ବ୍ରହ୍ମପୁର,୮ା୧୧(ସୁବାସ ଚନ୍ଦ୍ର ପାଢ଼ୀ): ଅନୈତିକ ସମ୍ପର୍କରୁ ସ୍ତ୍ରୀ ପ୍ରେମିକ ସହ ମିଶି ସ୍ବାମୀଙ୍କୁ ହତ୍ୟା କରିଥିବା ମାମଲାର ଚୂଡ଼ାନ୍ତ ରାୟ ପ୍ରକାଶ ପାଇଛି। ବ୍ରହ୍ମପୁର ଅତିରିକ୍ତ ଜିଲାଜଜ୍ -୧ ଡ. ଇନ୍ଦୁ ଶର୍ମା ଶୁକ୍ରବାର ହତ୍ୟାକାରୀ କଳାହାଣ୍ଡି ଜିଲା ଭବାନୀପାଟଣା ଶମ୍ଭୁନଗର ପୁରୁଣାପଡ଼ାର ସରୋଜ ମହାରଣା ଓରଫ ରାକେଶ(୩୮)ଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୧୦ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟ ଅଧିକ ୧ ବର୍ଷ ସଶ୍ରମ କାରାଦଣ୍ଡ ଭୋଗିବା ପାଇଁ ରାୟରେ ଉଲ୍ଲେଖ ରହିଛି। ଅନ୍ୟପକ୍ଷରେ ହତ୍ୟାର ଶିକାର ହୋଇଥିବା ପ୍ରଫୁଲ୍ଲ କୁମାର ସାହୁଙ୍କ ଦୁଇ ପିଲା ବାପଛେଉଣ୍ଡ ହୋଇଯାଇଥିବାରୁ ସେମାନଙ୍କ ଭରଣପୋଷଣ ପାଇଁ ଆର୍ଥିକ ସହାୟତା ଯୋଗାଇ ଦେବାକୁ ଜିଲା ଆଇନ ସେବା ପ୍ରାଧିକରଣ ସଚିବଙ୍କୁ ଜଜ୍ ନିର୍ଦ୍ଦେଶ ଦେଇଛନ୍ତି। ମୁଖ୍ୟ ଅଭିଯୁକ୍ତା ତଥା ପ୍ରଫୁଲ୍ଲଙ୍କ ସ୍ତ୍ରୀ ମିତା ସାହୁ (୩୫) ଜାମିନରେ ରହି ବିଚାର ବେଳେ କୋର୍ଟରେ ହାଜର ହୋଇ ନ ଥିବାରୁ ତାଙ୍କ ନାଁରେ ଜାମିନ ବିହୀନ ଗିରଫ ପରୱାନା(ଏନ୍ବିଡବ୍ଲ୍ୟୁ) ଜାରି କରାଯାଇଛି।
ମାମଲାର ବିବରଣୀରୁ ପ୍ରକାଶ ଯେ, ପ୍ରଫୁଲ୍ଲ ଓ ସରୋଜ ଦୁଇ ଜଣ ଟ୍ରକ ଡ୍ରାଇଭର। ଉଭୟେ ସଦର ଥାନା ଅନ୍ତର୍ଗତ ସୁକୁଣ୍ଡା ଗ୍ରାମରେ ରହୁଥିଲେ। ପ୍ରଫୁଲ୍ଲଙ୍କ ସହ ତାଙ୍କ ସ୍ତ୍ରୀ ମିତା ଓ ୨ ପୁଅ ମଧ୍ୟ ରହୁଥିଲେ। ସରୋଜ ଅଧିକାଂଶ ସମୟ ତାଙ୍କ ଘରକୁ ଯା’ଆସ କରିବା ମଧ୍ୟରେ ମିତାଙ୍କ ସହ ପ୍ରେମସମ୍ପର୍କ ଗଢ଼ି ଉଠିଥିଲା। ପ୍ରଫୁଲ୍ଲଙ୍କ ଅନୁପସ୍ଥିତିରେ ସରୋଜ ତାଙ୍କ ଘରେ ରହୁଥିଲେ। ଏ କଥା ଜାଣିବା ପରେ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ ଦିନକୁ ଦିନ ଝଗଡା ବଢ଼ିବାରେ ଲାଗିଥିଲା। ମିତା ପ୍ରେମିକ ସରୋଜ ସହ ମିଶି ସ୍ବାମୀଙ୍କୁ ସବୁଦିନ ପାଇଁ ରାସ୍ତାରୁ ହଟାଇ ଦେବାକୁ ଯୋଜନା କରିଥିଲେ। ୨୦୨୦ ଜାନୁଆରୀ ୨୧ ତାରିଖ ରାତିରେ ପ୍ରଫୁଲ୍ଲ ଘରକୁ ଆସିବା ବେଳେ ଭିତରେ ସରୋଜ ଥିବା ଦେଖି ତାଙ୍କୁ ବିରୋଧ କରିଥିଲେ। ପରେ ମିତା ଓ ସରୋଜ ମିଶି ତାଙ୍କୁ ଆକ୍ରମଣ କରିବା ସହ ତଣ୍ଟି ଚିପି ହତ୍ୟା କରିଥିଲେ। ପ୍ରଫୁଲ୍ଲଙ୍କ ଦାଦା ପୁଅ ଭାଇ ମହେନ୍ଦ୍ର ଏ ନେଇ ସଦର ଥାନାରେ ଅଭିଯୋଗ କରିଥିଲେ। ପୋଲିସ ନଂ.୧୯/୨୦ରେ ମାମଲା ରୁଜୁ କରି ମିତା ଓ ସରୋଜଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। କୋର୍ଟରେ ୧୭ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ମାମଲାର ପ୍ରତ୍ୟକ୍ଷଦର୍ଶୀ ଥିବା ପ୍ରଫୁଲ୍ଲଙ୍କ ୨ ପୁଅ, ଭଣଜାଙ୍କ ବୟାନ, ପୋଲିସ ପକ୍ଷରୁ ଦାଖଲ ଚାର୍ଜଶିଟ୍କୁ ଆଧାର କରି ଜଜ୍ ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ପକ୍ଷରୁ ଅତିରିକ୍ତ ପିପି ସୌଭାଗ୍ୟ କୁମାର ମିଶ୍ର ମକଦ୍ଦମା ପରିଚାଳନା କରୁଥିଲେ।
