ବଲାଙ୍ଗୀର ଅଫିସ, ୧୦ା୪: ଜାଲ୍ ସାର୍ଟିଫିକେଟ୍ ମାମଲାର କ୍ରାଇମ୍ବ୍ରାଞ୍ଚସ୍ତରୀୟ ତଦନ୍ତ ନବମ ଦିନରେ ପହଞ୍ଚିଛି। ଏହି ମାମଲାର ୪ ଅଭିଯୁକ୍ତଙ୍କୁ କ୍ରାଇମ୍ବ୍ରାଞ୍ଚ ଟିମ୍ ତିନିଦିନିଆ ରିମାଣ୍ଡରେ ଆଣି ଜେରା କରିବା ପରେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ହାତରେ ଲାଗିଥିବା କହିଥିଲା। ଶନିବାର ଅପରାହ୍ଣରେ ୪ ଅଭିଯୁକ୍ତଙ୍କ ରିମାଣ୍ଡ ଅବଧି ସରିବା ପରେ କୋର୍ଟରେ ହାଜର କରି ଜେଲକୁ ପଠାଯାଇଥିଲ। ରବିବାର କ୍ରାଇମ୍ବ୍ରାଞ୍ଚ ଟିମ୍ ଟାଉନ୍ ଥାନାରୁ ବହୁ ଗୁରୁତ୍ୱପୂର୍ଣ୍ଣ ଫାଇଲ ନେଇଥିବା ଜଣାପଡିଛି। ଏହାସହିତ ଏହି ମାମଲାରେ ସମ୍ପୃକ୍ତ ଅନ୍ୟ ତିନିଜଣଙ୍କୁ ପଚରାଉଚରା କରିଛି। କ୍ରାଇମ୍ବ୍ରାଞ୍ଚ ଡିଏସ୍ପି ଦେବବ୍ରତ ଚକ୍ର ନିର୍ଦ୍ଦିଷ୍ଟ ଭାବେ ସୂଚନା ଦେଇ ନ ଥିଲେ ମଧ୍ୟ ରିମାଣ୍ଡରେ ଆସିଥିବା ଦୁଇ ମୁଖ୍ୟ ଅଭିଯୁକ୍ତ ମନୋଜ ମିଶ୍ର, ଆଲୋକ ରଞ୍ଜନ ଉଦ୍ଗାତା, ଦୁଇ ଜାଲ୍ ସାର୍ଟିଫିକେଟ୍ ବ୍ୟବହାରକାରୀ ତ୍ରିବିହାରୀ ପଣ୍ଡା ଓ ପରେଶ ବୁଡେକଙ୍କ ସୂଚନା ଆଧାରରେ ଜାଲ୍ ସାର୍ଟିଫିକେଟ୍ ମାମଲାରେ ସମ୍ପୃକ୍ତ କେବଳ ବଲାଙ୍ଗୀର ଜିଲାର ୨୦୦ରୁ ଉର୍ଦ୍ଧ୍ୱ ଲୋକଙ୍କ ତାଲିକା ପ୍ରସ୍ତୁତ କରାଯାଇଥିବା ଚର୍ଚ୍ଚାର ବିଷୟ ହୋଇଛି। ଏହି ୨ ଶହରୁ ଉର୍ଦ୍ଧ୍ୱ ଲୋକଙ୍କ ଭିତରେ କେତେଜଣ ଜାଲ୍ ସାର୍ଟିଫିକେଟ୍ ଦଲାଲ, କିଛି ଜାଲ୍ ସାର୍ଟିଫିକେଟ୍ ବ୍ୟବହାର କରିଥିବା ଚାକିରିଆ ଏବଂ ଠକେଇର ଶିକାର ହୋଇଥିବା ପୀଡିତଙ୍କ ତାଲିକା ପ୍ରସ୍ତୁତ କରିଛି। ଏତେ ସଂଖ୍ୟକ ଲୋକଙ୍କୁ ଥାନାକୁ ଆଣି ପଚରାଉଚରା କରିବା ପାଇଁ ପୋଲିସ ସହାୟତା ମଗାଯାଇଛି। ଡିଏସ୍ପିଙ୍କ ଏଭଳି ସୂଚନା ପରେ ଏହି ଜାଲ୍ ସାର୍ଟିଫିକେଟ୍ ମାମଲାରେ କ୍ରାଇମ୍ବ୍ରାଞ୍ଚ ଗୁରୁତ୍ୱପୂର୍ଣ୍ଣ ସୂଚନା ପାଇଥିବା ଜଣାପଡିଛି। ରାଜ୍ୟ ବାହାରକୁ ଏହାର ଚେର ଲମ୍ବି ଥିବାରୁ କ୍ରାଇମ୍ବ୍ରାଞ୍ଚ ଟିମ୍ ରାଜ୍ୟ ବାହାରକୁ ଯିବାକୁ ପ୍ରସ୍ତୁତ ହେଉଥିବା ଜଣାପଡିଛି। ଜିଲା ଭିତରେ ଗିରଫଦାରୀ ସଂଖ୍ୟା ବଢ଼ିବ ବୋଲି ଚର୍ଚ୍ଚା ହେଉଥିଲେ ମଧ୍ୟ ବଲାଙ୍ଗୀର ଜେଲ ଭିତରେ କଏଦୀଙ୍କ ସଂଖ୍ୟା ବୃଦ୍ଧି ଏବେ ମୁଣ୍ଡବ୍ୟଥାର କାରଣ ପାଲଟିଛି। ବଲାଙ୍ଗୀର ଜିଲା କାରାଗାରରେ ୩୯୨ ଜଣ କଏଦୀ ରହିବା ପାଇଁ ବ୍ୟବସ୍ଥା ରହିଛି। ଏବେ ଏଠାରେ ୪୦୮ ଜଣ କଏଦୀ ରହୁଥିବା ଜେଲ ଅଧିକ୍ଷକ ସର୍ବେଶ୍ୱର ସାହୁ କହିଛନ୍ତି। ଗିରଫଦାରୀ ବଢ଼ିଲେ ସେମାନଙ୍କୁ କେଉଁଠି ରଖାଯିବ ଏହା ଏବେ ଚିନ୍ତାର ବିଷୟ ପାଲଟିଛି। ଏହି କାରଣରୁ କ୍ରାଇମ୍ବାଞ୍ଚ ଗିରଫଦାରୀ ଦିଗକୁ ଅଧିକ ଗୁରୁତ୍ୱ ନଦେଇ ଆର୍ଥିକ କାରବାର ଦିଗକୁ ଅଧିକ ଗୁରୁତ୍ୱ ଦେଉଥିବା ଚର୍ଚ୍ଚାର ବିଷୟ ହୋଇଛି। ବଲାଙ୍ଗୀର ପୋଲିସ ଜାଲ୍ ସାର୍ଟିଫିକେଟ ମାମଲାରେ ୧୯ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। କ୍ରାଇମ୍ବ୍ରାଞ୍ଚ ପକ୍ଷରୁ ଏହି ମାମଲାର ତଦନ୍ତ ଗତ ୯ ଦିନ ଧରି ଚାଲିଥିଲେ ମଧ୍ୟ ଏଯାବତ୍ ଜଣେ ବି ଲୋକଙ୍କୁ ଏନେଇ ଗିରଫ କରାଯାଇନାହିଁ।
