ଗାଁ ଭିତରେ ପଶି ୩ ଜଣଙ୍କୁ ଗୋଡ଼ାଇ ଗୋଡ଼ାଇ କାମୁଡ଼ିଲା ଭାଲୁ
1:12 pmMarch 27, 2023March 27, 2023 / 05

ପାଟଣା,୨୭ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ରେଞ୍ଜ ସାହାରପଡ଼ା ସେକ୍ସନ ରାଇଡିହା ବିଟ୍‌ ଖିଲାରୀ ପାଟନୂଆଗାଁରେ ସୋମବାର ଏକ ବଣୁଆ ଭାଲୁ ଆକ୍ରମଣରେ ୩ ଜଣ ଗୁରୁତର ହୋଇଛନ୍ତି।  ଗୁରୁତର ବ୍ୟକ୍ତିମାନେ ହେଲେ ପାଟଣା ବ୍ଲକ ଡୁମୁରିଆ ପଞ୍ଚାୟତ ବଡ଼ ନୂଆଗାଁର ବୀବବଲ ମହାନ୍ତ (୫୫),ମଙ୍ଗୁଳୁ ବେହେରା(୩୦) ଓ ସାହାରପଡ଼ା ବ୍ଲକ ଟେଣ୍ଡେରା ପଞ୍ଚାୟତ ଖିଲାରୀପାଟ ନୂଆଗାଁ ଗ୍ରାମର ରାମଚନ୍ଦ୍ର ପାଇଦା(୨୫)। ଭାଲୁ ଆକ୍ରମଣରେ ବୀରବଲଙ୍କ ପେଟ, ମୁଣ୍ଡ ଓ ୨ ହାତ ରେ ଗଭୀର କ୍ଷତ ହୋଇଥିବା ବେଳେ ତାଙ୍କ ଅବସ୍ଥା ସଙ୍କଟାପନ୍ନ ରହିଛି। ରାମ ଚନ୍ଦ୍ରଙ୍କ ୨ ହାତରେ ଗଭୀର କ୍ଷତ ହୋଇଛି। ମଙ୍ଗଳୁଙ୍କ ବାମ ଜଙ୍ଘରେ କ୍ଷତ ହୋଇଛି। ୩ ଜଣଙ୍କୁ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଛି। ଏବେ ଖିଲାରୀ ପାଟ ନୂଆଗାଁ ଗାଁ କାଜୁ ଜଙ୍ଗଲରେ ନିକଟରେ ରକ୍ତମୁଖା ଭାଲୁ ବୁଲୁଥିବାରୁ ଲୋକେ ଭୟଭୀତ ଥିବା ବେଳେ ଭାଲୁକୁ ଘୋଉଡ଼ାଇବା ଦାବିରେ ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଛି।