କଳିଙ୍ଗନଗର,୫ା୨(ଡି.ଏନ.ଏ.): ଐତିହ୍ୟ ବ୍ୟାସସରୋବର ମନ୍ଦିର ସୌନ୍ଦର୍ଯ୍ୟକରଣ ନିମନ୍ତେ ପ୍ରକିୟା ଆରମ୍ଭ ହୋଇଛି। ଏଥିଲାଗି ୨୯୪ ଏକର ଜମିର ଆବଶ୍ୟକତା ରହିଛି। ରାଜ୍ୟ ସରକାର ଜିଲା ଖଣିଜ ନ୍ୟାସ ପାଣ୍ଠିରୁ ୬୪ କୋଟି ଟଙ୍କା ମଞ୍ଜୁର ମଧ୍ୟ କରିଛନ୍ତି। ତେବେ ଏହାକୁ ନେଇ ବ୍ୟାସନଗର ପୌରାଞ୍ଚଳ ଏବଂ ଏହାର ଆଖପାଖ ଅଞ୍ଚଳ ଯଥା ମୁଣ୍ଡମାଳ, ଖଣ୍ଡାହତା, ବୀରମଣିପୁର, ରାଛିପୁର, ଯୋଡ଼ାବର ଓ ଝାଟିଆସାହି ଆଦି ଗ୍ରାମର ଚାଷୀଙ୍କ ଚିନ୍ତା ବଢ଼ିଛି। ପ୍ରକଳ୍ପ ଲାଗି ସେମାନଙ୍କ ଜମି ଯିବା ଆଶଙ୍କା ସୃଷ୍ଟି ହୋଇଛି। ତେଣୁ ସେମାନେ ଶୁକ୍ରବାର କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ରଙ୍କୁ ଭେଟି ଏକ ଦାବିପତ୍ର ଦେଇଛନ୍ତି। ଉକ୍ତ ଦାବିପତ୍ରରେ ଦର୍ଶାଯାଇଛି ଯେ, ମନ୍ଦିର ପାଖାପାଖି ଅଞ୍ଚଳରେ ଥିବା ବିସ୍ତୃତ ଚାଷଜମିଗୁଡ଼ିକ ବ୍ୟକ୍ତିଗତ ମାଲିକାନାରେ ରହିଛି। ଉକ୍ତ ଜମିକୁ ୨୦୦ରୁ ଊର୍ଦ୍ଧ୍ୱ ବର୍ଷ ଧରି ପିଢି ପରେ ପିଢି ବ୍ୟବହାର କରି ଆସୁଛନ୍ତି। ଏହି ଜମିରେ ଧାନ, ବିରି, କୋଳଥ, କଲରା, ପୋଟଳ ଏବଂ ଭେଣ୍ଡି ଫସଲ ଉପତ୍ାଦନ କରି ପରିବାର ପ୍ରତିପୋଷଣ କରୁଛନ୍ତି। ମାତ୍ର ବ୍ୟାସସରୋବର ଉନ୍ନତିକରଣ ନିମନ୍ତେ ସରକାର ଯେଉଁ ଚାଷ ଜମିଗୁଡିକ ହାତକୁ ନେଇଛନ୍ତି ଏଥିରେ ଆଇନସମ୍ମତ ଜମି ଅଧିଗ୍ରହଣ କରାଯାଇନାହିଁ।
ଚାଷୀମାନଙ୍କୁ ପୂର୍ବ ସୂଚନା ମଧ୍ୟ ଦିଆଯାଇନାହିଁ। କିନ୍ତୁ କାର୍ଯ୍ୟାଦେଶ ଦିଆଯାଇ କାର୍ଯ୍ୟ ଆରମ୍ଭ କରାଯାଉଛି। ଫଳରେ ଚାଷୀ ପରିବାର ପ୍ରତିପୋଷଣରେ ବାଧା ସୃଷ୍ଟି ହୋଇଛି। ଜମିଗୁଡିକର ପଟ୍ଟା ଚାଷୀମାନଙ୍କ ପାଖରେ ରହିଛି। କିଛି ଚାଷୀ ସବରେଜିଷ୍ଟ୍ରାର ଅଫିସରେ କିଣାବିକା ମଧ୍ୟ କରିଛନ୍ତି। ସରକାରଙ୍କୁ ଖଜଣା ଦେଇ ପାଉତି ବି କାଟୁଛନ୍ତି। ଅନ୍ୟ କେତେଜଣ ଚାଷୀ ରାଜାଙ୍କ ହାତପଟ୍ଟା ପାଇଛନ୍ତି। ଅନ୍ୟ କେତେଜଣଙ୍କ କାଗଜପତ୍ର ପ୍ରାକୃତିକ ବିପର୍ଯ୍ୟୟରେ ନଷ୍ଟ ହୋଇଥିବା ଜଣାପଡ଼ିଛି। ତେଣୁ ଏହାର ସୁଚିନ୍ତିତ ବିଚାର କରି ଚାଷୀଙ୍କୁ ନ୍ୟାୟ ଦେବାପାଇଁ ରମେଶ ଚନ୍ଦ୍ର ରାଉତ, ରବୀନ୍ଦ୍ର ରାଉତ, ମୁରଲୀଧର ପାତ୍ର, ସୁରେନ୍ଦ୍ର ନାୟକ, ଶ୍ରୀଧର ନାୟକ ପ୍ରମୁଖ ୫୦ରୁ ଊର୍ଦ୍ଧ୍ୱ ଚାଷୀ ଦାବି କରିଛନ୍ତି।
