ଭୁବନେଶ୍ୱର,୧୯।।୪ (ବ୍ୟୁରୋ): ଛତିଶଗଡର ଯୁବକ ଭବେଶ। ହୋଲିରେ ଘରକୁ ଯିବାକୁ କହିଥିଲେ। କିନ୍ତୁ ଘରେ ପହଞ୍ଚତ୍ ନ ଥିଲେ। କିଛିଦିନ ଅପେକ୍ଷା କରିବା ପରେ ଚିନ୍ତାରେ ପଡିଯାଇଥିଲେ ବୃଦ୍ଧ ମା’-ବାପା। ସାଙ୍ଗସାଥୀ, ସମ୍ପର୍କୀୟ ତାଙ୍କ ସମ୍ପର୍କରେ କିଛି ବି ସୂଚନା ଦେଇପାରି ନ ଥିଲେ। ଶେଷରେ ପୁଅ ନିଖୋଜ ହୋଇଥିବା ଭାବି ମା’ବାପା ଛତିଶଗଡର ସ୍ଥାନୀୟ ଥାନା ଓ ଜିଆର୍ପିରେ ଅଭିଯୋଗ କରିଥିଲେ। ଭବେଶ ଭୁବନେଶ୍ୱରରୁ ଶେଷ ଫୋନ୍ କଲ୍ କରିଥିବା ପୋଲିସ ଜଣାଇବା ପରେ ନିଖୋଜ ପୁଅକୁ ଖୋଜିବା ଲାଗି ୧୦ଦିନ ତଳେ ବାପା ଶିବ କୁମାର ଝା ଓ ମା ଫୁଲ ଦେବୀ ଛତିଶଗଡରୁ ଭୁବନେଶ୍ୱର ଚାଲିଆସିଥିଲେ। ହେଲେ ରାଜଧାନୀ ଅପରିଚିତ ହୋଇଥିବାରୁ ସେମାନେ ପୁଅ ଫଟୋ ଧରି ରାସ୍ତା, କଲୋନୀ, ହାଟବଜାର ବୁଲି ବୁଲି ଲୋକଙ୍କୁ ଦେଖାଉଛନ୍ତି। ଏଯାଏ ପୁଅ ସମ୍ପର୍କରେ କିଛି ସୂଚନା ପାଉ ନ ଥିବାରୁ ଏହି ବୃଦ୍ଧ ଦମ୍ପତି ପୂରା ଭାଙ୍ଗି ପଡିଛନ୍ତି। ପରିଣତ ବୟସରେ ନିଖୋଜ ପୁଅକୁ ଏତେ ବଡ ସହରରେ କେମିତି ଖୋଜିବେ ତାକୁ ନେଇ ଚିନ୍ତାରେ ପଡିଛନ୍ତି। ବାପା ଶିବ କୁମାର କହିଛନ୍ତି, ଚାକିରି ଛାଡ଼ି ଦୀର୍ଘ ଦେଢ ମାସ ହେଲା ପୁଅକୁ ଖୋଜୁଛି। ପୁଅ ଭୁବନେଶ୍ୱରରେ ଥିବା ତାଙ୍କ ମୋବାଇଲ୍ ଲୋକେଶନରୁ ଜଣାପଡୁଛି। ହେଲେ ସେ କୁଆଡେ ଗଲା ଜାଣିପାରୁନାହଁୁ। ପୁଅକୁ ନ ପାଇଲା ଯାଏ ଏଠୁ କେଉଁଆଡେ ଯିବୁନି। ସାଙ୍ଗସାଥୀଙ୍କ ସହ କାଳେ ଝଗଡା ହୋଇଥିବ, ଟ୍ରେନରେ ଯାତ୍ରା ବେଳେ ଯଦି ଟିକେଟ କରି ନ ଥିବ, ତାହାହେଲେ କେଉଁଠି ଓହ୍ଲାଇ ପଡି ବାଟବଣା ହୋଇଯାଇଥିବ, ସେନେଇ ସନ୍ଦେହ କରୁଛନ୍ତି । ପୁଅକୁ ଖୋଜିବାରେ କମିଶନରେଟ ପୋଲିସ ଓ ରେଲ୍ଓ୍ବେ ପୋଲିସ ସହାୟତା କରିବାକୁ ସେ ଅନୁରୋଧ କରିଛନ୍ତି।
