ନୂଆଦିଲ୍ଲୀ,୨୪।୧ : ବରିଷ୍ଠ କଂଗ୍ରେସ ନେତା ତଥା କେରଳର ପୂର୍ବତନ ମୁଖ୍ୟମନ୍ତ୍ରୀ ଏକେ ଆଣ୍ଟୋନିଙ୍କ ପୁଅ ଅନିଲ ଆଣ୍ଟୋନୀ ୨୦୦୨ଗୁଜରାଟ ଦଙ୍ଗା ଉପରେ ବିବିସି ଡକ୍ୟୁମେଣ୍ଟାରୀକୁ ବିରୋଧ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ସମର୍ଥନ କରି ସେ ବୁଧବାର କଂଗ୍ରେସରୁ ଇସ୍ତଫା ଦେଇଛନ୍ତି। ସେ ବିବିସି ଡକ୍ୟୁମଣ୍ଟାରିକୁ ବିରୋଧ କରିବାରୁ ତାଙ୍କୁ ଧମକ ମିଳିବା ଆରମ୍ଭ କରିଥିବା କହିଛନ୍ତି।
ସେ ଟୁଇଟ କରିଛନ୍ତି ଯେ, ମୁଁ କଂଗ୍ରେସର ମୋର ସମସ୍ତ ପଦରୁ ଇସ୍ତଫା ଦେଇଛି। ଇସ୍ତଫା ଦେବା ପରେ ସେ କଂଗ୍ରେସର ନୀତି ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ରାହୁଲ ଗାନ୍ଧୀ କନ୍ୟାକୁମାରୀରୁ କଶ୍ମୀର ପଦଯାତ୍ରା କରି ପ୍ରେମର ବାର୍ତ୍ତା ପ୍ରସାର କରୁଛନ୍ତି। ଏପରି ସ୍ଥଳେ ଦଳର ଅନ୍ୟ ସଦସ୍ୟମାନେ ବିପରୀତ କାର୍ଯ୍ୟ କରୁଥିବା ଅନିଲ କହିଛନ୍ତି। ମୁଁ ବିବିସି ଡକ୍ୟୁମଣ୍ଟାରିକୁ ବିରୋଧ କରିବାର ୨୪ ଘଣ୍ଟା ମଧ୍ୟରେ ବହୁତ କିଛି ଘଟିଛି। ମୋ ପାଖକୁ ରାତି ସାରା ଧମକ ଭରା କଲ ଆସିଛି।
ସୂଚନାଯୋଗ୍ୟ, ମଙ୍ଗଳବାର ଅନିଲ ଆଣ୍ଟୋନୀ କହିଥିଲେ ଯେ ବ୍ରିଟିଶ ପ୍ରସାରଣକାରୀ ବିବିସିର ଭାରତୀୟ ଅନୁଷ୍ଠାନକୁ ଅଗ୍ରାଧିକାର ଦେବା ଆମ ଦେଶର ସାର୍ବଭୌମତ୍ୱକୁ କ୍ଷୁର୍ଣ୍ଣ କରିବ। ଏହା ଦେଶ ଲାଗି ବିପଦ ସୃଷ୍ଟି କରିବ। କଂଗ୍ରେସ ଦଳର କେରଳ ୟୁନିଟର ଡିଜିଟାଲ ଯୋଗାଯୋଗକୁ ଅନିଲ ଆଣ୍ଟୋନୀ ପରିଚାଳନା କରୁଥିଲେ। ସେ ଏକ ଟୁଇଟରେ କହିଥିଲେ ଯେ ଯେଉଁମାନେ ବିବିସି ତଥା ବ୍ରିଟେନର ପୂର୍ବତନ ବୈଦେଶିକ ସଚିବ ଜ୍ୟାକ ଷ୍ଟ୍ରୋଙ୍କ ଚିନ୍ତାଧାରାକୁ ସମର୍ଥନ କରୁଛନ୍ତି ଏବଂ ଗ୍ରହଣ କରୁଛନ୍ତି ସେମାନେ ଭାରତୀୟ ଅନୁଷ୍ଠାନ ଉପରେ ବିପଦପୂର୍ଣ୍ଣ ଉଦାହରଣ ସୃଷ୍ଟି କରୁଛନ୍ତି। କାରଣ ୨୦୦୩ ଇରାକ ଯୁଦ୍ଧ ପଛରେ ଜ୍ୟାକ ଷ୍ଟ୍ରୋଙ୍କ ହାତ ଥିଲା। ଭାଜପା ସହିତ ପ୍ରମୁଖ ମତଭେଦ ସତ୍ତ୍ୱେ ମୁଁ ଅନୁଭବ କରୁଛି ଯେ, ଏହା ଆମର ସାର୍ବଭୌମତ୍ୱକୁ କ୍ଷୁର୍ଣ୍ଣ କରିବ।
