ଜୟପୁର,୧୪।୯: ଅଲ ଇଣ୍ଡିଆ ମଜଲିସ-ଇ-ଇତେହାଦୁଲ ମୁସଲିମିନ (ଏଆଇଏମଆଇଏମ) ମୁଖ୍ୟ ତଥା ହାଇଦ୍ରାବାଦ ଏମ୍ପି ଅସଦୁଦ୍ଦିନ ଓୱାଇସି ବୁଧବାର ରାଜସ୍ଥାନରେ ପହଞ୍ଚିଛନ୍ତି। ଏଠାରେ ଖବରଦାତାଙ୍କ ସହ କଥାବାର୍ତ୍ତା ବେଳେ ସେ ଅନେକ ପ୍ରସଙ୍ଗରେ ନିଜର ମତ ଦେଇଥିଲେ। ଏହି ସମୟରେ ସେ ପ୍ରଧାନମନ୍ତ୍ରୀ ମୋଦିଙ୍କୁ ସମାଲୋଚନା କରିବାକୁ ମଧ୍ୟ ପଛାଇ ନ ଥିଲେ। ଗମ୍ଭୀର ପ୍ରସଙ୍ଗକୁ ଏଡ଼ାଇବାରେ ମୋଦି ଚିତାବାଘଠାରୁ ଦ୍ରୁତ ବୋଲି ସେ କହିଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ଜନ୍ମଦିନରେ ମଧ୍ୟପ୍ରଦେଶର କୁନୋ ପାଲପୁର ଜାତୀୟ ଉଦ୍ୟାନ ପରିଦର୍ଶନ କରି ନାମ୍ବିଆରୁ ଆସୁଥିବା ୮ଟି ଚିତାବାଘକୁ ସ୍ବାଗତ କରିବେ। ଏହା ସହ ଜଡିତ ଏକ ପ୍ରଶ୍ନ ଉପରେ ଓୱାଇସି କହିଛନ୍ତି, ମୋଦି ଜୀ ବେରୋଜଗାରୀ, ମହଙ୍ଗା କଥା ଆସିଲେ ଚିତାବାଘ ଠାରୁ ବି ଦ୍ରୁତ ଗତିରେ ଦୌଡିବେ। ଏହି ବିଷୟଗୁଡ଼ିକରେ ମୋଦି ଜୀଙ୍କର ଗତି ବହୁତ ଭଲ।
ଓୱାଇସି ଦୁଇ ଦିନିଆ ଗସ୍ତରେ ରାଜସ୍ଥାନ ପହଞ୍ଚିଛନ୍ତି। ସେ ଜୟପୁରର କିଛି ଅଞ୍ଚଳର ଲୋକଙ୍କୁ ଭେଟିଥିଲେ। ଆସନ୍ତା ବର୍ଷ ଶେଖାୱାଟୀ ଅଞ୍ଚଳରେ ହେବାକୁ ଥିବା ବିଧାନସଭା ନିର୍ବାଚନକୁ ଆଖି ଆଗରେ ରଖି ଓ୍ବଓ୍ବାଇସି ସେଠାକୁ ଯାଇଥିବା ଜଣାପଡିଛି।
