ଯାଜପୁର ଅଫିସ,୨୨ା୧: ରାଜ୍ୟ ଅନୁସୂଚିତ ଜାତି, ଜନଜାତି ଓ ପଛୁଆବର୍ଗ ଉନ୍ନୟନ ବିଭାଗ ପକ୍ଷରୁ ନିର୍ମିତ ଚଣ୍ଡିଖୋଲସ୍ଥିତ ବାବା ଭୈରବାନନ୍ଦ ସ୍ବୟଂଶାସିତ ମହାବିଦ୍ୟାଳୟର ୧୦୦ଶର୍ଯ୍ୟା ବିଶିଷ୍ଟ ଛାତ୍ରୀ ନିବାସ ଜରାଜୀର୍ଣ୍ଣ ଅବସ୍ଥାରେ ରହିଛି । ଉଦ୍ଘାଟନର ୪ ବର୍ଷ ନ ପୂରୁଣୁ ଏହି ଛାତ୍ରୀ ନିବାସ ଅନ୍ତେବାସୀଙ୍କ ପାଇଁ ବିପଦସଙ୍କୁଳ ହୋଇ ପଡ଼ିଛି । ବିଭାଗୀୟ ଅଧିକାରୀ, ଯନ୍ତ୍ରୀ, ଠିକାଦାର ଓ ରାଜନେତାଙ୍କ ସଲାସୁତୁରାରେ ନିମ୍ନମାନର ନିର୍ମାଣ କାର୍ଯ୍ୟ କରାଯାଇ ଅନୁଦାନର ସିଂହଭାଗ ଅର୍ଥ ଆତ୍ମସାତ୍ କରାଯାଇ ଥିବା ପ୍ରମାଣ ଏବେ ଜଳଜଳ ହୋଇ ଦିଶୁଛି ବୋଲି ମତପ୍ରକାଶ ପାଇଛି। ରାଜ୍ୟ ସରକାରଙ୍କ ପୂର୍ତ୍ତ, ଗ୍ରାମ୍ୟ ନିର୍ମାଣ, ଓଡ଼ିଶା ନିର୍ମାଣ ନିଗମ କିମ୍ବା ଓଡ଼ିଶା ପୋଲିସ ଗୃହ ନିର୍ମାଣ ନିଗମ ଭଳି ଅଭିଜ୍ଞ ଯାନ୍ତ୍ରିକ ବିଭାଗକୁ ଦାୟିତ୍ୱ ନ ଦେଇ ବଡ଼ଚଣା ପଞ୍ଚାୟତ ସମିତି ମାଧ୍ୟମରେ ଏହି ଛାତ୍ରୀ ନିବାସ ନିର୍ମାଣ ହୋଇଥିଲା। ନାମକୁ ମାତ୍ର ଟେଣ୍ଡର ଆହ୍ବାନ କରି ଯୋଜନାବଦ୍ଧ ଭାବେ ଧର୍ମଶାଳା ଅଞ୍ଚଳର ଜଣେ ଠିକାଦାରଙ୍କ ନାମରେ କାର୍ଯ୍ୟାଦେଶ ଦିଆଯାଇଥିଲା। ହେଲେ କେତେଜଣ ପେଟି କଣ୍ଟ୍ରାକ୍ଟରଙ୍କ ତତ୍ତ୍ବାବଧାନରେ ନିର୍ମାଣ କାମ ଶେଷ ହୋଇଥିଲା ବୋଲି କଲେଜର କେତେଜଣ କର୍ମଚାରୀ ସୂଚନା ଦେଇଛନ୍ତି। ୨୦୧୪ ମେ ୯ରେ ଉକ୍ତ ଛାତ୍ରୀ ନିବାସ ଶିଳାନ୍ୟାସ କରାଯିବା ପରେ ନିର୍ମାଣ କାମ ଆରମ୍ଭ ହୋଇ ୨୦୧୬ରେ ଶେଷ ହୋଇଥିଲା । ୨୦୧୬ ଅକ୍ଟୋବର ୭ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଡ଼ଚଣା ବ୍ଲକ ଗସ୍ତରେ ଆସିଥିବା ସମୟରେ ଖଇରା ଖେଳ ପଡ଼ିଆଠାରେ ଆୟୋଜିତ ଏକ କାର୍ଯ୍ୟକ୍ରମରେ ଉକ୍ତ ଛାତ୍ରୀ ନିବାସରକୁ ଉଦ୍ଘାଟନ କରିଥିଲେ। ଇତିମଧ୍ୟରେ ସେହି ଛାତ୍ରୀନିବାସର ରଙ୍ଗ ସବୁ ଧୋଇ ହୋଇଗଲାଣି, କାନ୍ଥ ଓ ଛାତରୁ ପଲସ୍ତରା ସବୁ ଖଣ୍ଡ ଖଣ୍ଡ ହୋଇ ଖସି ପଡୁଛି । ତଳେ ବିଛା ଯାଇଥିବା ଟାଇଲ ଉଠି ଯାଉଛି । ନିମ୍ନମାନର କବ୍ଜା ଲାଗିଥିବାରୁ ଆପଣାଛାଏଁ ଗୋଟିଏ ପରେ ଗୋଟିଏ ଝରକା ମଧ୍ୟ ବନ୍ଧରୁ ଖସି ତଳେ ପଡ଼ିଛି । ଏହି କାରଣରୁ ସେଠାରେ ରହିବା ମୃତ୍ୟୁକୁ ଆଲିଙ୍ଗନ କରିବା ସହ ସମାନ ବୋଲି କେତେଜଣ ଅନ୍ତେବାସୀ କହିଛନ୍ତି। କଲେଜ କର୍ତ୍ତୃପକ୍ଷ ଏଥିନେଇ କେବଳ ଥରେ ଅତିରିକ୍ତ ଜିଲାପାଳଙ୍କ ଦୃଷ୍ଟି ଆକର୍ଷଣ କରି ନୀରବରେ ବସିଛନ୍ତି । ଏନେଇ ପ୍ରତିକ୍ରିୟା ନେବାକୁ କଲେଜ ଅଧ୍ୟକ୍ଷଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇ ପାରିନାହିଁ।
