ସୁରଜଚାନ୍ଦପୁର,୧୪ ।୧୧: ମଣିପୁରରେ ଶନିବାର ହୋଇଥିବା ଆତଙ୍କବାଦୀ ଆକ୍ରମଣରେ ୭ ଜଣଙ୍କ ମୃତ୍ୟୁ ହୋଇଛି । ଜଣେ କର୍ଣ୍ଣେଲଙ୍କ ସମେତ ୪ ଯବାନ ଶହୀଦ ହୋଇଛନ୍ତି । କର୍ଣ୍ଣେଲଙ୍କ ପରିବାରର ୨ ସଦସ୍ୟଙ୍କର ବି ଏହି ଆକ୍ରମଣରେ ମୃତ୍ୟୁ ହୋଇଛି । ଏହି ଆତଙ୍କବାଦୀ ଆକ୍ରମଣକୁ ନେଇ ସାରା ଦେଶ କ୍ରୋଧ ପ୍ରକାଶ କରିଥିବା ବେଳେ ଏହା ଉପରେ କଡା କାର୍ଯ୍ୟାନୁଷ୍ଠାନ ଦାବି କରାଯାଉଛି । ଏହାରି ଭିତରେ ଏବେ ମଣିପୁର ନାଗା ପିପୁଲ୍ସ ଫ୍ରଣ୍ଟ(ଏମ୍ଏନ୍ପିଏଫ୍)ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି । ଏହାପରେ ଏକ ନୋଟ୍ ଜାରି କରି ଶନିବାର ଘଟଣା ସମ୍ପର୍କରେ ବିସ୍ତୃତ ଭାବେ ଉଲ୍ଲେଖ କରାଯାଇଛି । ଏମ୍ଏନ୍ପିଏଫ୍ କହିଛି ଯେ ଆକ୍ରମଣ ସମୟରେ ଗ୍ରୁପରେ କର୍ଣ୍ଣେଲଙ୍କ ପତ୍ନୀ ଓ ପୁଅ ଥିଲେ ବୋଲି ଆମକୁ ଜଣା ନ ଥିଲା । ଏହାପରେ ନୋଟରେ ଯବାନଙ୍କୁ ପରାମର୍ଶ ଦିଆଯାଇଛି କି ସମ୍ବେଦନଶୀଳ ଅଞ୍ଚଳକୁ ପରିବାର ସହ ଆସନ୍ତୁ ନାହିଁ । ଯେଉଁ ଅଞ୍ଚଳକୁ ସରକାର ସୁରକ୍ଷା ଦୃଷ୍ଟିରୁ ସମ୍ବେଦନଶୀଳ ବୋଲି କହୁଛନ୍ତି ସେଠାରେ ପରିବାର ସହ ରହିବା ଠିକ୍ ନୁହେଁ । ସୂଚନାଯୋଗ୍ୟ, ମଣିପୁର ମୁଖ୍ୟମନ୍ତ୍ରୀ ଏନ୍.ବିରେନ ସିଂ ଘଟଣାର କଡା ନିନ୍ଦା କରିବା ସହ ଦୋଷୀଙ୍କୁ କଠୋର ଦଣ୍ଡ ଦିଆଯିବ ବୋଲି କହିଛନ୍ତି ।
