ଲୁଧିଆନା, ୨୯।୭: ପଞ୍ଜାବର ଲୁଧିଆନାରେ ରହୁଥିବା ସାଢେ ତିନି ବର୍ଷର ବାଳକ କୁନୱର ପ୍ରତାପ ସିଂ ଏବେ ବେଶ୍ ଚର୍ଚ୍ଚାରେ ଅଛନ୍ତି। ଏନେ କମ ବୟସରୁ ତାଙ୍କ ନାମ ଇଣ୍ଡିଆ ବୁକ ଅଫ ରେକର୍ଡସ ଏବଂ ଆନ୍ତର୍ଜାତୀୟ ବୁକ ଅଫ ରେକର୍ଡରେ ସ୍ଥାନିତ ହୋଇଛି। ଏହା ସହିତ ସେ ତାଙ୍କର ତୀକ୍ଷ୍ଣ ସ୍ମୃତି ଶକ୍ତି ପାଇଁ ଚାଇଲ୍ଡ ପ୍ରୋଡିଜି ମାଗାଜିନ ପାଇଁ ମଧ୍ୟ ମନୋନୀତ ହୋଇଛନ୍ତି।
କୁନୱର ସରାଭା ନଗରର ସେକ୍ରେଡ ହାର୍ଟ କନଭେଣ୍ଟ ସ୍କୁଲର ଛାତ୍ର। ସେ ନିଜ ସ୍ମୃତି ଶକ୍ତି ଦ୍ୱାରା ପଞ୍ଚମ ଶ୍ରେଣୀ ଛାତ୍ରଙ୍କୁ ପଛରେ ପକାଇଦେଇଛନ୍ତି। କୁନୱାର ୧ରୁ ୪୦ ପର୍ଯ୍ୟନ୍ତ ପଣିକିଆ, ବିଶ୍ୱର ସମସ୍ତ ଦେଶର ରାଜଧାନୀର ନାମ, ଯେକୌ ଣସି ସଂଖ୍ୟାର ଗୁଣନ ଏବଂ ହରଣ ମଧ୍ୟରେ ସହଜରେ କରିପାରନ୍ତି। ଏହାସହ ବହି ପଢିବା ଏବଂ ବିଭିନ୍ନ ଭାଷାରେ କଥା ହେବା ମଧ୍ୟ ତାଙ୍କର ରୁଚି ରହିଛି। ସେ ଲମ୍ବା ଶବ୍ଦକୁ ସହଜରେ ଉଚ୍ଚାରଣ କରିପାରନ୍ତି ଏବଂ ସେ ପଢିବାରେ ମଧ୍ୟ ପାରଙ୍ଗମ।
କୁନୱର ପ୍ରତାପଙ୍କ ମାତାପିତା କହିଛନ୍ତି ଯେ ସେ କଲୋନୀର ସମସ୍ତ ଲୋକଙ୍କ ନାମ, ଘର ନମ୍ବର ଏବଂ ଅନ୍ୟାନ୍ୟ ବିବରଣୀ ମଧ୍ୟ ମନେ ରଖିଛନ୍ତି। ଇଣ୍ଡିଆ ବୁକ ଅଫ ରେକର୍ଡସରେ ତାଙ୍କୁ ଗୋଟିଏ ମିନିଟରେ ୨୭ଟି ସ୍ମାରକର ନାମ କହିବା ଏବଂ ଗୋଟିଏ ମିନିଟରେ ୧୪ ଯାଏ ପଣିକିଆ କହିବା ପାଇଁ ତାଙ୍କୁ ଗ୍ରାଣ୍ଡମାଷ୍ଟର ଆଖ୍ୟା ଦିଆଯାଇଥିଲା। ଏତେ କମ ବୟସରେ, ତାଙ୍କ ନାମ ଅନ୍ତର୍ଜାତୀୟ ବୁକ ଅଫ ରେକର୍ଡରେ ସ୍ଥାନିତ ହୋଇଛି। ଭାରତର ସମସ୍ତ ରାଜ୍ୟର ରାଜଧାନୀର ନାମକୁ ୪୮ ସେକେଣ୍ଡରେ କହି ସେ ରେକର୍ଡ କରିଛନ୍ତି। ଏହାସହ ୨୩ ମିନିଟ ୪୮ ସେକେଣ୍ଡରେ ୨୭ଟି ପୁସ୍ତକ ପଢିବାର ରେକର୍ଡ ମଧ୍ୟ ତାଙ୍କ ନାଁରେ ଅଛି। ଚାଇଲ୍ଡ ପ୍ରୋଡିଜି ମାଗାଜିନରେ ସେ ଭାରତର ଶ୍ରେଷ୍ଠ ୧୦୦ ପିଲାଙ୍କ ମଧ୍ୟରେ ମନୋନୀତ ହୋଇଥିଲେ।
