ୱାଶିଂଟନ,୨୧ା୯: ମାନସିକ ସ୍ମୃତିଶକ୍ତି ହ୍ରାସ ପାଇବା କିମ୍ବା ଆଲଜାଇମର୍ସ ରୋଗର ଲକ୍ଷଣ ପ୍ରକାଶ ପାଇବାର ବହୁ ବର୍ଷ କିମ୍ବା ଦଶନ୍ଧି ପୂର୍ବରୁ ମାନବ ଶରୀରରେ ଏହାର ଜୈବିକ ପ୍ରକ୍ରିୟା ଆରମ୍ଭ ହୋଇଥାଏ। ଏହି ଆଗୁଆ ସଙ୍କେତକୁ ଚିହ୍ନଟ କରିବା ପାଇଁ ବୈଜ୍ଞାନିକମାନେ ଏକ ସାଧାରଣ ରକ୍ତ ପରୀକ୍ଷା ମାଧ୍ୟମରେ ସ୍ମୃତିଶକ୍ତି ହ୍ରାସର ୬ ବର୍ଷ ପୂର୍ବରୁ ଆଗାମୀ ବିପଦ ସମ୍ପର୍କରେ ସୂଚନା ପାଇବାରେ ସଫଳତା ହାସଲ କରିଛନ୍ତି। ‘ଆଲଜାଇମର୍ସ ଆଣ୍ଡ୍ ଡିମେନ୍ସିଆ: ଡାଇଗ୍ନୋସିସ, ଆସେସ୍ମେଣ୍ଟ ଆଣ୍ଡ୍ ଡିଜିଜ୍ ମନିଟରିଂ’ ଜର୍ନାଲରେ ପ୍ରକାଶିତ ୟୁନିଭର୍ସିଟି ଅଫ୍ ମିଆମି ମିଲର୍ ସ୍କୁଲ ଅଫ୍ ମେଡିସିନ୍ର ଗବେଷଣାରୁ ଏହି ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି।
ଗବେଷକମାନେ ୧,୧୭୦ ଜଣ ବରିଷ୍ଠ ନାଗରିକଙ୍କ (ହାରାହାରି ବୟସ ୭୩ ବର୍ଷ) ସ୍ବାସ୍ଥ୍ୟାବସ୍ଥାକୁ ନେଇ ଏହି ଅନୁଧ୍ୟାନ କରିଥିଲେ। ୨୦୧୬ରେ ସେମାନଙ୍କର ରକ୍ତ ନମୁନା ପରୀକ୍ଷା କରାଯିବା ସହ ସ୍ମୃତିଶକ୍ତି ଓ ମାନସିକ ଦକ୍ଷତାର ମୂଲ୍ୟାଙ୍କନ କରାଯାଇଥିଲା। ପରବର୍ତ୍ତୀ ସମୟରେ ୨୦୨୨ରେ ପୁନର୍ବାର ସେମାନଙ୍କର ମାନସିକ ଦକ୍ଷତା ପରୀକ୍ଷା କରାଯିବା ପରେ ସାଂଘାତିକ ସତ୍ୟ ପଦାକୁ ଆସିଥିଲା। ଗବେଷଣାରୁ ଜଣାପଡ଼ିଛି ଯେ, ରକ୍ତରେ ଆଲଜାଇମର୍ସ ସମ୍ପର୍କିତ ‘ପି-ଟିଏୟୁ୧୮୧’ ପ୍ରୋଟିନ୍ର ମାତ୍ରା ଅଧିକ ଥିବା ବ୍ୟକ୍ତିଙ୍କଠାରେ ୬ ବର୍ଷ ପରେ ସ୍ମୃତିଶକ୍ତି ଓ ମାନସିକ କାର୍ଯ୍ୟଦକ୍ଷତା ହ୍ରାସ ପାଇଥିଲା। କୋଗ୍ନିଟିଭ ନ୍ୟୁରୋଲୋଜିଷ୍ଟ ଡିଆର୍ଡ୍ରେରେ ଓ’ସିଆଙ୍କ ଅନୁଯାୟୀ, ‘ପି-ଟିଏୟୁ୧୮୧’ ପ୍ରୋଟିନ୍ର ଉପସ୍ଥିତି ପ୍ରାରମ୍ଭିକ ପରୀକ୍ଷା ସମୟରେ ସ୍ମୃତିଶକ୍ତି ଉପରେ କୌଣସି ପ୍ରଭାବ ପକାଇ ନ ଥିଲା, କିନ୍ତୁ ୬ ବର୍ଷ ପରେ ସେମାନଙ୍କ ସ୍ମୃତିଶକ୍ତି ଦୁର୍ବଳ ହୋଇଥିଲା। ‘ଜିଏଫ୍ଏପି’ (ଗ୍ଲାଇଆଲ ଫାଇବ୍ରିଲାରୀ ଏସିଡିକ ପ୍ରୋଟିନ) ବାୟୋମାର୍କର ମଧ୍ୟ ସ୍ମୃତିଶକ୍ତି, ମାନସିକ ସ୍ଥିରତା ଏବଂ ନିର୍ଣ୍ଣୟ ନେବାର ଦକ୍ଷତା ହ୍ରାସ ସହ ସାଧାରଣ ଭାବେ ଜଡ଼ିତ ଥିବା ଜଣାପଡ଼ିଛି। ସେହିପରି ‘ଏନ୍ଏଫ୍ଏଲ୍’ ଏବଂ ଆମିଲଏଡ୍ ବିଟା ୪୨/୪୦ (ଏବି୪୨/୪୦) ବାୟୋମାର୍କର ମଧ୍ୟ ସ୍ନାୟୁଗତ କ୍ଷତି ଓ ଆଲଜାଇମର୍ସ ସମ୍ପର୍କିତ ତଥ୍ୟ ପ୍ରଦାନ କରିଥାନ୍ତି। ରକ୍ତରେ ‘ପି-ଟିଏୟୁ୧୮୧’ ଏବଂ ‘ଜିଏଫ୍ଏପି’ ବାୟୋମାର୍କରର ମିଳିତ ପରୀକ୍ଷା ଦ୍ୱାରା ଜଣେ ବ୍ୟକ୍ତି ଭବିଷ୍ୟତରେ ସ୍ମୃତିଶକ୍ତି ହ୍ରାସ ଜନିତ ସମସ୍ୟାର ସମ୍ମୁଖୀନ ହେବେ କି ନାହିଁ, ତାହା ପୂର୍ବରୁ ଆକଳନ କରାଯାଇପାରିବ। ଯଦିଓ ଏହି ପରୀକ୍ଷା ସିଧାସଳଖ ଡିମେନ୍ସିଆର ସମ୍ପୂର୍ଣ୍ଣ ସୂଚନା ଦିଏନାହିଁ, କିନ୍ତୁ ଏହା ପ୍ରାରମ୍ଭିକ ପର୍ଯ୍ୟାୟରୁ ଚିକିତ୍ସା ଓ ସେବା ଯୋଗାଇବାରେ ସହାୟକ ହେବ। ଗବେଷକଙ୍କ ମତରେ, ବୟସ ଓ ସ୍ବାସ୍ଥ୍ୟାବସ୍ଥା ଆଧାରରେ ଭିନ୍ନ ଭିନ୍ନ ରକ୍ତ ପରୀକ୍ଷା କରି ମାନସିକ ସମସ୍ୟାର ଆଗୁଆ ନିଦାନ କରାଯାଇପାରିବ, ଯାହା ଆଗାମୀ ଦିନରେ ଆଲ୍ଜାଇମର୍ସ ରୋଗର ଚିକିତ୍ସା କ୍ଷେତ୍ରରେ ଏକ ବଡ଼ ପରିବର୍ତ୍ତନ ଆଣିବ।
