ଚ୍ଚିତ ଏସିଏଫ୍ ସୌମ୍ୟରଞ୍ଜନ ମୃତ୍ୟୁ ମାମଲାରେ ୩ ଅଭିଯୁକ୍ତଙ୍କୁ ହାଇକୋର୍ଟରୁ ଆଶ୍ୱସ୍ତି ମିଳିଛି। ଶୁକ୍ରବାର ମୃତ ସୌମ୍ୟରଞ୍ଜନଙ୍କ ସ୍ତ୍ରୀ ବିଦ୍ୟାଭାରତୀ, ପୂର୍ବତନ ଡିଏଫ୍ଓ ସଂଗ୍ରାମ କେଶରୀ ବେହେରା ଏବଂ ରୋଷେୟା ମନ୍ମଥ କୁମ୍ଭଙ୍କୁ ପାରଳାଖେମୁଣ୍ଡି ଏସ୍ଡିଜେଏମ୍ କୋର୍ଟରେ ହାଜର ହେବାକୁ ପଡିନାହିଁ। ୨୦୨୧ ଜୁଲାଇ ୧୩ରେ ସୌମ୍ୟରଞ୍ଜନଙ୍କ ମୃତ୍ୟୁ ପରେ ଏହି ୩ ଅଭିଯୁକ୍ତଙ୍କ ନାମରେ ହତ୍ୟା ଓ ପ୍ରମାଣନଷ୍ଟ ଉଦ୍ୟମ ନେଇ ମାମଲା ରୁଜୁ ହୋଇଥିଲା। ଏ ପର୍ଯ୍ୟନ୍ତ ସେମାନେ ନିଜ ଓକିଲଙ୍କ ଜରିଆରେ ଅଦାଲତରେ ପକ୍ଷ ରଖି ଆସୁଛନ୍ତି। ଏହା ବିରୋଧରେ ସୌମ୍ୟରଞ୍ଜନଙ୍କ ବାପା ଅଭିରାମ ମହାପାତ୍ର ଓକିଲ ଜରିଆରେ କୋର୍ଟରେ ପିଟିଶନ ଦାଖଲ କରିଥିଲେ। ଏହାପରେ ବିଦ୍ୟାଭାରତୀ, ଡିଏଫ୍ଓ ଓ ରୋଷେୟାଙ୍କୁ ବ୍ୟକ୍ତିଗତ ହାଜର ହେବାକୁ ପାରଳାଖେମୁଣ୍ଡି ଏସ୍ଡିଜେଏମ ନୋଟିସ ଜାରି କରିଥିଲେ। ବାରମ୍ବାର ନୋଟିସ ପରେ ବି ସେମାନେ କୋର୍ଟରେ ହାଜର ନ ହେବାରୁ ଅଦାଲତ ଗତ ମାସରେ ୩ ଅଭିଯୁକ୍ତଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରିଥିଲେ।
ଜୁଲାଇ ୭ ତାରିଖ ସୁଦ୍ଧା ଅଦାଲତରେ ବ୍ୟକ୍ତିଗତ ହାଜର କରାଇବାକୁ ପୋଲିସକୁ ନିର୍ଦ୍ଦେଶ ଦେଇଥିଲେ। ହେଲେ ସିଆରପିସି ଧାରା ୨୦୫ ଅନୁସାରେ ଅଭିଯୁକ୍ତମାନେ ବ୍ୟକ୍ତିଗତ ହାଜିରା ନ ହୋଇ ଓକିଲଙ୍କ ଦ୍ବାରା ପକ୍ଷ ରଖିପାରିବେ ବୋଲି ପୂର୍ବରୁ ହାଇକୋର୍ଟ ଅନୁମତି ଦେଇସାରିଛନ୍ତି। ସେହିପରି ଏସ୍ଡିଜେଏମଙ୍କ ପକ୍ଷରୁ ଜାରି ଜାମିନ ବିହୀନ ଗିରଫ ପରୱାନା ନିର୍ଦ୍ଦେଶନାମାରେ ରହିତାଦେଶ ଜାରି କରିବାକୁ ବିଦ୍ୟାଭାରତୀଙ୍କ ପକ୍ଷରୁ କରାଯାଇଥିବା ଆବେଦନକୁ ମଧ୍ୟ ହାଇକୋର୍ଟ ଗ୍ରହଣ କରିଛନ୍ତି ବୋଲି ତାଙ୍କ ଓକିଲ ଏଲ. କେ. ଅଧିକାରୀ ସୂଚନା ଦେଇଛନ୍ତି। ତେଣୁ ଜାମିନ ବିହୀନ ଗିରଫ ପରୱାନା ପ୍ରତ୍ୟାହାର କରିନେବାକୁ ବିଦ୍ୟାଭରତୀଙ୍କ ଓକିଲ ପାରଳାଖେମୁଣ୍ଡି ଏସଡିଜେଏମଙ୍କୁ ଅନୁରୋଧ କରିଛନ୍ତି।
ସୂଚନାଯୋଗ୍ୟ, ୨୦୨୧ ଜୁଲାଇ ୧୨ରେ ସୌମ୍ୟରଞ୍ଜନ ଓ ବିଦ୍ୟାଭାରତୀ ସରକାରୀ କ୍ୱାର୍ଟର୍ସରେ ଥିଲେ। ସେହି ରାତିରେ ସୌମ୍ୟଙ୍କ ଶରୀରରେ ନିଅଁା ଲାଗିଥିଲା। ତାଙ୍କୁ ପ୍ରଥମେ ପାରଳାଖେମୁଣ୍ଡି ମେଡିକାଲ ଓ ପରେ ବ୍ରହ୍ମପୁର ବଡ଼ ମେଡିକାଲକୁ ନିଆଯାଇଥିଲା। ପରଦିନ ଅର୍ଥାତ୍ ୧୩ ତାରିଖରେ କଟକର ଏକ ଘରୋଇ ହସ୍ପିଟାଲକୁ ନିଆଯାଇଥିବା ବେଳେ ସେଠାରେ ସୌମ୍ୟରଞ୍ଜନଙ୍କର ମୃତ୍ୟୁ ଘଟିଥିଲା। ବିଦ୍ୟାଭାରତୀ, ତାଙ୍କ ରୋଷେୟା ମନ୍ମଥ କୁମ୍ଭ ଓ ଡିଏଫ୍ଓ ମିଶି ସୌମ୍ୟଙ୍କୁ ଯୋଜନାବଦ୍ଧ ଭାବେ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଥିଲେ। ପୋଲିସ ଓ କ୍ରାଇମ୍ବ୍ରାଞ୍ଚ ଏହି ମାମଲାର ତଦନ୍ତ କରିଥିଲେ ମଧ୍ୟ ସୌମ୍ୟଙ୍କ ଦେହରେ ନିଆଁ କିଭଳି ଲାଗିଲା ତାହା ଏ ଯାଏ ସ୍ପଷ୍ଟ ହୋଇନାହିଁ।
