ଅତାବିରା, ୧୬/୫(ଯୁଧିଷ୍ଠିର ମହାପାତ୍ର):ବରଗଡ ଜିଲା ଅତାବିରା ଥାନା ଅନ୍ତର୍ଗତ ବରଗଡ ସମ୍ବଲପୁର ରେଲୱେ ଡାଉନ ଲାଇନର ଭୋଇପାଲି ଓଭର ବ୍ରିଜ ପାଖରେ ଜୈନେକ ବ୍ୟକ୍ତି କଟି ଯିବାରୁ ଶନିବାର ଟ୍ରେନ ଚଳାଚଳ ବ୍ୟାହତ ହୋଇଛି l ଏହି ରେଳ ଲାଇନର ୫୮୪/୨୨ ଖୁଣ୍ଟ ପାଖରେ ଶନିବାର ସକାଳ ୬ଟା ୮ ମିନିଟ ସମୟରେ ଏକ ମାଳବାହୀ ଟ୍ରେନ ଭୋଇପାଲି ଅତିକ୍ରମ କରୁଥିବାବେଳେ ହଠାତ ଅଜଣା ବ୍ୟକ୍ତି ଜଣକ ଗାଡ଼ି ସାମ୍ନାକୁ ଆସିଯାଇଥିଲେ l ସାଙ୍ଗେ ସାଙ୍ଗେ ଉଭୟ ଟ୍ରେନ ଚାଳକ ଜରୁରୀକାଳୀନ ବ୍ରେକ ଲଗାଇଥିଲେ l ଟ୍ରେନଟି ଅନତି ଦୂର ଯାଇ ଅଟକିବା ପରେ ଚାଳକ କଟି ଯାଇଥିବା ବ୍ୟକ୍ତିଙ୍କ ଜୀବନ ଥିବା ଅନୁମାନ କରିଥିଲେ l ସଙ୍ଗେ ସଙ୍ଗେ ଉପରିସ୍ଥ ଅଧିକାରୀଙ୍କୁ ଜଣାଇ ଥିଲେ l ଡାକ୍ତରଖାନା ନେବାକୁ ପ୍ରୟାସ କରିଥିଲେ ମଧ୍ୟ ସେହି ସମୟ ମଧ୍ୟରେ କଟିଥିବା ବ୍ୟକ୍ତିଙ୍କ ହଲଚଲ ବନ୍ଦ ହୋଇ ଯାଇଥିଲା l ଫଳରେ ମାଲଗାଡିକୁ ୨ଘଣ୍ଟା ୪୦ ମିନିଟ ଘଟଣାସ୍ଥଳରେ ଅଟକିବାକୁ ପଡିଥିଲା l ଏହାଦ୍ୱାରା ଏହି ପଥ ଦେଇ ଯିବାକୁ ଥିବା ସମସ୍ତ ଟ୍ରେନ ଗୁଡିକୁ ବିଭିନ୍ନ ସ୍ଥାନରେ ଅଟକାଯାଇଥିଲା l ଅତାବିରା ଥାନା ପୋଲିସ ଓ ରେଲୱେ ପୋଲିସ ପହଁଚି ଶବକୁ ଜବତ କରି ସେହି ମାଳଗାଡ଼ିରେ ନେବା ପରେ ସକାଳ ୮ଟା ୪୮ ମିନିଟରେ ଟ୍ରେନ ଚଳାଚଳ ସୱାଭାବିକ ହୋଇଥିଲା l ସମ୍ବଲପୁର ରେଲୱେ ପୋଲିସ ପକ୍ଷରୁ ଏକ ଅପମୃତ୍ୟୁ ମାମଲା ରୁଜୁ ହୋଇ ଘଟଣାର ଅଧିକ ତଦନ୍ତ ଚାଲିଥିବା ଜଣାପଡିଛି l
Dharitri – Odisha’s No.1 Odia Daily
