ଭୁବନେଶ୍ୱର, ୧୦।୪ (ବ୍ୟୁରୋ): ପୌର ନିର୍ବାଚନ ସରିଛି। ଭୁବନେଶ୍ୱର ମହାନଗର ନିଗମ (ବିଏମ୍ସି) ପ୍ରଥମ ମହିଳା ମେୟର ପାଇଛି। ଏଥିସହ ଡେପୁଟି ମେୟର ଭାବେ ଜଣେ ମହିଳାଙ୍କୁ ବସାଇଛି ବିଜେଡି। ପୁଣି ଅଧିକାଂଶ କର୍ପୋରେଟର ହେଉଛନ୍ତି ମହିଳା। ଶନିବାର ମେୟର ସୁଲୋଚନା ଦାସ, ଡେପୁଟି ମେୟର ମଞ୍ଜୁଲତା କହଁର ଓ ସମସ୍ତ କର୍ପୋରେଟର ଶପଥ ନେବା ସହ ସହରର ଶାସନ ଭାର ସମ୍ଭାଳିଛନ୍ତି।
ଭୁବନେଶ୍ୱରରେ ଡେପୁଟି ମେୟର ପଦବୀ ଆରମ୍ଭ ହେବା ଦିନଠାରୁ ଏହି ପଦବୀ ଲଗାତର ମହିଳାଙ୍କ ହାତକୁ ଯାଉଛି। ୨୦୦୩ରେ ଊର୍ମିଳା ମହାପାତ୍ର ପ୍ରଥମ ଡେପୁଟି ମେୟର ଥିଲେ। ୨୦୦୮ରେ ଭାରତୀ ସିଂହ ଓ ୨୦୧୪ରେ କେ. ଶାନ୍ତି ଡେପୁଟି ମେୟର ହୋଇଥିଲେ। ବିଜେଡି ଏଥର ମଧ୍ୟ ସମାନ ଧାରା ବଜାୟ ରଖିଛି। ଅପରପକ୍ଷେ ଚଳିତ ନିର୍ବାଚନରେ ୫୦ ପ୍ରତିଶତ ସଂରକ୍ଷଣ ହିସାବରେ ଭୁବନେଶ୍ୱରର ୬୭ଟି ଓ୍ବାର୍ଡ ମଧ୍ୟରୁ ୩୪ଟି ଆସନ ମହିଳଙ୍କ ପାଇଁ ସଂରକ୍ଷିତ ରଖାଯାଇଥିଲା। ତେବେ ସଂରକ୍ଷିତ ଆସନଠାରୁ ବିଜୟୀ ମହିଳାଙ୍କ ହାର ଟପି ଯାଇଛି। ମହାନଗରର ୬୧ ପ୍ରତିଶତ ଆସନ ମହିଳାଙ୍କ ଦଖଲକୁ ଯାଇଛି। ମୋଟ୍ ୪୧ଟି ଓ୍ବାର୍ଡର ଦାୟିତ୍ୱ ମହିଳା କର୍ପୋରେଟରଙ୍କ ହାତକୁ ଯାଇଛି। ବିଜେଡିରୁ ୨୮ଜଣ ଥିବାବେଳେ ଭାଜପାରୁ ୭ଜଣ ଓ ୬ଜଣ ମହିଳା ସ୍ବାଧୀନ ଭାବେ ଲଢ଼ି କର୍ପୋରେଟର ହୋଇଛନ୍ତି। ପରବର୍ତ୍ତୀ ସମୟରେ ସ୍ବାଧୀନ ମହିଳା କର୍ପୋରେଟରଙ୍କ ମଧ୍ୟରୁ ୨ଜଣ ବିଜେଡିରେ ସାମିଲ ହୋଇସାରିଛନ୍ତି। ମେୟର, ଡେପୁଟି ମେୟରଙ୍କ ସମେତ ମହିଳା କର୍ପୋରେଟରଙ୍କ ସଂଖ୍ୟା ଅଧିକ ରହିଥିବାରୁ ବିଏମ୍ସିରେ ମହିଳାଙ୍କ ଶାସନ ଦେଖିବାକୁ ମିଳିବ। ନବ ନିର୍ବାଚିତ ମହିଳା କର୍ପୋରେଟରଙ୍କ ମଧ୍ୟରୁ ଅନେକ ଗୃହିଣୀରୁ ରାଜନୀତିରେ ପାଦ ଥାପିଛନ୍ତି। ତଥାପି ନିଜର ଦକ୍ଷତା ବଳରେ ଶାସନ ଭାର ଠିକ୍ ଭାବେ ତୁଲାଇ ପାରିବେ ବୋଲି କହିଛନ୍ତି। ୨୦୧୪ ନିର୍ବାଚନରେ ମଧ୍ୟ ୩୮ଜଣ ମହିଳା କର୍ପୋରେଟର ଦାୟିତ୍ୱ ନିର୍ବାହ କରିଥିଲେ।
