ମାଲକାନଗିରି,୨୮ା୪ (ଡି.ଏନ୍.ଏ.): ଛତିଶଗଡ଼ର ଦାନ୍ତଓ୍ବୋଡା ଜିଲା ଅରଣପୁରଠାରେ ବୁଧବାର ଘଟିଥିବା ଲ୍ୟାଣ୍ଡମାଇନ ବିସ୍ଫୋରଣ ଘଟଣାକୁ ଭାରତୀୟ କମ୍ୟୁନିଷ୍ଟ ପାର୍ଟି, ଦର୍ଭା ଡିଭିଜନ କମିଟି ପକ୍ଷରୁ ସ୍ବୀକାର କରାଯାଇଛି। ଜାରି ଏକ ପ୍ରେସ୍ ବିଜ୍ଞପ୍ତିରେ ଦର୍ଭା କମିଟି ସଚିବ ସାଇନାଥ କହିଛନ୍ତି, କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମାଓବାଦୀ ଦଳକୁ କ୍ଷତି ପହଞ୍ଚାଇବା ଲାଗି ଜଳ, ଜମି ଏବଂ ଜଙ୍ଗଲ ପାଇଁ ଲଢେଇ କରୁଥିବା ସଙ୍ଗଠନକୁ ଦମନ କରିବାକୁ ପଦକ୍ଷେପ ନେଉଛନ୍ତି। ଦେଶ ବିରୋଧୀ କର୍ପୋରେଟ ସଂସ୍ଥାକୁ ବସ୍ତରର ପ୍ରାକୃତିକ ସମ୍ପଦ ଲୁଟ୍ ପାଇଁ ଯୋଜନା କରାଯାଉଛି। ଏହାକୁ ବିରୋଧ କରି କ୍ରାନ୍ତିକାରୀ ଆନ୍ଦୋଳନ କରୁଥିବା ସଙ୍ଗଠନକୁ ନିର୍ଯାତନା ଦିଆଯାଉଛି। ବସ୍ତର ଅଞ୍ଚଳକୁ ସୈନ୍ୟ ଛାଉଣିରେ ପରିଣତ କରି ଏସ୍ଓଜି ଓ କୋବ୍ରା ବାହିନୀ ମୁତୟନ କରି ଡ୍ରୋନ୍ ହେଲିକପ୍ଟର ଦ୍ୱାରା ଗ୍ରାମବାସୀଙ୍କୁ ଆକ୍ରମଣ କରାଯାଉଛି। ଏହା ବିରୋଧରେ ମାଓବାଦୀଙ୍କ ସଂଗ୍ରାମ ଜାରି ରହିଛି। ସଙ୍ଗଠନ ସାମନ୍ତବାଦୀ ଦଲାଲ, ପୁଞ୍ଜିପତି ଏବଂ ସାମ୍ରାଜ୍ୟବାଦ ବିରୋଧରେ ଲଢେଇ ଜାରି ରଖିଛି। ୪୦ ଲକ୍ଷ କୋଟି ଟଙ୍କା ଲୁଟ୍ କରିଥିବା ପୁଞ୍ଜିପତିଙ୍କୁ ମୋଦି ଓ ଶାହା ସହଯୋଗ କରୁଛନ୍ତି। ପୋଲିସ ଆମ ବିରୋଧୀ ନୁହେଁ। ପେଟପାଟଣା ପାଇଁ ପୋଲିସ ଚାକିରି କରୁଥିବା ଏହି ଯବାନଙ୍କୁ ସରକାର ବ୍ୟବହାର କରୁଛି ା ଏହି ଚାକିରି ତୁରନ୍ତ ଛାଡିବା ପାଇଁ ଜାରି ବିଜ୍ଞପ୍ତିରେ କୁହାଯାଇଛି। ସୂଚନାଯୋଗ୍ୟ, ଜାରି ବିଜ୍ଞପ୍ତିରେ ମୁଖ୍ୟତଃ ୪ଟି ଦାବି ରହିଛି। ସରକାରଙ୍କ ଦ୍ୱାରା ଦମନ ବଢିଲେ ଜନତାଙ୍କ ପ୍ରତିରୋଧ ବଢିବ, କେନ୍ଦ୍ର, ରାଜ୍ୟ ସରକାରଙ୍କ ଦ୍ୱାରା ଆକାଶମାର୍ଗରୁ ଆକ୍ରମଣ ବନ୍ଦ କରିବା, ଛତିଶଗଡ଼ ବସ୍ତରକୁ ବିଦେଶୀ କମ୍ପାନୀକୁ ହସ୍ତାନ୍ତର ନ କରିବା ଆଦି ଉଲ୍ଲେଖ ରହିଛି ା
