ଇଟାନଗର,୧୨।୧୨: ଅରୁଣାଚଳପ୍ରଦେଶ ଏଲ୍ଏସିରେ ଭାରତ ଓ ଚାଇନା ସୈନ୍ୟ ମୁହାଁମୁହିଁ ହୋଇଛନ୍ତି। ଏହି ଘଟଣାରେ ଉଭୟ ପକ୍ଷର ଯବାନ ଆହତ ହୋଇଥିବା ସୂଚନା ମିଳିଛି। ଏହି ଘଟଣା ୩ ଦିନ ପୂର୍ବରୁ ଅର୍ଥାତ୍ ଡିସେମ୍ବର ୯ତାରିଖ ରାତିରେ ତ୍ୱାଙ୍ଗ ଜିଲାର ଏଲ୍ଏସି ନିକଟରେ ହୋଇଥିବା ନେଇ ସୋମବାର ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ, ଚାଇନାର ପିପୁଲ୍ସ ଲିବରେସନ୍ ଆର୍ମି(ପିଏଲ୍ଏ)ର ସୈନ୍ୟ ତ୍ୱାଙ୍ଗର ଏଲ୍ଏସିରେ ପହଞ୍ଚିବାକୁ ଚାହୁଁଥିଲେ। ହେଲେ ଭାରତୀୟ ସେନା ଷଡ଼ଯନ୍ତ୍ରକୁ ପଣ୍ଡ କରିବା ସହ ତାଙ୍କୁ ବିରୋଧ କରି ଦୃଢ଼ ଜବାବ ଦେଇଥିଲେ। ଏହି ସମୟରେ ଦୁଇ ଦେଶର ସୈନ୍ୟଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଉକ୍ତ ଘଟଣାରେ ଭାରତର ୩୦ରୁ ଊର୍ଦ୍ଧ୍ୱ ଯବାନ ସାମାନ୍ୟ ଆହତ ହୋଇଥିବା ବେଳେ ଚାଇନା ସୈନ୍ୟ ମଧ୍ୟ ଆହତ ହୋଇଥିବା ଜଣାପଡ଼ିଛି। ଏହି ଘଟଣା ପରେ ଉକ୍ତ ଅଞ୍ଚଳରେ ଶାନ୍ତି ରକ୍ଷା ପାଇଁ ଭାରତର କମାଣ୍ଡସ୍ତରୀୟ ଏକ ଜରୁରୀ ବୈଠକ ବସିଛି। ଚାଇନା କମାଣ୍ଡରଙ୍କ ସହ ଭାରତର କମାଣ୍ଡର ଏକ ଫ୍ଲାଗ୍ ମିଟିଂ ପରେ ଉଭୟ ପକ୍ଷ ତୁରନ୍ତ ଉକ୍ତ ଅଞ୍ଚଳରୁ ପଛକୁ ଘୁଞ୍ଚିଥିବା ସୂଚନା ରହିଛି। ଅନ୍ୟପଟେ ଏନେଇ ଭାରତୀୟ ସେନା ଅଧିକାରୀଙ୍କ ପକ୍ଷରୁ କୌଣସି ପ୍ରତିକ୍ରିୟା ସାମ୍ନାକୁ ଆସିନାହିଁ। ସୂଚନା ମୁତାବକ, ଜୁନରେ ଲଦାଖ ଗଲାଓ୍ବାନ ଘାଟିରେ ଘଟିଥିବା ହିଂସାତ୍ମକ ସଂଘର୍ଷ ଘଟଣା ପରେ ଦୁଇ ଦେଶ ମଧ୍ୟ ତିକ୍ତତା ଦେଖାଦେଇଥିଲା। ଏବେ ପୁଣି ଥରେ ଚାଇନା ଓ ଭାରତ ମୁହାଁମୁହିଁ ହୋଇଛନ୍ତି।
