ଭଞ୍ଜନଗର୮।୧୦(ଡି.ଏନ.ଏ.): ପୁଅର ଠେଙ୍ଗା ମାଡରେ ମା’ ମୃତ। ଗଞ୍ଜାମ ଜଲା ଭଞ୍ଜନଗର ଥାନା ଅନ୍ତର୍ଗତ ଗଜାପଦର ଗ୍ରାମରେ ଶୁକ୍ରବାର ରାତିରେ ଏଭଳି ଏକ ଅଘଟଣ ଘଟିଛି। ମୃତ ମହିଳା ଜଣଙ୍କ ତ୍ରିବେଣୀ ନାୟକ (୬୫) । ଖବରପାଇ ଭଞ୍ଜନଗର ପୋଲିସ ଶନିବାର ସକାଳେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଏଥିସହ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଭଞ୍ଜନଗର ହସ୍ପିଟାଲକୁ ପଠାଇଥିବା ଜଣାପଡିଛି। ଅନ୍ୟପଟେ, ଅଭିଯୁକ୍ତ ପୁତ୍ର ସନା ନାୟକ ଙ୍କୁ ପୋଲିସ ଗିରଫ କରିଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ, ଅଭିଯୁକ୍ତ ସନା ନିଶାଗ୍ରସ୍ତ ଅବସ୍ଥାରେ ଗତକାଲି ରାତିରେ ମା’ଙ୍କ ସହ ଝଗଡ଼ା କରିଥିଲା। ଏହାପରେ ମା’ଙ୍କୁ ଏକ ଠେଙ୍ଗା ସହାୟତାରେ ପିଟିପିଟି ହତ୍ୟା କରିଥିଲା। ଏନେଇ ଗ୍ରାମବାସୀ ଜାଣିବା ପରେ ତ୍ରିବେଣୀଙ୍କୁ ଚିକିତ୍ସା ପାଇଁ ମେଡିକାଲକୁ ନେବାକୁ ଚାହିଁଥିଲେ। ହେଲେ ସନା ଘର ସମ୍ମୁଖରେ ରହି ଯିଏ ଆସିବ ତାଙ୍କୁ ମଧ୍ୟ ଆକ୍ରମଣ କରିବି ବୋଲି ଧମକ ଦେଇଥିଲେ। ଏହାପରେ ଗ୍ରାମବାସୀ ପୋଲିସ ସହ ଯୋଗାଯୋଗ କରିବାରେ ବିଫଳ ହୋଇଥିଲେ। ଶନିବାର ସକାଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
