ସୁନ୍ଦରଗଡ଼,୨୮ା୫(ଡି.ଏନ୍.ଏ): ସୁନ୍ଦରଗଡ଼ ଜିଲା ହେମଗିର ବ୍ଲକ ଡୁଲିଙ୍ଗାଠାରେ ଏନ୍ଟିପିସି ପକ୍ଷରୁ କୋଇଲା ଖଣି ଆରମ୍ଭ ହୋଇଛି। ଏଥିପାଇଁ ବିସ୍ଥାପିତ ହେବାକୁ ଥିବା ଖପୁରୀକଚ୍ଛାର ୬୪ପରିବାରଙ୍କୁ କ୍ଷତିପୂରଣ ଓ ଥଇଥାନ ନ କରି ଖଣି ଖନନ କାର୍ଯ୍ୟ ଚାଲୁଥିବା ଯୋଗୁଁ କୋଇଲା ଧୂଳି ଧୂଆଁରେ ଗ୍ରାମବାସୀ ହନ୍ତସନ୍ତ ହେଉଥିବା ଅଭିଯୋଗ ହୋଇଛି। କ୍ଷତିଗ୍ରସ୍ତ ପରିବାରଙ୍କୁ କ୍ଷତିପୂରଣ, ବିସ୍ଥାପନ ଓ ଥଇଥାନ ପରେ ଖଣି କାର୍ଯ୍ୟ କରାଯିବା କଥା। ମାତ୍ର କମ୍ପାନୀ କର୍ତ୍ତୃପକ୍ଷ ବିସ୍ଥାପିତଙ୍କ ଦାବି ପୂରଣ ନ କରି ଗାଁ ଚାରିପଟେ ପାହାଡ଼ ଭଳି ଓଭର ବର୍ଡନ କୋଇଲା ଓ ମାଟି ଗଦା କରୁଛି। ଧୂଳି, ଧୂଆଁ ସବୁ ଉଡ଼ି ଲୋକଙ୍କ ଘର ଭିତରେ ପସି ଆସବାବପତ୍ର ସବୁ କଳା ପଡ଼ିଯାଉଛି। ସେପଟେ କ୍ଷତି ପୂରଣ ମିଳି ନ ଥିବାରୁ ଲୋକେ ଗଁା ଛାଡ଼ି ଯିବାକୁ ରାଜି ନାହାନ୍ତି। ଅନ୍ୟ ପଟେ କମ୍ପାନୀ କହୁଛି ପ୍ରଥମେ ଘର ଛାଡ଼, ତାପରେ କ୍ଷତି ପୂରଣ ଦିଆଯିବ। କମ୍ପାନୀ କଥା ଶୁଣି ଗ୍ରାମର ୩୨ପରିବାର କ୍ଷତି ପୂରଣ ନ ପାଇ ମଧ୍ୟ ଗାଁ ଛାଡ଼ି ଗଲେଣି। ହେଲେ ୬୪ପରିବାର କ୍ଷତି ପୂରଣ ନ ମିଳିଲେ ଗାଁ ଛାଡ଼ିବୁ ନାହିଁ ବୋଲି କହିଛନ୍ତି। କମ୍ପାନୀର ଏଭଳି ମନମାନୀ କାର୍ଯ୍ୟ ବିରୁଦ୍ଧରେ ଗ୍ରାମବାସୀ ରାଜ୍ୟ ମାନବାଧିକାର କମିଶନଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗ ପରେ କମିଶନ ରିପୋର୍ଟ ତଲବ କରିଛନ୍ତି। ରିପୋର୍ଟ ନ ମିଳିବା ଯାଏଁ କାର୍ଯ୍ୟ ବନ୍ଦ ରଖିବାକୁ ନିର୍ଦ୍ଦେଶ ମଧ୍ୟ ଦେଇଛନ୍ତି। ହେଲେ କମ୍ପାନୀ ଏହାକୁ ଅଣଦେଖା କରି କାର୍ଯ୍ୟ ଚଳାଇଥିବାରୁ ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି। କୋଇଲା ଉତ୍ତୋଳନ ବେଳେ ବାହାରୁଥିବା ବର୍ଜ୍ୟ କୋଇଲା ଓ ମାଟିକୁ ଗଦା କରିବା ପାଇଁ ଖପୁରୀକଚ୍ଛା ଗାଁ ଓ ଜମିକୁ କମ୍ପାନୀ ଅଧିଗ୍ରହଣ କରିଛି। ଏ ସମ୍ପର୍କରେ କମ୍ପାନୀ କର୍ତ୍ତୃପକ୍ଷଙ୍କୁ ପଚାରିବାରୁ ପ୍ରତିକ୍ରିୟା ଦେବାକୁ ମନା କରି ଦେଇଥିଲେ। ଅତିରିକ୍ତ ଜିଲାପାଳ ଅଭିମନ୍ୟୁ ବେହେରାଙ୍କୁ ପଚାରିବାରୁ ଗାଁ ଲୋକଙ୍କ ସହିତ ଆଲୋଚନା ହୋଇଛି। ଆସନ୍ତା ୨ମାସ ମଧ୍ୟରେ ସମସ୍ତ କ୍ଷତିପୂରଣ ପ୍ରଦାନ କରାଯିବ ବୋଲି ସେ କହିଥିଲେ।
