ସୋସୋ,୭।୪(ସତ୍ୟବ୍ରତ ଜେନା)କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ ଦଧିବାମନପୁର ସ୍ବାସ୍ଥ୍ୟ ଉପକେନ୍ଦ୍ରରେ ସ୍ବାସ୍ଥ୍ୟ ସେବା ବ୍ୟାହତ ହୋଇଛି। ଏଠାରେ ନିୟୋଜିତ ଗୋଷ୍ଠୀ ସ୍ବାସ୍ଥ୍ୟ କର୍ମୀଙ୍କ ମନମାନୀ ଯୋଗୁ ଗ୍ରାମାଞ୍ଚଳରେ ଲୋକେ ଉପଯୁକ୍ତ ସେବା ପାଇପାରୁନାହାନ୍ତି। ଅନେକ ସମୟରେ ରୋଗୀଙ୍କୁ ଦୁର୍ବ୍ୟବହାର କରାଯିବା ସହ ନିରାମୟ ଔଷଧ ଦେବାକୁ ମନା କରିଦେଉଥିବା ମଧ୍ୟ ଅଭିଯୋଗ ହୋଇଛି। ସରକାରଙ୍କ ଦ୍ୱାରା ଗ୍ରାମାଞ୍ଚଳରେ ଯୋଜନା ଫଳପ୍ରଦ ହୋଇପାରୁନାହିଁ।
ସୂଚନା ମୁତାବକ, ଦଧିବାମନପୁର ଗ୍ରାମର ସୁନା ଯେନା (୬୨) ଗତ ୫ ଦିନ ହେବ ଜ୍ୱର ଓ ଥଣ୍ଡାରେ ଆକ୍ରାନ୍ତ ହୋଇ ଚିକିତ୍ସା ପାଇଁ ନିୟମିତ ସ୍ବାସ୍ଥ୍ୟକେନ୍ଦ୍ରକୁ ଦୌଡୁଛନ୍ତି। ଗୁରୁବାର ସକାଳ ୮ଟା ୩୦ରେ ମଧ୍ୟ ସ୍ବାସ୍ଥ୍ୟକେନ୍ଦ୍ରକୁ ଆସିଥିବା ବେଳେ ଗୋଷ୍ଠୀ ସ୍ବାସ୍ଥ୍ୟକର୍ମୀ ନ ଥିବାରୁ ନିରାଶ ହୋଇ ଫେରିଯାଇଥିବା କହିଛନ୍ତି। ପୂର୍ବରୁ ହେମଲତା ଯେନା ନାମକ ମହିଳା ଜ୍ୱରରେ ଆକ୍ରାନ୍ତ ହୋଇ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ର ଦଧିବାମନପୁରକୁ ଚିକିତ୍ସା ପାଇଁ ଯାଇଥିଲେ। ସେଠାରେ କେହି କର୍ମଚାରୀ ନ ଥିବାରୁ ନିରାଶ ହୋଇ ତରତରା ମେଡିକାଲକୁ ଯାଇ ଚିକିତ୍ସିତ ହୋଇଥିଲେ। ସେହିପରି ଉକ୍ତ ଗ୍ରାମର ଅନାମ ଯେନା ବିଦ୍ୟୁତ୍ ଆଘାତରେ ଆହତ ହୋଇଥିବାରୁ ପରିବାର ଲୋକେ ଏଠାକୁ ଆଣିଥିବା ବେଳେ ମୁଖ୍ୟ ଫାଟକରେ ତାଲା ଝୁଲୁଥିବା ଦେଖି ଆନନ୍ଦପୁର ଉପଖଣ୍ଡ ଚିକିତ୍ସାଳୟ ନେଇ ଚିକିତ୍ସା କରାଇଥିଲେ। ଅନୁରୂପ ହେମ ଯେନା ନାମକ ମହିଳା ଗୁରୁବାର ବ୍ଲଡ଼୍ ପେସର ମାପିବାକୁ ସ୍ବାସ୍ଥ୍ୟକେନ୍ଦ୍ର ଯାଇଥିଲେ। କେହି ନ ଥିବା ଦେଖି ନିରାଶ ହୋଇ ଘରକୁ ଫେରିଥିଲେ। ସ୍ବାସ୍ଥ୍ୟ ଓ ଆରୋଗ୍ୟ ଉପକେନ୍ଦ୍ରଗୁଡ଼ିକ ସକାଳ ୮ଟାରୁ ଅପରାହ୍ନ ୧ ଘଟିକା ପର୍ଯ୍ୟନ୍ତ ଖୋଲା ରହିବା ସରକାରୀ ନିୟମ ଅନୁଯାୟୀ। କିନ୍ତୁ ଏଠାରେ ଗୋଷ୍ଠୀ ସ୍ବାସ୍ଥ୍ୟକର୍ମୀ ମନମାନୀ ଚଳାଇ ତାଙ୍କ ସୁବିଧାରେ ଉପକେନ୍ଦ୍ରକୁ ଖୋଲୁଛନ୍ତି। ଏଥିସହ ମେଡିକାଲକୁ ଆସୁଥିବା ରୋଗୀଙ୍କୁ ଦୁର୍ବ୍ୟବହାର କରି ଆମ୍ବଗଡ଼ିଆ ଓ ଦଧିବାମନପୁର ଲୋକଙ୍କ ଦେହ ପ୍ରତିଦିନ କ’ଣ ଖରାପ ହେଉଛି। ଯଦି ଖରାପ ହେଉଛି ମେଡିସିନ ଦୋକାନରୁ ଔଷଧ କି’ଣି କାହିଁକି ଖାଉନ ବୋଲି କହୁଛନ୍ତି। ନିରାମୟ ଯୋଜନା ବ୍ୟବସ୍ଥା କାହିଁକି କରାଯାଇଛି ବୋଲି ପଚାରିଲେ ଗୋଷ୍ଠୀ ସ୍ବାସ୍ଥ୍ୟକର୍ମୀ ରୋଗୀଙ୍କ କଟୁ ମନ୍ତବ୍ୟରେ ଦୁର୍ବ୍ୟବହାର କରୁଥିବା ନେଇ ସୁନା ଯେନାଙ୍କ ସମେତ ଅନ୍ୟରୋଗୀମାନେ ଅଭିଯୋଗ କରିଛନ୍ତି। ଏପରି କି ନିରାମୟ ଔଷଧକୁ ରୋଗୀଙ୍କୁ ପ୍ରଦାନ କରିବା ପରିବର୍ତ୍ତେ ଫୋପଡ଼ା ଯାଉଥିବାରୁ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି। ଏଥିସହ ସ୍ବାସ୍ଥ୍ୟକେନ୍ଦ୍ରରେ ନିୟୋଜିତ ଜଣେ ପୁରୁଷ ଓ ଜଣେ ମହିଳା ଏଏନ୍ଏମ୍ ମଧ୍ୟ ନିୟମିତ ଅସୁ ନ ଥିବା ଅଭିଯୋଗ ହୋଇଛି। ଏ ସମ୍ପର୍କରେ ଗୋଷ୍ଠୀ ସ୍ବାସ୍ଥ୍ୟ କର୍ମୀ ମିନତୀ ଜେନା କହିଛନ୍ତି, ଠିକ୍ ସମୟରେ ସକାଳେ ଅଫିସ ଆସି ସରପଞ୍ଚଙ୍କ ପାଖକୁ ଯାଇଥିଲେ। ଅଭିଯୋଗକୁ ଅସ୍ବୀକାର କରିବା ସହ ତମେ କାହିଁକି ମୋ ପଛରେ ପଡ଼ିଛ, ତମେ କିଏ ମତେ ପ୍ରଶ୍ନ କରିବାକୁ? କହି ଫୋନ କାଟିଦେଇଥିଲେ। ଶାଳନିଆଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଅଧିକାରୀ ପ୍ରଭାତ ନାୟକ କହିଛନ୍ତି, ଏହା ଏକ ନିନ୍ଦନୀୟ ଘଟଣା, ଏହାର ତଦନ୍ତ କରି ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
