ଭୁବନେଶ୍ୱର, ୧୫।୧୦ (ବ୍ୟୁରୋ): କୋହଳ ହୋଇଛି କରୋନା କଟକଣା। ଏଣୁ ଏଥର ଜମିବ ଦୀପାବଳି। ବାଣ ବିକ୍ରି ପାଇଁ ରାଜ୍ୟ ସରକାରଙ୍କ ପକ୍ଷରୁ ଅନୁମତି ମିଳିଥିବାରୁ ଆତସବାଜିରେ କମ୍ପିବ ରାଜଧାନୀ। ସାଧାରଣ ପ୍ରଶାସନ ବିଭାଗ ଅତିରିକ୍ତ ସଚିବ ମାନସ ରଞ୍ଜନ ସାମଲ ଶନିବାର ଏନେଇ ବିଏମ୍ସି ଅତିରିକ୍ତ କମିଶନରଙ୍କୁ ଚିଠି ଲେଖି ବାଣ ବିକ୍ରି ପାଇଁ ସ୍ଥାନ ନିର୍ଦ୍ଦିଷ୍ଟ କରିଛନ୍ତି। ଏଥର ରାଜଧାନୀର ୭ଟି ଜାଗାରେ ବାଣ ବିକ୍ରି ପାଇଁ ଅନୁମତି ପ୍ରଦାନ କରାଯାଇଛି। ଓ୍ବାର୍ଡ ନଂ.୯ ଅନ୍ତର୍ଗତ ଗାଡ଼କଣ ମୌଜାର ଶବର ସାହି ମେଳନ ପଡିଆ, ଓ୍ବାର୍ଡ ନଂ.୧୦ ଅନ୍ତର୍ଗତ ବମିଖାଲ ମୌଜାର ରସୁଲଗଡ଼ ଦୁର୍ଗାପୂଜା ମଣ୍ଡପ, ଓ୍ବାର୍ଡ ନଂ. ୧୮ ଅନ୍ତର୍ଗତ ପାଣ୍ଡରା ମୌଜାର ପଳାଶୁଣି ବିଜୁପଟ୍ଟନାୟକ ପଡିଆ, ଓ୍ବାର୍ଡ ନଂ. ୪୦ ଅନ୍ତର୍ଗତ ବାପୁଜୀ ନଗରର ୟୁନିଟ-୧ ହାଇସ୍କୁଲ ପଛପଟ, ଓ୍ବାର୍ଡ ନଂ. ୪୩ ଅନ୍ତର୍ଗତ ଲକ୍ଷ୍ମୀସାଗର ମେଳଣ ପଡିଆରେ ବାଣ ବିକ୍ରି ହେବ। ସେହିପରି ଓ୍ବାର୍ଡ ନଂ. ୫୭ ଅନ୍ତର୍ଗତ ବଡ଼ଗଡ଼ର ୨ଟି ସ୍ଥାନ ଯଥା ବଡ଼ଗଡ଼ ଶ୍ମଶାନ ସମ୍ମୁଖ ଏବଂ ବିଡିଏ ମାର୍କେଟର ପଛପାଖରେ ବାଣ ବିକ୍ରି ପାଇଁ ପ୍ରଶାସନର ଅନୁମତି ରହିଛି। ଅପରପକ୍ଷେ ଏହି ସ୍ଥାନଗୁଡ଼ିକରେ ବାଣ ବିକ୍ରି ବେଳେ କୌଣସି ଘଟଣା ଓ ଦୁର୍ଘଟଣା ରୋକିବାକୁ ପାଇଁ ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ। ଅଗ୍ନିଶମ ବାହିନୀ ଦମକଳ ଗାଡ଼ି ସହ ମୁତୟନ ରହିବେ। ଯେ କେହି ଲାଇସେନ୍ସପ୍ରାପ୍ତ ଦୋକାନୀ ଆବଶ୍ୟକ ଶୁଳ୍କ ଦେଇ ଏହି ସ୍ଥାନରେ ବାଣ ଦୋକାନ ଖୋଲି ପାରିବେ। ଲୋକେ ଏହି ସ୍ଥାନରୁ ବାଣ କିଣିବା ସହ ଫୁଟାଇବାବେଳେ ନିରାପତ୍ତା ପାଳନ କରିବାକୁ ପ୍ରଶାସନ ପକ୍ଷରୁ କୁହାଯାଇଛି।
