ଡେରାଡୁନ,୧୨ ।୨: କର୍ନାଟକର ଉଡୁପି ଜିଲାରେ ହିଜାବ ବିବାଦ ପରେ ଏବେ ଉତ୍ତରାଖଣ୍ଡରେ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କ ବୟାନ ସାମ୍ନାକୁ ଆସିଛି । ଧାମି କହିଛନ୍ତି ଆମେ ସରକାର ଗଢିଲେ ଶପଥ ଗ୍ରହଣ କରୁକରୁ ‘ୟୁନିଫର୍ମ ସିଭିଲ କୋଡ’ର ଡ୍ରାପ୍ଟ ପ୍ରସ୍ତୁତ କରିବୁ । ସୂଚନାଯୋଗ୍ୟ, କର୍ନାଟକର ହିଜାବ ବିବାଦ ଏବେ ରାଜନୈତିକ ମୋଡ ନେବାକୁ ଯାଉଛି । ଏହାକୁ ନେଇ ସବୁ ରାଜନୈତିକ ଦଳର ନେତାମାନେ ଭିନ୍ନ ଭିନ୍ନ ମତ ଦେବା ଆରମ୍ଭ କଲେଣି । ତେବେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀଙ୍କ ବୟାନକୁ ନେଇ ଖୁସି ବ୍ୟକ୍ତ କରିଛନ୍ତି କେନ୍ଦ୍ରମନ୍ତ୍ରୀ ଅନୁରାଗ ଠାକୁର । ମୁଖ୍ୟମନ୍ତ୍ରୀ ଧାମି ଶପଥ ଗ୍ରହଣ କରିବା ପରେ ପରେ ‘ୟୁନିଫର୍ମ ସିଭିଲ କୋଡ’ର ଡ୍ରାପ୍ଟ ପ୍ରସ୍ତୁତ କରିବା କଥା କହିଥିବାରୁ ଏଭଳି ପଦକ୍ଷେପକୁ ଠାକୁର ଖୁବ୍ ପ୍ରଶଂସା କରିଛନ୍ତି ।
ମୁଖ୍ୟମନ୍ତ୍ରୀ କହିଛନ୍ତି ଉତ୍ତରାଖଣ୍ଡର ସାଂସ୍କୃତିକ-ଆଧ୍ୟାତ୍ମିକ ପରିବେଶକୁ ରକ୍ଷା କରିବାକୁ ଭାରତୀୟ ଜନତା ପାର୍ଟି(ଭାଜପା) ସରକାର ଶପଥ ଗ୍ରହଣ କରିବା ପରେ ପରେ ତୁରନ୍ତ ଏକ କମିଟି କଠନ କରି ‘ୟୁନିଫର୍ମ ସିଭିଲ କୋଡ’ର ଡ୍ରାପ୍ଟ ପ୍ରସ୍ତୁତ କରିବେ । ଯେଉଁଥିରେ ସମସ୍ତ ନାଗରିକଙ୍କ ପାଇଁ ସମାନ ଆଇନ ରହିବ, ସେ ଯେଉଁ ଧର୍ମରେ ବିଶ୍ୱାସ ରଖୁଥାଆନ୍ତୁ ନା କାହିଁକି ।
