ଲଣ୍ଡନ,୨୩ା୭ ନୂଆ ସ୍ଥାନ ବୁଲିବା ପ୍ରାୟତଃ ସବୁ ବୟସ ବର୍ଗର ଲୋକଙ୍କ ପସନ୍ଦ। ସେମାନଙ୍କ ଭିତରୁ ଜଣେ ହେଲେ ଆଦିତୀ ତ୍ରିପାଠୀ। ବୟସ ମାତ୍ର ୧୦ ବର୍ଷ କିନ୍ତୁ ବର୍ତ୍ତମାନ ସୁଦ୍ଧା ସେ ୫୦ରୁ ଊର୍ଦ୍ଧ୍ୱ ଦେଶ ବୁଲି ସାରିଲେଣି। ତାହା ପୁଣି ସ୍କୁଲରୁ ଛୁଟି ନ ନେଇ। ଆଦିତୀଙ୍କ ବିଦେଶ ଭ୍ରମଣ ପଛରେ ତାଙ୍କ ବାପା ଦୀପକ ଓ ମା’ ଅଭିଳାଷା ତ୍ରିପାଠୀଙ୍କର ବଡ଼ ଭୂମିକା ରହିଛି। ଆଦିତୀ ପରିବାର ସହ ସାଉଥ୍ ଲଣ୍ଡନରେ ରୁହନ୍ତି। ଏବେସୁଦ୍ଧା ସେ ୟୁରୋପର ଅନେକ ଦେଶ ସହିତ ପାଖାପାଖି ୫୦ରୁ ଊର୍ଦ୍ଧ୍ୱ ରାଷ୍ଟ୍ର ସେ ବୁଲିସାରିଛନ୍ତି। ଦୀପକ ଓ ଅଭିଳାଷା ଦୁହେଁ ଲଣ୍ଡନର ଏକ ବ୍ୟାଙ୍କରେ ଆକାଉଣ୍ଟାଣ୍ଟ ଭାବେ କାର୍ଯ୍ୟ କରନ୍ତି। ବିଭିନ୍ନ ଦେଶର ପରମ୍ପରା, ଖାଦ୍ୟ ଓ ସଂସ୍କୃତି ବିଷୟରେ ଅବଗତ କରାଇବା ଲାଗି ଦୀପକ ଓ ଅଭିଳାଷା ଆଦିତୀଙ୍କୁ ଛୋଟବେଳୁ ବିଦେଶ ଭ୍ରମଣ କରାଇବା ପାଇଁ ନିଷ୍ପତ୍ତି ନେଇଥିବା କୁହନ୍ତି। ଝିଅକୁ ବିଦେଶ ବୁଲାଇବା ଯୋଗୁ କେବେ ସେମାନଙ୍କୁ ସ୍କୁଲରୁ ଛୁଟି ଆଣିବାକୁ ପଡ଼ିନାହିଁ କି କେବେ ଆଦିତୀ କ୍ଲାସ୍ ବନ୍ଦ କରି ନାହାନ୍ତିି। ଆଦିତୀଙ୍କୁ ୩ବର୍ଷ ବୟସ ହୋଇଥିବାବେଳେ ସେ ପ୍ରଥମ ବିଦେଶ ଭ୍ରମଣ କରିଥିଲେ। ସେତେବେଳେ ଆଦିତୀ ନର୍ସରିରେ ପଢ଼ୁଥିଲେ। ବାହାର ଦେଶକୁ ବୁଲିଯିବା ଲାଗି ବେଳେବେଳେ ଆଦିତୀଙ୍କୁ ସିଧା ସ୍କୁଲରୁ ବିମାନବନ୍ଦର ଯିବାକୁ ପଡ଼େ। ପ୍ରାୟ ସମୟ ଦୀପକ, ଅଭିଳାଷା ଓ ଆଦିତୀ ବିଦେଶ ଭ୍ରମଣ ସାରି ରବିବାର ବିଳମ୍ବିତ ରାତିରେ ଫେରନ୍ତି ତ ଆଉ କେତେବେଳେ ଫେରୁ ଫେରୁ ସୋମବାର ସକାଳ ହୋଇଯାଏ, ଆଉ ଆଦିତୀଙ୍କୁ ବିମାନବନ୍ଦରରୁ ହିଁ ସ୍କୁଲ ଯିବାକୁ ପଡ଼େ। ସେମାନଙ୍କ ବିଦେଶ ଭ୍ରମଣରେ ବର୍ଷକୁ ୨୦,୦୦୦ ପାଉଣ୍ଡ (ପାଖାପାଖି ୨୧ ଲକ୍ଷ) ଟଙ୍କା ଖର୍ଚ୍ଚ ହେଉଥିବା ଦୀପକ କହିଛନ୍ତି। ବିଶେଷ କରି ସ୍କୁଲ ଛୁଟି, ବ୍ୟାଙ୍କ ଛୁଟିଦିନ ଓ ନ୍ୟାଶନାଲ ଛୁଟିଗୁଡ଼ିକରେ ଦୀପକ ବିଦେଶ ଭ୍ରମଣର ଯୋଜନା ପ୍ରସ୍ତୁତ କରନ୍ତି। ଯେଉଁଥିପାଇଁ କାହାରିକୁ ଛୁଟି ନେବାକୁ ପଡ଼ୁ ନ ଥିବା ଅଭିଳାଷା କହିଛନ୍ତି।
ଝିଅକୁ ବିଦେଶ ବୁଲେଇବା ପାଇଁ ଦୀପକ ଓ ଅଭିଳାଷାଙ୍କୁ ଘର ଖର୍ଚ୍ଚ ପାଇଁ ଏକ ନିର୍ଦ୍ଦିଷ୍ଟ ବଜେଟ୍ ପ୍ରସ୍ତୁତ କରିବାକୁ ପଡ଼େ। ଏଥିପାଇଁ ସେମାନେ କେବେ ବାହାରେ ଖାଆନ୍ତି ନାହିଁ। ଏବେସୁଦ୍ଧା ସେମାନେ ନିଜର ଏକ କାର୍ କିଣି ନାହାନ୍ତି। ବସ୍, ଟାକ୍ସିରେ ସେମାନେ ଅଫିସ ଯିବା ଆସିବା କରନ୍ତି। ଏଥିସହ ଯାତାୟାତ ଖର୍ଚ୍ଚ ବଞ୍ଚାଇବା ପାଇଁ ସୁବିଧା ହେଲେ ଓ୍ବାର୍କ ଫ୍ରମ୍ ହୋମ୍ କରିବା ସହ ଆଦିତୀଙ୍କ ସାନ ଭଉଣୀ ଅଦ୍ୱିତାଙ୍କ ଯତ୍ନ ନେଇଥାନ୍ତି। କୋଭିଡ୍ ସଂକ୍ରମଣ ପୂର୍ବରୁ ସେମାନେ ପାଖାପାଖି ୧୨ ଦେଶ ବୁଲିସାରିଥିବା ଦୀପକ କୁହନ୍ତି। ବୁଲିିଥିବା ସବୁଦେଶ ଭିତରୁ ଆଦିତୀଙ୍କୁ ନେପାଳ, ଜର୍ଜିଆ ଏବଂ ଆର୍ମେନିଆ ସବୁଠୁ ଅଧିକ ପସନ୍ଦ ବୋଲି ସେ କହିଛନ୍ତି। ଅନ୍ୟ ଦେଶର ପରମ୍ପରା ଓ ରୀତିନୀତି ବିଷୟରେ ଜାଣିବା ତାଙ୍କୁ ଖୁବ୍ ପସନ୍ଦ। ନିକଟରେ ସେ ଫ୍ରାନ୍ସ, ଇଟାଲୀ ଏବଂ ଅଷ୍ଟ୍ରେଲିଆ ବୁଲି ଫେରିଛନ୍ତି।
