ସୋରଡା,୧।୪(ରଜନୀ ମହାପାତ୍ର): ଗଞ୍ଜାମ ଜିଲା ସୋରଡା ଉପନିବନ୍ଧକଙ୍କ କାର୍ଯ୍ୟାଳୟରେ ଜମି କିଣାବିକାରେ ଜାଲିଆତି ହେଉଥିବା ଅଭିଯୋଗ ହେଉଛି। ଜାଲ୍ ଆଧାରକାର୍ଡ ପ୍ରସ୍ତୁତ କରି ଜାଲ ଦସ୍ତଖତରେ ଜଣେ ମୃତ ବ୍ୟକ୍ତିଙ୍କ ଜମି ବିକ୍ରି ହୋଇଥିବା ଘଟଣା ଏବେ ପଦାକୁ ଆସିଛି। ମୃତ ପରିବାର ଲୋକଙ୍କ ଉତ୍ତରାଧିକାରୀମାନେ ଏ ସମ୍ପର୍କରେ ଖବର ପାଇବା ପରେ ସୋରଡା ଉପନିବନ୍ଧକଙ୍କ କାର୍ଯ୍ୟାଳୟ ସମେତ ସୋରଡା ତହସିଲଦାର ଓ ସୋରଡା ଥାନାରେ ଲିଖିତ ଅଭିଯୋଗ କରି ଏହାର ତଦନ୍ତ ଦାବି କରିଛନ୍ତି। ଏହାକୁ ଗୁରତର ସହ ନେଇ ସୋରଡା ପୋଲିସ ତଦନ୍ତ ଆରମ୍ଭ କରିଛି।
ଅଭିଯୋଗରୁ ପ୍ରକାଶ, ସୋରଡା ତହସିଲ ଅନ୍ତର୍ଗତ ପିପଳପଙ୍କା ମୌଜାରେ ସୋରଡା ପାଇକ ସାହିର ଆଜକୁ ୩୦ ବର୍ଷ ତଳେ ମୃତ୍ୟୁବରଣ କରିଥିବା ମୋହନ ଚାନ୍ଦ ଗୌଡ, ଗୋବିନ୍ଦ ଗୌଡ, ରଘୁନାଥ ଗୌଡ, ସହଦେବ ଗୌଡ, ସୋମନାଥ ଗୌଡଙ୍କ ନାମରେ ଉକ୍ତ ମୌଜା ଖାତା ନମ୍ବର ୮୭ରେ ପ୍ରାୟ ୨୦ ଭରଣ ଜମି ରହିଛି। ଏହି ସବୁ ଜମିକୁ ହଡପ ପାଇଁ ଏହି ବ୍ଲକ ଅନ୍ତର୍ଗତ ଭଗବାନପୁର ଗ୍ରାମର ଜଣେ ବ୍ୟକ୍ତି ନିଜ ଜନସେବା କେନ୍ଦ୍ର ମାଧ୍ୟମରେ ଯୋଜନା କରି ମୃତ ବ୍ୟକ୍ତିଙ୍କୁ ଜୀବିତ ଦର୍ଶାଇ ବେନାମୀ ଲୋକଙ୍କ ଫୋଟ ଲଗାଇ ଆଧାର କାର୍ଡ ପ୍ରସ୍ତୁତ କରିଥିଲେ। ନକଲି ଆଧାର କାର୍ଡ ପ୍ରସ୍ତୁତ କରିବା ପରେ ସେହି ସମୟରେ ଥିବା ରାଜସ୍ବ ନିରୀକ୍ଷକଙ୍କୁ ଉକ୍ତ ଜମିର ନକ୍ସା ପ୍ରସୂତ ପାଇଁ କହିଥିଲେ। ରାଜସ୍ବ ନିରୀକ୍ଷକ ଉକ୍ତ ଜାଗାକୁ ନ ଯାଇ ଜାଗାର ନକ୍ସା ପ୍ରସ୍ତୁତ କରିଥିବା ଅଭିଯୋଗ ହେଇଛି। ସମସ୍ତ ମୃତ ବ୍ୟକ୍ତିଙ୍କୁ ଜୀବିତ ଦର୍ଶାଇ ଗତ ୧୯ା୩ା୨୬ରେ ସୋରଡା ଉପନିବନ୍ଧଙ୍କ କାର୍ଯ୍ୟାଳୟରେ ଦଲିଲ ପ୍ରସ୍ତୁତ କରାଯିବା ସହ ମୃତ ବ୍ୟକ୍ତିଙ୍କ ନାମରେ ଜୀବିତ ବ୍ୟକ୍ତିଙ୍କୁ ଠିଆ କରି ଦସ୍ତଖତ ନିଆଯିବା ସହ ଏହି ନକଲି ଦଲିଲ ପ୍ରସ୍ତୁତ କରାଯିବା ସହ ଦୁଇ ଜଣଙ୍କୁ ସାକ୍ଷୀ ରୂପେ ମଧ୍ୟ ଉପସ୍ଥିତ କରାଯାଇ ୧୦୬୯୨୬୦୦୨୮୪ ପ୍ରକାରେ ଦଲିଲ ପଞ୍ଜୀକୃତ କରାଯାଇଥିଲା। ଏ ସମ୍ପର୍କରେ ଖବର ପାଇବା ପରେ ମୃତ ବ୍ୟକ୍ତି ସୋମନାଥ ଗୌଡଙ୍କ ପୁଅ ଗୋପୀନାଥ ଗୌଡ ଉପନିବନ୍ଧକଙ୍କ କାର୍ଯ୍ୟାଳୟରେ ଲିଖିତ ଅଭିଯୋଗ କରିଥିଲେ। ଏ ସମ୍ପର୍କରେ ମୃତ ବ୍ୟକ୍ତିମାନଙ୍କ ଉତ୍ତରାଧିକାରୀ ମାନେ ସୋରଡା ଉପନିବନ୍ଧକଙ୍କ କାର୍ଯ୍ୟାଳୟରେ ଲିଖିତ ଅଭିଯୋଗ କରିବା ସହ ଏହାର ତଦନ୍ତ ଦାବି କର କରିଥିଲେ। ପରେ ଉପନିବନ୍ଧକ ପତ୍ର ସଂଖ୍ୟା ୩୯୩/ ତାରିଖ ୩୦ା୩ା୨୦୨୬ରେ ସୋରଡା ଥାନାରେ ଏହାର ତଦନ୍ତ କରି ଏଥିରେ ସମ୍ପୃକ୍ତ କ୍ରେତା ବିକ୍ରେତା ଓ ସାକ୍ଷୀମାନଙ୍କ ବିରୋଧରେ ପଦକ୍ଷେପ ନେବାକୁ ଜଣାଇଛନ୍ତି।
