ମୁମ୍ବାଇ,୨୬।୪: ବଲିଉଡର ମିଷ୍ଟର ପରଫେକ୍ସନିଷ୍ଟ ଆମିର ଖାଁ ଏବେ ଚର୍ଚ୍ଚାରେ। ଏହାର କାରଣ ହେଉଛି ପ୍ରଧାନମନ୍ତ୍ରୀ ମୋଦିଙ୍କ ‘ମନ କି ବାତ’ କାର୍ଯ୍ୟକ୍ରମ। ନିକଟରେ ରାଜଧାନୀ ଦିଲ୍ଲୀରେ ହୋଇଥିବା ନ୍ୟାଶନାଲ କନକ୍ଲେଭରେ ଆମିର ଭାଗ ନେଇଥିଲେ। ଏହି ସମୟରେ ଆମିର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ମନ କି ବାତ’ କାର୍ଯ୍ୟକ୍ରମକୁ ନେଇ ଖୋଲାଖୋଲି କଥା ହୋଇଥିଲେ। ସେ କହିଥିଲେ ଏହି କାର୍ଯ୍ୟକ୍ରମ ଲୋକଙ୍କ ମନରେ ଗଭିର ପ୍ରଭାବ ଛାଡିଯାଇଥାଏ।
ସମାଚାର ଏଜେନ୍ସି ଏଏନଆଇ ତା’ର ଅଫିସିଆଲ ଟୁଇଟର ହ୍ୟାଣ୍ଡେଲରେ ଏକ ଲାଟେଷ୍ଟ ଭିଡିଓ ଶେୟାର କରିଛି। ଏହି ଭିଡିଓରେ ଆମିର ପ୍ରଧାନମନ୍ତ୍ରୀଙ୍କ ମନ କି ବାତ କାର୍ଯ୍ୟକ୍ରମର ଖୋଲାଖୋଲି ପ୍ରଶଂସା କରୁଛନ୍ତି। ଆମିର କହିଛନ୍ତି ଏହା ଏକ ଐତିହାସିକ ପଦକ୍ଷେପ। ଏହା ମାଧ୍ୟମରେ ଭାରତୀୟଙ୍କ ଉପରେ ଗଭିର ପ୍ରଭାବ ପଡିଛି। ଏହାପରେ ପିଟିଆଇକୁ ଆମିର କହିଛନ୍ତି, ସଂଚାରର ଏହି ମାଧ୍ୟମ ଖୁବ ଜରୁରୀ ଓ ଗୁରୁତ୍ୱପୂର୍ଣ୍ଣ, ଯାହା ଦେଶର ନେତାଙ୍କ ପକ୍ଷରୁ କରାଯାଇଛି। ଏହାଦ୍ୱାରା ଆପଣ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ କଥା ହେଉଛନ୍ତି, ନିଜ ମତ ଦେଉଛନ୍ତି। ଏହି କମ୍ୟୁନିକେଶନରେ ଆପଣ ଲୋକଙ୍କୁ ଏହା କହୁଛନ୍ତି କି ଭବିଷ୍ୟତକୁ ନେଇ ଆପଣଙ୍କ ଚିନ୍ତାଧାରା କୁଆଡେ ଗତି କରୁଛି ଅବା କ’ଣ ରହିଛି। ମନ କି ବାତରେ ଏହା ବହୁତ ଜରୁରୀ କଥା ହୋଇଥାଏ।
