ଟୋକିଓ,୧।୮: ଟୋକିଓ ଅଲିମ୍ପିକ୍ସରେ ରବିବାର ଆୟୋଜିତ ଏକ ସୁପର ହେବିଓ୍ବେଟ ବକ୍ସିଂ ମ୍ୟାଚ୍ରେ ଏକ ଅଭାବନୀୟ ଘଟଣା ଘଟିଛି। ଜାଣିଶୁଣି ମୁଣ୍ଡରେ ପ୍ରତିପକ୍ଷ ବକ୍ସରଙ୍କୁ ଆଘାତ ଦେବା କାରଣରୁ ଫ୍ରାନ୍ସ ବକ୍ସର ମୌରାଦ ଆଲିଭଙ୍କୁ ରେଫରି ଡିସ୍କ୍ୱାଲିଫାଏ ଘୋଷଣା କରିଥିଲେ। ରେଫରିଙ୍କ ଏଭଳି ନିଷ୍ପତ୍ତି ବିରୋଧରେ ପ୍ରାୟ ଘଣ୍ଟାଏ ଧରି ରିଙ୍ଗ୍ରେ ଅନଶନରେ ବସିଥିଲେ ଫ୍ରାନ୍ସ ବକ୍ସର। ବକ୍ସିଂ ଅଫିସିଆଲ ବୁଝାଇବା ପରେ ଆଲିଭ ଆନ୍ଦୋଳନରୁ ହଟିଥିଲେ।
କ୍ୱାର୍ଟର ଫାଇନାଲ ମ୍ୟାଚ୍ର ଦ୍ୱିତୀୟ ରାଉଣ୍ଡ ଶେଷ ହେବାକୁ ମାତ୍ର ୪ ସେକେଣ୍ଡ ବାକି ଥାଏ। ମୌରାଦଙ୍କ ମୁଣ୍ଡ ବାଜିବାରୁ ପ୍ରତିପକ୍ଷ ବ୍ରିଟିଶ ବକ୍ସର ଫ୍ରାଜର କ୍ଲାର୍କଙ୍କ ଉଭୟ ଆଖି ଉପରେ ଆଘାତ ଲାଗିଥିଲା। ରେଫରି ଆଣ୍ଡି ମୁଷ୍ଟାଚିଓଙ୍କ ମତରେ ମୌରାଦ ଏହା ଜାଣିଶୁଣି କରିଥିଲେ। ଏଣୁ ଫ୍ରାନ୍ସ ବକ୍ସରଙ୍କୁ ଅଯୋଗ୍ୟ ଘୋଷଣା କରିଥିଲେ ରେଫରି।
”ମୋ ପ୍ରତି ନିଆଯାଇଥିବା ନିଷ୍ପତ୍ତି କେତେ ଅନ୍ୟାୟ ଥିଲା, ତାହା ଜଣାଇବା ପାଇଁ ମୁଁ ଅନଶନରେ ବସିଥିଲି। ଯଦି ମୁଁ ଭୁଲ କରିଥିଲି, ତେବେ ରେଫରି ମୋତେ ପ୍ରଥମେ ଚେତାବନୀ ଦେଇଥାନ୍ତେ। ମୋ ସାଥି ବକ୍ସରଙ୍କ ପ୍ରତି ମଧ୍ୟ ଅନ୍ୟାୟ ହୋଇଛି। ଏଠାକୁ ଆସିବା ପାଇଁ ମୁଁ ଜୀବନ ସାରା ଟ୍ରେନିଂ କରିଛି। କିନ୍ତୁ ଜଣେ ରେଫରିଙ୍କ ନିଷ୍ପତ୍ତି କାରଣରୁ ମୁଁ ହାରିଗଲି“ ବୋଲି ମୌରାଦ କହିଛନ୍ତି।
ଉଲ୍ଲେଖଯୋଗ୍ୟ, ରିଓ ଅଲିମ୍ପିକ୍ସରେ ଫ୍ରାନ୍ସ ବକ୍ସରମାନେ ୬ ପଦକ ଜିତିଥିଲେ। କିନ୍ତୁ ଚଳିତ ଥର କୌଣସି ବକ୍ସର ପଦକ ଜିତିବାକୁ ସକ୍ଷମ ହୋଇ ନାହାନ୍ତି।
