ପୁରୁଷୋତ୍ତମପୁର,୭ା୯(ସୀମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଏନ୍ଡି ହାଇସ୍କୁଲର ୧୯୮୪ ମାଟ୍ରିକ୍ ବ୍ୟାଚ୍ ଛାତ୍ରଙ୍କ ପକ୍ଷରୁ ଶିକ୍ଷା-ଶିକ୍ଷକ ସମ୍ପର୍କ କାର୍ଯ୍ୟକ୍ରମ ଓ ଗୁରୁ ସମ୍ବର୍ଦ୍ଧନା ଉସବ ରବିବାର କଲ୍ୟାଣମଣ୍ଡପ ପରିସରରେ ପ୍ରାକ୍ତନ ଛାତ୍ର ଡାକ୍ତର ମାନସ ରଞ୍ଜନ ବେହେରାଙ୍କ ସଂଯୋଜନାରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ଅବସରପ୍ରାପ୍ତ ବର୍ଷିଆନ ଶିକ୍ଷକ ଏ.ରାଜୁଗୋପାଳ ରାଓ, ସୂର୍ଯ୍ୟ ନାରାୟଣ ରଥ, ହୟଗ୍ରିବ ତ୍ରିପାଠୀ ଓ ଶରତ ଚନ୍ଦ୍ର ଦାଶ ଯୋଗଦେଇ ଗୁରୁ ବିନା କୌଣସି କାର୍ଯ୍ୟ ଅସମ୍ଭବ ବୋଲି କହି କେବଳ ପାଠପଢାରେ ନୁହେଁ ଯିଏ ଯାହାଠାରୁ ଯେଉଁ ଶିକ୍ଷା ହାସଲ କରିଥାଏ ସିଏ ତାଙ୍କର ଗୁରୁ। ମା’ ବାପା ହିଁ ଆମର ପ୍ରଥମ ଗୁରୁ ଅଟନ୍ତି। ସେମାନଙ୍କୁ ସର୍ବଦା ଭକ୍ତି କରିବାକୁ ପରାମର୍ଶ ଦେଇଥିଲେ। ଏହାସହ ଶିକ୍ଷକମାନେ ପାରିଶ୍ରମିକ ପଛରେ ନ ପଡି ପିଲାଙ୍କୁ ସ୍ନେହ ଦେଇ ତାଙ୍କର ଭବିଷ୍ୟତ ପ୍ରତି ଗୁରୁତ୍ୱ ଦେବାକୁ ଆଜିର ଶିକ୍ଷକ ସମାଜକୁ ଆହ୍ବାନ ଦେଇଥିଲେ। ଦୀର୍ଘ ୪୧ ବର୍ଷ ପରେ ନିଜର ଛାତ୍ରମାନଙ୍କୁ ପାଖରେ ପାଇ ଶିକ୍ଷକମାନେ ଆତ୍ମବିଭୋର ହୋଇପଡ଼ି ସେମାନଙ୍କ ଉଜ୍ଜ୍ବଳ ଭବିଷ୍ୟତ କାମନା କରିଥିଲେ। ଏହି ଅବସରରେ ଛାତ୍ରମାନେ ମଧ୍ୟ ନିଜର ଗୁରୁଙ୍କୁ ସମ୍ବର୍ଦ୍ଧିତ କରିଥିଲେ। ଏହାକୁ ପ୍ରାକ୍ତନ ଛାତ୍ର ଅନୁପ କୁମାର ପାଢ଼ୀ, କିଶୋର ସାହୁ, ରଜନୀକାନ୍ତ ଦାଶ, ପ୍ରହଲ୍ଲାଦ ନାୟକ, ନରେନ୍ଦ୍ର ସେନାପତି, ବଳରାମ ବେହେରା ପ୍ରମୁଖ ପରିଚାଳନା କରିଥିବାବେଳେ ବହୁ ପୁରାତନ ଛାତ୍ର ଯୋଗଦେଇଥିଲେ।
