ନୂଆଦିଲ୍ଲୀ,୧୮ା୧୨: କେରଳର ବିକାଶମୂଳକ କାର୍ଯ୍ୟକୁ ନେଇ କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନିତିନ ଗଡ଼କରୀଙ୍କୁ ଭେଟିଛନ୍ତି ୱାୟାନାଡ୍ ସାଂସଦ ପ୍ରିୟଙ୍କା ଗାନ୍ଧୀ ଭାଦ୍ରା। ସଂସଦ ଭବନ ପରିସରରେ ଅନୁଷ୍ଠିତ ଏହି ବୈଠକରେ କେବଳ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଉପରେ ଚର୍ଚ୍ଚା ହୋଇନାହିଁ, ବରଂ ହସଖୁସି ଓ ସୁଆଦିଆ ଖାଦ୍ୟର ଆସର ମଧ୍ୟ ଦେଖିବାକୁ ମିଳିଛି।
ପ୍ରିୟଙ୍କା ଗାନ୍ଧୀ କେରଳ ଦେଇ ଯାଇଥିବା ୬ଟି ଗୁରୁତ୍ୱପୂର୍ଣ୍ଣ ସଡ଼କ ପ୍ରକଳ୍ପ ବିଷୟରେ ମନ୍ତ୍ରୀଙ୍କ ସହ ଆଲୋଚନା କରିଥିଲେ। ଗଡ଼କରୀ କହିଥିଲେ ଯେ, ଏଥିମଧ୍ୟରୁ କିଛି ପ୍ରକଳ୍ପ ରାଜ୍ୟ ସରକାରଙ୍କ ଅଧୀନରେ ରହିଛି, ତଥାପି ଅନ୍ୟ ପ୍ରକଳ୍ପଗୁଡ଼ିକୁ କେନ୍ଦ୍ର ସରକାର ଅନୁଧ୍ୟାନ କରିବେ ବୋଲି ସେ ଆଶ୍ୱାସନା ଦେଇଛନ୍ତି।
ଆଲୋଚନା ସମୟରେ ଏକ ହାସ୍ୟରୋଳ ସୃଷ୍ଟି ହୋଇଥିଲା ଯେତେବେଳେ ଗଡ଼କରୀ କହିଥିଲେ ଯେ, ନିକଟରେ ରାହୁଲ ଗାନ୍ଧୀ ମଧ୍ୟ ତାଙ୍କ ନିର୍ବାଚନ ମଣ୍ଡଳୀ ରାୟବରେଲିର କାମ ପାଇଁ ଆସିଥିଲେ। ଗଡ଼କରୀ ମଜାରେ କହିଥିଲେ, “ଭାଇର କାମ କରିଦେଲି, ଯଦି ଭଉଣୀର କାମ କରିବିନି, ତେବେ ଆପଣ କହିବେ ଯେ ମୁଁ କଲି ନାହିଁ।” ଏହା ଶୁଣି ପ୍ରିୟଙ୍କା ଓ ସେଠାରେ ଉପସ୍ଥିତ ଥିବା କଂଗ୍ରେସ ନେତା ଦୀପେନ୍ଦ୍ର ସିଂହ ହୁଡ୍ଡା ହସିବାକୁ ଲାଗିଥିଲେ।
ରାଜନୈତିକ ଆଲୋଚନା ମଧ୍ୟରେ ଖାଦ୍ୟର ଚର୍ଚ୍ଚା ମଧ୍ୟ ହୋଇଥିଲା। ନିତିନ ଗଡ଼କରୀ ୟୁଟ୍ୟୁବ୍ ଭିଡିଓ ଦେଖି ନିଜେ ଏକ ସ୍ୱତନ୍ତ୍ର ଚାଉଳର ବ୍ୟଞ୍ଜନ ପ୍ରସ୍ତୁତ କରିଥିଲେ। ସେ ପ୍ରିୟଙ୍କାଙ୍କୁ ଏହି ଖାଦ୍ୟ ଚାଖିବା ପାଇଁ ଅନୁରୋଧ କରିଥିଲେ। ପ୍ରିୟଙ୍କା ଓ ଦୀପେନ୍ଦ୍ର ହୁଡ୍ଡା ଚଟଣି ସହିତ ସେହି ରାଇସ୍ ବଲ୍ର ଆନନ୍ଦ ନେଉଥିବା ଦେଖିବାକୁ ମିଳିଥିଲା।
