ସୋସିଆଲ ମିଡିଆରେ ଏଭଳି କିଛି ଜିନିଷ ଦେଖିବାକୁ ମିଳେ, ଯାହାର ବାସ୍ତବତା ଚକିତ କରେ। କାରଣ ସେଗୁଡ଼ିକୁ ବିଶ୍ୱାସ କରିବା କଷ୍ଟକର। ଏବେ ସେଭଳି ଏକ ବିଜ୍ଞାପନ ବେଶ ଆଲୋଚନାର ବିଷୟ ପାଲଟିଛି। ଉକ୍ତ ବିଜ୍ଞାପନଟି କୋଲକାତାର ଶେରଓ୍ବାନି ବିକ୍ରେତାଙ୍କର।
ଭାଇରାଲ ହେଉଥିବା ବିଜ୍ଞାପନର ଶୈଳୀ ସମ୍ପୂର୍ଣ୍ଣ ଭିନ୍ନ ଏବଂ ଆକର୍ଷଣୀୟ। ପ୍ରଥମ ଦେଖାରେ ଏହା ଜଣେ ନିଖୋଜ ବ୍ୟକ୍ତିଙ୍କ ପାଇଁ ଲାଗିଥିବା ପୋଷ୍ଟର ଭଳି ଦେଖାଯାଉଛି। ହେଲେ ସେଥିରେ ଦିଆଯାଇଥିବା ତଥ୍ୟକୁ ସାବଧାନତାର ସହ ପଢ଼ିଲେ ତାହା ଏକ ବିଜ୍ଞାପନ ବୋଲି ସ୍ପଷ୍ଟ ହେଉଛି।
ଶେରଓ୍ବାନୀ ବ୍ରାଣ୍ଡ ‘ସୁଲତାନ୍’ର ବିଜ୍ଞାପନର ଉପରି ଭାଗରେ ଜଣେ ଯୁବକଙ୍କ ଫଟୋ ରହିଛି। ସେଥିରେ ସେ ଶେରଓ୍ବାନୀ ପିନ୍ଧିଛନ୍ତି। ସେଥିରେ ଲେଖାଯାଇଛି, ‘ଲମ୍ବା, ଗୋରା ଏବଂ ସୁନ୍ଦୀ, ପ୍ରାୟ ୨୪ ବର୍ଷର, ମୋ ପ୍ରିୟ ପୁତ୍ର ମଜନୁଙ୍କୁ ମନେ ପକାଯାଉଛି, ଦୟାକରି ଘରକୁ ଫେରି ଆସ। ସମସ୍ତେ ଚିନ୍ତାରେ ଅଛନ୍ତି। ଆମେ ତୋର ଦାବିକୁ ମାନି ନେଇଛୁ। ‘ଲୈଲା’ ହିଁ ତୋର ବଧୂ ହେବ। ଏହାଛଡ଼ା ତୋର ବିବାହର ଶେରଓ୍ବାନୀ ‘ସୁଲତାନ’-ଦ କିଙ୍ଗ ଅଫ୍ ଶେରଓ୍ବାନୀରୁ କିଣାଯିବ। କାର ପାର୍କିଂ ସୁବିଧା ଥିବାରୁ ଆମେ ତାର ନ୍ୟୁ ମାର୍କେଟ ବ୍ରାଞ୍ଚକୁ ଯିବା। ଏଥିସହ ତୋର ଭୋଜି ଲାଗି ସୁଲତାନ୍ରୁ ହିଁ ପୁରା ପରିବାର ଲାଗି କୁର୍ତ୍ତା କିଣାଯିବ ବୋଲି ଆମେ ନିଷ୍ପତ୍ତି ନେଇଛୁ।’
ଏହି ବାର୍ତ୍ତା ସହ ବିଜ୍ଞାପନରେ ଠିକଣା, ଫୋନ ନଂ ଏବଂ ଫେସବୁକ୍ ହ୍ୟାଣ୍ଡେଲ ବିଷୟରେ ମଧ୍ୟ ଉଲ୍ଲେଖ କରାଯାଇଛି। ବର୍ତ୍ତମାନ ଏହି ଫଟୋ ସୋସିଆଲ ମିଡିଆର ବିଭିନ୍ନ ପ୍ଲାଟଫର୍ମରେ ଭାଇରାଲ ହେଉଛି। ଲୋକମାନେ ଏଥିରେ ଭଳିକି ଭଳି ପ୍ରତିକ୍ରିୟା ରଖୁଛନ୍ତି।
