ଚମ୍ପୁଆ,୪ା୧୧(ଡି.ଏନ୍.ଏ): ବଜାର ଓ ସଂରକ୍ଷଣ ଅଭାବରୁ ଚାଷୀ ଉପତ୍ାଦିତ ସାମଗ୍ରୀର ମୂଲ୍ୟ ପାଇବାରୁ ବଞ୍ଚତ୍ତ ହେଉଛନ୍ତି। ଫଳରେ ଅନେକ ଚାଷୀ କ୍ଷତି ସହି ଚାଷ ପ୍ରତି ମୁହଁ ଫେରାଉଛନ୍ତି। ଏଭଳି ସମୟରେ କେନ୍ଦୁଝର ଜିଲା ଚମ୍ପୁଆ ବ୍ଲକ୍ ମହେଶ୍ୱରପୁର ଗ୍ରାମର ବାବା ଝାଡ଼େଶ୍ୱର ସ୍ବୟଂ ସହାୟକ ଗୋଷ୍ଠୀର ମହିଳା ଚାଷ କ୍ଷେତ୍ରରେ ଅଗ୍ରଗତି କରୁଛନ୍ତି। ଉଦ୍ୟାନ ବିଭାଗ ଓ ଓମବାଡିସ ସହାୟତାରେ ଗୋଷ୍ଠୀର ମହିଳାମାନେ ଚାଷ କରି ସ୍ବାବଲମ୍ବୀ ହୋଇପାରିଛନ୍ତି।
ସୂଚନା ମୁତାବକ, ଚମ୍ପୁଆ ଉଦ୍ୟାନ କୃଷି ବିଭାଗ ପକ୍ଷରୁ ଶତ ପ୍ରତିଶତ ସବ୍ସିଡିରେ ଉକ୍ତ ମହିଳା ଗୋଷ୍ଠୀକୁ ୨୦୨୧-୨୨ ଆର୍ଥିକ ବର୍ଷରେ ୧୫ ଲକ୍ଷ ସହାୟତା ଯୋଗାଇ ଦିଆଯାଇଥିଲା। ଏଥିସହ ଓଡ଼ିଶା ମାଇନିଂ ବିୟରିଂ ଏରିଆ ଡେଭଲପମେଣ୍ଟ କର୍ପୋରେସନ(ଓମ୍ବାଡିସ୍) ପକ୍ଷରୁ ୫ ମେଟ୍ରିକ ଟନ୍ କ୍ଷମତା ବିଶିଷ୍ଟ ସୌରଚାଳିତ ଶୀତଳ ଭଣ୍ଡାର ଯୋଗାଇ ଦିଆଯାଇଛି। ମହିଳାମାନେ କାକୁଡ଼ି, ବାଇଗଣ, ଭେଣ୍ଡି, ପୋଇ ଆଦି ପନିପରିବା ଚାଷ କରି ନିଜେ ସ୍ବାବଲମ୍ବୀ ହେଉଛନ୍ତି। ପନିପରିବାର ସୀମିତ ସମୟ ମଧ୍ୟରେ ଆବଶ୍ୟକ ମୁତାବକ ବଜାର ଚାହିଦା ପୂରଣ କରି ବେଶ ଲାଭବାନ ହୋଇ ପାରିଛନ୍ତି। ଏଥିସହ ସ୍ଥାନୀୟ ମହିଳାଙ୍କ ମଧ୍ୟରେ ଚାଷ କାର୍ଯ୍ୟ ପ୍ରତି ଆଗ୍ରହ ବଢ଼ୁଥିବା ଦେଖିବାକୁ ମିଳିଛି। ବାବା ଝାଡ଼େଶ୍ୱର ସ୍ବୟଂ ସହାୟକ ଗୋଷ୍ଠୀର ସଭାପତି ପ୍ରଜ୍ୱଳତି ମହାନ୍ତଙ୍କ କହିବା ଅନୁଯାୟୀ ଆମ ପରିଶ୍ରମ ବେକାର ଯାଉନାହିଁ। ଆଗରୁ ପନିପରିବା ତୋଳି ଗୋଟାଏ ଦିନରେ ଶେଷ କରିବାକୁ ପଡୁଥିଲା। ଫଳରେ ଆମ୍ଭେମାନେ ଉପଯୁକ୍ତ ମୂଲ୍ୟ ପାଇ ପାରୁ ନ ଥିଲୁ। ଶୀତଳଭଣ୍ଡାର ମାଧ୍ୟମରେ ଦୀର୍ଘମିଆଦୀ ପନିପରିବାର ସଂରକ୍ଷଣ ବ୍ୟବସ୍ଥା ହୋଇ ପାରୁଥିବା ବେଳେ ସ୍ବଳ୍ପମିଆଦୀ ସଂରକ୍ଷଣ ବ୍ୟବସ୍ଥା କରାଯାଇ ପାରୁଛି। ସ୍ଥାନୀୟ ଗ୍ରାମବାସୀଙ୍କୁ ଏହି ଶୀତଳ ଭଣ୍ଡାରରେ ପନିପରିବା ଗଚ୍ଛିତ ରଖିବାର ମଧ୍ୟ ସୁଯୋଗ ଦିଆଯାଉଛି। ଏହିଭଳି ଶୀତଳ ଭଣ୍ଡାର ବିଭିନ୍ନ ସ୍ଥାନରେ କରାଗଲେ ଚାଷୀମାନେ ଖୁବ୍ ଉପକୃତ ହୁଏନ୍ତେ ବୋଲି ସେ ସୂଚନା ଦେଇଛନ୍ତି।
