ନୂଆଦିଲ୍ଲୀ,୨୩।୯: ଆଇସିସି ଟି-୨୦ ରାଙ୍କିଙ୍ଗ୍ରେ ପୁଣିଥରେ ବଡ଼ ଅଦଳବଦଳ ଦେଖିବାକୁ ମିଳିଛି। ନୂଆ ରାଙ୍କିଙ୍ଗ୍ରେ ଭାରତର ଇଶାନ କିଶନ ଶୀର୍ଷ ସ୍ଥାନ ବଜାୟ ରଖିଛନ୍ତି। ତେବେ ତାଙ୍କ ପଛକୁ ଥିବା ଅଭିଷେକ ଶର୍ମା ଏବେ ଆହୁରି ନିକଟତର ହୋଇଛନ୍ତି। ଏହା ସହ ଇଂଲଣ୍ଡର ହ୍ୟାରି ବ୍ରୁକ ଓ ଜୋସ ବଟଲରଙ୍କ ରାଙ୍କିଙ୍ଗ୍ରେ ମଧ୍ୟ ବଡ଼ ଉନ୍ନତି ହୋଇଛି।
ଭାରତ-ଜାପାନ ଟି-୨୦ ଅନ୍ତର୍ଜାତୀୟ ମ୍ୟାଚ ପରେ ଆଇସିସି ପକ୍ଷରୁ ନୂଆ ଟି-୨୦ ରାଙ୍କିଙ୍ଗ୍ ଜାରି କରାଯାଇଛି। ଏଥିରେ ଇଶାନ କିଶନ ୯୦୪ ରେଟିଂ ପଏଣ୍ଟ ସହ ପ୍ରଥମ ସ୍ଥାନରେ ରହିଛନ୍ତି। ସେହିପରି ଅଭିଷେକ ଶର୍ମା ୮୯୩ ରେଟିଂ ସହ ଦ୍ୱିତୀୟ ସ୍ଥାନରେ ଅଛନ୍ତି। ଦୁଇ ଭାରତୀୟ ବ୍ୟାଟରଙ୍କ ମଧ୍ୟରେ ରେଟିଂ ପଏଣ୍ଟର ବ୍ୟବଧାନ ଏବେ ମାତ୍ର ୧୧।
ପାକିସ୍ତାନର ସାହିବଜାଦା ଫରହାନ ୮୪୮ ରେଟିଂ ସହ ତୃତୀୟ ସ୍ଥାନରେ ରହିଛନ୍ତି। ଇଂଲଣ୍ଡର ଅଧିନାୟକ ହ୍ୟାରି ବ୍ରୁକ ଏଥର ୫ଟି ସ୍ଥାନ ଉପରକୁ ଉଠି ୭୯୩ ରେଟିଂ ସହ ଚତୁର୍ଥ ସ୍ଥାନ ହାସଲ କରିଛନ୍ତି। ଅନ୍ୟପଟେ ଜୋସ ବଟଲର ୨ଟି ସ୍ଥାନର ଉନ୍ନତି କରି ୭୮୯ ରେଟିଂ ସହ ପଞ୍ଚମ ସ୍ଥାନରେ ପହଞ୍ଚିଛନ୍ତି।
ଭାରତୀୟ ବ୍ୟାଟର ତିଳକ ବର୍ମାଙ୍କ ରାଙ୍କିଙ୍ଗ୍ର ଗୋଟିଏ ସ୍ଥାନର ଅବନତି ହୋଇଛି। ସେ ୭୨୬ ରେଟିଂ ସହ ନବମ ସ୍ଥାନରେ ଅଛନ୍ତି। ଟପ-୧୦ରେ ଭାରତର ଏବେ ତିନିଜଣ ବ୍ୟାଟର ଇଶାନ କିଶନ, ଅଭିଷେକ ଶର୍ମା ଓ ତିଳକ ବର୍ମା ରହିଛନ୍ତି। ଅଷ୍ଟ୍ରେଲିଆର ମିଚେଲ ମାର୍ଶ ୭୦୬ ରେଟିଂ ସହ ଦଶମ ସ୍ଥାନରେ ଅଛନ୍ତି। ଆଗାମୀ ଟି-୨୦ ମ୍ୟଚଗୁଡ଼ିକରେ ପ୍ରଦର୍ଶନ ଆଧାରରେ ଇଶାନ ଓ ଅଭିଷେକଙ୍କ ମଧ୍ୟରେ ନମ୍ବର-୧ ସ୍ଥାନ ପାଇଁ ପ୍ରତିଦ୍ୱନ୍ଦ୍ୱିତା ଆହୁରି ରୋଚକ ହୋଇପାରେ।
