ନୂଆଦିଲ୍ଲୀ,୨।୬: ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି କରି କହିଛନ୍ତି ଯେ, କେବଳ ବିବାହ ହୋଇଯାଇଥିବା କାରଣରୁ ଜଣେ ଝିଅକୁ ତାର ବାପଘର ପରିବାରରୁ ଅଲଗା ବୋଲି ଭାବିବା ସମ୍ପୂର୍ଣ୍ଣ ଭେଦଭାବପୂର୍ଣ୍ଣ ଅଟେ। ଅଦାଲତ ସ୍ପଷ୍ଟ କରିଛନ୍ତି ଯେ, ଯେଭଳି ଜଣେ ବିବାହିତ ପୁଅ ବିବାହ ପରେ ମଧ୍ୟ ପରିବାରର ସଦସ୍ୟ ଭାବେ ରହିଥାଏ, ସେହିପରି ଜଣେ ଝିଅର ସମ୍ପର୍କ ମଧ୍ୟ ବିବାହ ପରେ ତାର ବାପଘର ସହ ଶେଷ ହୋଇଯାଏ ନାହିଁ।
ଏହି ପ୍ରସଙ୍ଗରେ କୋର୍ଟ କହିଛନ୍ତି ଯେ ସରକାର କିମ୍ୱା କୌଣସି ସଂସ୍ଥା କେବଳ ‘ବିବାହିତ’ ବୋଲି ଦର୍ଶାଇ ଝିଅକୁ ତାର ପ୍ରାପ୍ୟ ବା ଅଧିକାର ଦେବାରୁ ବଞ୍ଚିତ କରିପାରିବେ ନାହିଁ।
ପୁଅ ଏବଂ ଝିଅ ମଧ୍ୟରେ ଲିଙ୍ଗଗତ ଭେଦଭାବ କରାଯାଇପାରିବ ନାହିଁ। ବିବାହ ପରେ ମଧ୍ୟ ଝିଅ ନିଜ ବାପା-ମା’ଙ୍କ ପରିବାରର ଏକ ଅଂଶ ହୋଇ ରହିଥାଏ।
ସମାଜରେ ପ୍ରଚଳିତ ପୁରୁଷତାନ୍ତ୍ରିକ ଚିନ୍ତାଧାରା ଯେଉଁଠି “ଝିଅମାନେ ପରଘରୀ” ବୋଲି କୁହାଯାଏ, ତାହା ଆଇନଗତ ଭାବେ ଗ୍ରହଣୀୟ ନୁହେଁ। ବିଭିନ୍ନ ସରକାରୀ ଯୋଜନା, ଅନୁକମ୍ପାମୂଳକ ନିଯୁକ୍ତି (Compassionate Appointment) କିମ୍ୱା ସମ୍ପତ୍ତି ଅଧିକାର କ୍ଷେତ୍ରରେ ବିବାହିତ ଝିଅମାନଙ୍କୁ ସମାନ ସୁଯୋଗ ମିଳିବା ଉଚିତ।
