ମାଙ୍କଡ଼ ଏମିତି ଏକ ପ୍ରାଣୀ ଯିଏ କି ବହୁତ ଦୁଷ୍ଟ। ଏହାର ଚତୁରତା ଦେଖି ଲୋକେ ବି ବେଳେବେଳେ ଆନନ୍ଦିତ ହୁଅନ୍ତି। ସୋସିଆଲ ମିଡିଆରେ ଅନେକ ସମୟରେ ମାଙ୍କଡ଼ମାନେ ହଟହଟା କରୁଥିବାର ଭିଡିଓ ଭାଇରାଲ ହୋଇଥାଏ। ଏମାନେ ବେଳେବେଳେ ମଣିଷ ଏବଂ ପଶୁପକ୍ଷୀଙ୍କୁ ଅସୁବିଧାରେ ପକାନ୍ତି। ସେମିତି ଏକ ଭିଡିଓ ଏବେ ଭାଇରାଲ ହେଉଛି। ଯେଉଁଥିରେ ଏକ ମାଙ୍କଡ଼ କୁକୁର ଛୁଆକୁ ଟେକି ନେଇ ଗଛ ଉପରକୁ ଚାଲିଯାଉଛି। ତିନି ଦିନ ଧରି କୁକୁର ଛୁଆକୁ ନିଜ ପାଖରେ ରଖିବା ପରେ ବନଅଧିକାରୀଙ୍କ ସହଯୋଗରେ ପୁଣି ଛାଡୁଛି। ଏହି ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି।
ଭିଡିଓରେ ମାଙ୍କଡ଼ଟି କୁକୁରକୁ ଖୁବ୍ ଜୋର୍ରେ ଜାବୁଡ଼ି ଧରିଛି। ଗଛ ତଳେ ଅନେକ ଲୋକ ଠିଆ ହୋଇ ମାଙ୍କଡ଼ଠାରୁ କୁକୁର ଛୁଆକୁ ଅଲଗା କରିବାକୁ ଚାହୁଁଛନ୍ତି ମାତ୍ର ପାରୁନାହାନ୍ତି। ଜଣେ ମହିଳା ଏଥିପାଇଁ ମାଙ୍କଡ଼କୁ କଦଳୀ ବି ଦେଖାଇଛନ୍ତି। ମାତ୍ର ମାଙ୍କଡ଼ କୁକୁର ଛୁଆକୁ ଛାଡ଼ିବାକୁ ନାରାଜ। ମାଙ୍କଡ଼ଟି କୁକୁର ଛୁଆକୁ ଧରି ଅନ୍ୟ ଗଛକୁ କୁଦା ମାରୁଛି। ଏପରି ସ୍ଥିତିରେ ଲୋକେ ଥକି ଯାଇ ବିରକ୍ତି ପ୍ରକାଶ କରିଛନ୍ତି।
ଏହି ଘଟଣା ମାଲେସିଆର। ମାଙ୍କଡ଼ଟି ସାରୁ ନାମକ ଏହି କୁକୁରଛୁଆକୁ ତା ମା’ଠାରୁ ଛଡ଼ାଇ ନେଇଛି। ମାଙ୍କଡ଼ ଚାହୁଁଛି କୁକୁରକୁ ତା’ ପାଖରେ ରଖିବ। ଏହା ଦେଖି ଲୋକେ ଜମା ହୋଇ ଛଡ଼ାଇବାକୁ ଚେଷ୍ଟା କରି ଶେଷରେ ନିରାଶ ହୋଇଛନ୍ତି। ମାଙ୍କଡ଼ଟି କୁକୁରକୁ ଟେକି ନେଇ ଗୋଟିଏ ଗଛରୁ ଆଉ ଗୋଟିଏ ଗଛକୁ ଡେଇଁ ପଳାଉଛି। ୩ ଦିନ କୁକୁର ଛୁଆକୁ ନିଜ ଛାତିରେ ଜାବୁଡ଼ି ଧରିଛି। ଏ ସମ୍ପର୍କରେ ବନବିଭାଗ ଅଧିକାରୀଙ୍କୁ ଖବର ଦିଆଯିବା ପରେ ସେମାନେ ପହଞ୍ଚି ମାଙ୍କଡ଼ଠାରୁ କୁକୁର ଛୁଆକୁ ଉଦ୍ଧାର କରିଛନ୍ତି। କିନ୍ତୁ ମାଙ୍କଡ଼ଟି କୁକୁର ଛୁଆର କୌଣସି କ୍ଷତି କରିନାହିଁ।
ଭିଡିଓଟି ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି। ଜଣେ ୟୁଜର କହିଛନ୍ତି, ମୁଁ ମାଙ୍କଡ଼ର ଏମିତି ଉତ୍ପାତ କେବେ ଦେଖିନାହିଁ। ସେହିପରି ଅନ୍ୟ ଜଣେ ୟୁଜର ଲେଖିଛନ୍ତି, ପପିକୁ ହପହରଣ କଲା କପି।
