ନୂଆଦିଲ୍ଲୀ,୨୩।୭: ‘କରିଶ୍ମା କା କରିଶ୍ମା’, ‘ଶରାରତ୍’ ଏବଂ ‘ବଡ଼େ ଅଚ୍ଛେ ଲଗତେ ହୈଁ’ ଭଳି ସୋ’ରେ ନିଜ ଭୂମିକା ପାଇଁ ଜଣାଶୁଣା ଅଭିନେତ୍ରୀ ଇଭା ଗ୍ରୋଭର, ନିକଟରେ ନିଜ ବ୍ୟକ୍ତିଗତ ଜୀବନର ଏକ ଖରାପ ସମୟ ବିଷୟରେ କଥା ହୋଇଛନ୍ତି। ସେ ଆମିର ଖାନ୍ଙ୍କ ସାବତ ଭାଇ ହାଇଦର ଅଲ୍ଲୀ ଖାନ୍ଙ୍କ ସହ ନିଜ ବିବାହକୁ ମନେ ପକାଇ ଅଭିଯୋଗ କରିଛନ୍ତି ଯେ, ସମ୍ପର୍କରେ ଥିବା ସମୟରେ ତାଙ୍କୁ ଶାରୀରିକ ନିର୍ଯାତନାର ସାମ୍ନା କରିବାକୁ ପଡ଼ିଥିଲା। ଏହାସହ ସେ ହାଇଦରଙ୍କ ବର୍ତ୍ତମାନର ସ୍ଥିତି ବିଷୟରେ ମଧ୍ୟ କହିଛନ୍ତି, ଯାହାକି ଅତ୍ୟନ୍ତ ଆଶ୍ଚର୍ଯ୍ୟଜନକ।
ଟିଭି ଅଭିନେତ୍ରୀ ଇଭା ଗ୍ରୋଭର, ଆମିରଙ୍କ ସାବତ ଭାଇ ହାଇଦର ଅଲ୍ଲୀ ଖାନ୍ଙ୍କ ସହ ନିଜର ଜଟିଳ ବିବାହ ବିଷୟରେ ଖୋଲାଖୋଲି କଥା ହୋଇଛନ୍ତି। ସେ ଘରୋଇ ହିଂସାର ଚାଞ୍ଚଲ୍ୟକର ଅଭିଯୋଗ ଆଣିବା ସହ ବର୍ତ୍ତମାନ ସେ କିପରି କଠିନ ପରିସ୍ଥିତିରେ ରହୁଛନ୍ତି, ସେ ବିଷୟରେ ମଧ୍ୟ ଜଣାଇଛନ୍ତି। ସିଦ୍ଧାର୍ଥ କନ୍ନନ୍ଙ୍କ ସହ ନିକଟରେ ହୋଇଥିବା ଏକ ସାକ୍ଷାତକାରରେ ଇଭା କହିଛନ୍ତି ଯେ, ଜଣେ ସାଧାରଣ ବନ୍ଧୁଙ୍କ ଜରିଆରେ ହାଇଦରଙ୍କ ସହ ତାଙ୍କର ଦେଖାସାକ୍ଷାତ ହୋଇଥିଲା। କେବଳ ୧୮ ଦିନ ଡେଟ୍ କରିବା ପରେ, ଉଭୟ ଘରୁ ଫେରାର୍ ହୋଇ ବିବାହ କରିଥିଲେ; କାରଣ ଇଭାଙ୍କ ମା’ ଏହି ସମ୍ପର୍କର ବିରୋଧୀ ଥିଲେ।
ଇଭା ଅଭିଯୋଗ କରିଛନ୍ତି ଯେ, ବିବାହ ସମୟରେ ହାଇଦର ସିଜୋଫ୍ରେନିଆ ରୋଗରେ ପୀଡ଼ିତ ଥିବା କଥା ତାଙ୍କୁ ଜଣାନଥିଲା। ସେ ଦାବି କରିଛନ୍ତି ଯେ, ବିବାହର କେବଳ ତିନି ଦିନ ପରେ ହିଁ ହାଇଦର ତାଙ୍କ ସହ ମାରପିଟ୍ କରିଥିଲେ ଏବଂ ଏହି ନିର୍ଯାତନା ବର୍ଷ ବର୍ଷ ଧରି ଚାଲିଥିଲା। ଇଭାଙ୍କ କହିବା ଅନୁଯାୟୀ, ହାଇଦରଙ୍କ କ୍ରମାଗତ ସନ୍ଦେହ ଏବଂ ମଦ୍ୟପାନର ଅଭ୍ୟାସ ପରିସ୍ଥିତିକୁ ଆହୁରି ଖରାପ କରିଦେଇଥିଲା। ବିବାହ ବଞ୍ଚାଇବାକୁ ଚେଷ୍ଟା କରିବା ସତ୍ତ୍ୱେ, ଝିଅର ଜନ୍ମ ପରେ ଇଭା ଛାଡ଼ପତ୍ର ପାଇଁ ଆବେଦନ କରିବାକୁ ନିଷ୍ପତ୍ତି ନେଇଥିଲେ।
ଇଭା ଏହା ମଧ୍ୟ କହିଛନ୍ତି ଯେ, ଆମିର ଖାନ୍ଙ୍କୁ ତାଙ୍କ ସମସ୍ୟା ବିଷୟରେ ଜଣାଥିଲା ଏବଂ ସେ ଶୁଣିଥିଲେ ଯେ, ହାଇଦରଙ୍କୁ ବିବାହ କରି ସେ ଭୁଲ୍ ନିଷ୍ପତ୍ତି ନେଉଛନ୍ତି ବୋଲି ଅଭିନେତା (ଆମିର) ବିଚାର କରୁଥିଲେ। ହାଇଦରଙ୍କ ବର୍ତ୍ତମାନର ସ୍ଥିତି ବିଷୟରେ କହିବାକୁ ଯାଇ ଇଭା ପ୍ରକାଶ କରିଛନ୍ତି ଯେ, ସେ ଏବେ ଅତ୍ୟନ୍ତ କଠିନ ପରିସ୍ଥିତିରେ ରହୁଛନ୍ତି ଏବଂ ହାଇଦରଙ୍କର କୌଣସି ନିଜସ୍ୱ ଘର ନାହିଁ। ସେ କେତେବେଳେ ଚାଲ୍ରେ ତ କେତେବେଳେ ସାଙ୍ଗମାନଙ୍କ ସହ ରହୁଛନ୍ତି, ଏବଂ ଖାଇବା-ପିଇବା ଭଳି ମୌଳିକ ଆବଶ୍ୟକତା ପାଇଁ ମଧ୍ୟ ସଂଘର୍ଷ କରୁଛନ୍ତି। ନିଜର କଷ୍ଟଦାୟକ ଅତୀତକୁ ମନେ ପକାଇ ଇଭା କହିଛନ୍ତି ଯେ, ତାଙ୍କ ପ୍ରତି ତାଙ୍କର ସମବେଦନା ରହିଛି ଏବଂ ଆଶା କରୁଛନ୍ତି ଯେ ତାଙ୍କୁ ଶେଷରେ ଶାନ୍ତି ମିଳିବ।
“ମୁଁ ଶୁଣିଥିଲି ଯେ, ଆମିର ସାର୍ କହିଥିଲେ ମୁଁ ସଠିକ୍ ନିଷ୍ପତ୍ତି ନେଇନାହିଁ। ଏହି କଥା ମୋ ବିବାହ ପୂର୍ବରୁ ହିଁ ମୋ ପାଖରେ ପହଞ୍ଚିଥିଲା, କିନ୍ତୁ ମୁଁ ସେଥିପ୍ରତି ଧ୍ୟାନ ଦେଇନଥିଲି। ଆମିର ଖାନ୍ ସାର୍ ଏହି ପରିବାର ସହ କୌଣସି ସମ୍ପର୍କ ରଖିବାକୁ ଚାହୁଁନଥିଲେ; ସେତେବେଳେ ତାହିର ଅବ୍ବୁ ନିଜ ଜୀବନର ଶେଷ ସମୟରେ ଥିଲେ, ତେଣୁ ସେ ତାଙ୍କୁ ପୁଣେ ନେଇଗଲେ ଏବଂ ସେଠାରେ ହିଁ ରଖିଲେ। ଏପରିକି ମୋର ପୂର୍ବ ଶାଶୂ, ଯାହାଙ୍କୁ ତାହିର ହୁସେନ୍ ବହୁତ ଭଲପାଉଥିଲେ, ତାଙ୍କୁ ମଧ୍ୟ ତାଙ୍କୁ ଭେଟିବାକୁ ଦିଆଯାଇନଥିଲା।”
